shadow
Diocese de Dili > NOTÍCIAS > REFLEXÃO > JESUS CRISTO ULUK LIU CRIATURA HOTU-HOTU, TAN NIA, MAROMAK HAKIAK SASAN TOMAK IHA LALEHAN NO IHA RAI, […] SASAN TOMAK NA’I MAROMAK HAKIAK HODI NIA NO TAMBA NIA. JESUS CRISTO MAK ULUK LIU SASAN TOMAK.

JESUS CRISTO ULUK LIU CRIATURA HOTU-HOTU, TAN NIA, MAROMAK HAKIAK SASAN TOMAK IHA LALEHAN NO IHA RAI, […] SASAN TOMAK NA’I MAROMAK HAKIAK HODI NIA NO TAMBA NIA. JESUS CRISTO MAK ULUK LIU SASAN TOMAK.

Maun alin doben sira, buat nebe foin dehan sai dadauk ba imi ne’e hatudu katak Ita Nai Jesus Cristo mak Liurai ba ema no buat hotu be iha lalehan no iha rai.

Doben sira, ukun no liurai buat nebe moris iha ita ema sira ninia le’et. Ukun sira nee iha modelo oioin deit, wain tebes maibe iha ukun ida mak kmanek no loos liu. Ukun ida nee moris duni iha ita leet maibe la mai husi ita ema, mai husi Maromak rasik be sai ukun nain no ukun rasik ita hotu be sai nudar ninia povo. Wainhira ita hateke ba ukun sira iha mundo nee ita descobre momos deit katak ohin loron iha ukun wain tebes. Iha ukun diak no mos iha ukun at. Ukun diak no ukun at nee mai husi ninia pratica nebe lori diak ka lori at ba ema nundar Maromak ninia ilas be moris iha rai klaran.

Iha mundo ita hare ukun rai rai sira nian, ukun militar nian, ukun economia nian, ukun comunicação nian no sira seluk-seluk tan. Ukun sira nee hotu ita hare momos oinsa sira ninia ukun, dala barak liu lori diak ka lori at ba ema sira? Se lori diak nee tamba ukun nee hatudu ilas Maromak ninian, se ukun nee lori at sem dúvida tamba lao dook husi roman Maromak ninia ukun nian, tamba buka deit diak ba ema sira, la lori ema sira to’o Maromak.

Primeira Leitura fo exemplo ida mai ita kona ba ukun nebe mai husi Maromak. Maromak hili liurai David atu ukun ninia povo Israel. Iha nee hatudu katak ukun ne’e Maromak ninian, laos ita ema sira nian. Ukun liurai David nian nee tidin-an iha Maromak no ukun povo ida nebe nia nudar ukun nain hatene katak Maromak ninia povo. Carateristica Maromak ninia ukun nee mak ukun nakonu ho justiça. Nee katak uluk nanain Liurai ninia moris tem que sai justo ka los liu iha Maromak no iha povo sira oin hafoin mak nia mos ho Maromak ninia tulun bele halo Maromak ninia povo moris iha justiça nia laran. Justiça iha dame, domin no ksolok ninia laran ba ema hotu hotu. Nee duni mak ita ema sira hakarak, ita buka, ita luta, ita koko nafatin iha ita ninia moris loro-loron.

Maun alin sira moris ida hanesan ne’e no ukun ida hanesan ne’e mak ema hotu hakarak moris ba. Segunda leitura fo hanoin mai ita katak masque ida nee mak ita hotu hakarak no Maromak ninia hakarak maibe iha mundo iha mos ukun seluk ida nebe la liu Maromak ninia ukun nia existe tamba fuan no laran tos ita ema sira nian. São Paulo dehan katak ukun ida nune’e mak ukun nakukun nian, ukun be lori ba terus no mate permanente. Maibe ita agradece ba Maromak basa tamba fiar ba Jesus Cristo no tamba Maromak ninia domin Nai Maromak soi ona ita husi ukun nakukun nee nian liu husi ita Nai Jesus Cristo ninia terus, mate no Moris hias. Oras nee ita buka moris fiel nafatin ba Maromak ninia ukun hodi hadomi liu tan Maromak ninia ukun ne’e hodi ita labele monu fila fali ba nakukun nia ukun.

Segunda Leitura no Evangelho haktuir momos los mai ita katak Nai Jesus Cristo mak ukun hotu-hotu ninia nain, nia mak liurai rai hotu nian basa nia mak uluk liu criatura hotu hotu, hodi nia mak Maromak halo sasan hotu hotu iha lalehan no iha rai. Nia mak ukun ema no sasan hotu tan ne’e nia liurai buat hotu hotu nian. Jesus Cristo ninia ukun, ukun domin nian. Tamba hadomi ema no mundo rai klaran Jesus fo ninia-An hodi terus too mate no moris hias fila fali atu ema hotu bele hetan moris. Ne’e duni ninia ukun ukun be fo perdua no salva hodi lori moris rohan laek ba ema no buat hotu. Jesus revela kedas ne’e ba ahu nain arependido nebe hakribi salan, Jesus dehan “Ohin kedas o sei tama hamutuk ho hau iha Reino Lalehan. Jesus Cristo ninia ukun, ukun dame nian, hodi niania ukun liu husi ninia terus mate no moris hias halo ema ba dame malu ho Maromak no ho ninia maun alin sira seluk no ho buat hotu. Nune’e iha Cristo buat hotu hetan fila fali moris no sei moris ba nafatin.

Maun alin doben sira ne’e hotu katak ema hotu nebe moris hodi fiar metin nafatin no moris tuir nafatin Jesus Cristo Liurai ninia hanorin sira, perdaun, dame, domin, ksolok no moris sei horik nafatin ho sira, garantido ba sira, ne’e katak hanesan ema nebe fiar iha nia nundar Maksoin iha moris nee labele halo perdaun, dame, domin no ksolok no moris nee sai fali hanesan mehi ida deit, maibe tem que halo nia sai concreto. Sai concreto iha ita ninia fo perdua no husu perdão ba malu, ita nia hakiak dame, ita ninia fo dame ba malu, ita nia fo domin no ksolok ba malu no ita ninia luta no tulun malu atu ita hetan moris no mos ema seluk hetan moris. Nune’e mak katak Maromak ninia Reino horik duni iha ita leet, Maromak ninia ukun hela duni iha ita leet. Nune.e mak katak ita Maromak ninia povo duni no Jesus Cristo Maromak oan mane mesak mak ita ninia liurai duni.

Maun alin sira atu moris nafatin iha Cristo ninia ukun no ninia reino iha mundo ne’e mosu obstáculo no dificuldade barak tebes maibe keta laran susar, nundar ninia povo sira mai ita ho fiar no laran metin lolos ba ita ninia liurai ne’e ita lao nafatin ba oin, halao moris nee tuir nafain Jesus liurai buat hotu ninia ukun hodi lori mos ninia ukun ne’e no ninia reino  ba ema hotu hotu no ba mundo tomak. Amen.                                   

    Bidau, Domingo CR, A.C, 2019, By. Pb.

Leave a Reply

Your email address will not be published. Required fields are marked *