shadow
Diocese de Dili > NOTÍCIAS > REFLEXÃO > JESUS laos LIURAI BOOT…??….Cuidado !!

JESUS laos LIURAI BOOT…??….Cuidado !!

               Cuidado ho profeta falso sira nebé tama sai uma hodi haklaken maromak falso ida naran jeova. Sira mai, sira dada lia kona ba Jesus, hafoin ikus mai dehan Jesus laos Maromak. São Paulo iha segunda leitura hatete:”Bainhira Maromak dame Fali ho ema sira hodi Jesus Cristo futar Ran, nakfakar iha Cruz, Na’i Maromak hakarak mos, hodi Cristo, dame malu no sasán Hotu-hotu iha rai no iha lalehan”. Jesus Cristo Mak kreda Nia ulun; kreda mak Jesus Cristo Nia isin lolon. Tuir uma kreda Católica nia costume ka documento oficial, comemoração solenidade Cristo Rei (Cristo Liurai), Papa Pio XI mak decide iha tinan 1925 hodi sai solenidade boot iha celebração litúrgica Igreja Católica nian. Nunee, festa solenidade Cristo Rei bele dehan foin mak hahu comemora iha história Igreja Católica nian maibé prática devoção nee lao antes ona iha antiguidade.

                Iha altura neba, Igreja tama iha época difícil iha nebe, poder político hahu contamina eh intervem iha assunto serviço Igreja nian, poder ateismo no totalitário hahu expressa sira nia kbiit hodi rejeita (menolak) assunto sira nebe relaciona ho Maromak inclui mos la simu Igreja nia papel iha sociedade. Exemplo ida mak iha Mexico iha tinan hirak liu ba, mosu revolução boot husi povo ba governo wainhira sarani Católico sira, nebe estadu bandu sira hahi-adora Maromak ba moris guerrilha iha ailaran hodi funu hasoru estadu. Inclui iha grupo rebeldes nee, padre balun no general ida husi parte estadu nebe revolta tanba nia defende liberdade religiosa iha nação Mexico. Povo sarani sira la rende durante conflito nee. Se guerrilheiro balu capturado karik, sira sei hetan pena de morte; iha sira nia ibun, molok atu mate sira sempre temi; viva el Cristo Rey.

               Igreja Cristã Católica nebe existe ona durante tinan rihun rua resin, considera solenidade Cristo Liurai nudar novidade ida. Maske nunee, conteúdo fiar/fe nebe expressa iha solenidade nee kleur ona hanesan existência Igreja Católica rasik. Desde antiguidade kedas, wainhira Igreja hahu estabelece husi Nai Jesus Cristo, sarani nobun fiar no considera ona Jesus Cristo nudar LIURAI MUNDO RAI KLARAN.

               Evangelista São Lucas Domingo semana nee convida ita hotu nudar sarani hodi adora Jesus Cristo Crucificado nudar ita nia Liurai mundo tomak.

               Tuir lolos, expressão Jesus Cristo nudar Liurai Universo, em princípio, ninia sentido hanesan deit ho expressão apóstolo sira nian ba Jesus be hanaran: Nai Jesus. Ida nee mak base fundamental ba Evangelização apóstolo sira nian.

               Evangelho São Lucas semana nee, hatoo hanoin mai ita katak; Jesus nia mate iha Cruz sai nudar passo inicial/dahuluk ba estabelecimento poder no ukun Nai Jesus Cristo nian iha mundo rai klaran. Cruz mak Cristo nia trono. Iha Evangelho, ita le/rona katak; iha escrito hakerek iha nia ulun dehan: Jesus Nazareno Liurai ema Judeu nian (INRI=IESU NAZARENUS REX IUDAEORUM). Saida mak ita bele entende husi liafuan nebe hakerek iha Jesus nia Cruz nee? Ba lider Romano sira no ba Jesus nia inimigo lider judeu sira, escrito be hakerek iha Jesus nia ulun nee lia los husi sira nia decisão arbitrária (tuir sira nia gosto deit) ba Jesus, ao passo que ba ukun nain Romano sira, Cruz nudar sinal humilhação (penghinaan) ba Jesus nia-An rasik.

               Basá, iha pilatos nia oin, Jesus rasik confessa katak; nia mak Liurai mundo rai kalan nian. Maibé, ba Aman Maromak iha lalehan, lia fuan INRI iha Jesus nia Cruz nee nudar justificação eh inauguração ida katak; Jesus Cristo nee realmente Liurai mundo tomak nian duni. Ho descrição iha leten, saida mak ita bele capta husi relato Evangelho kona ba solenidade Jesus Cristo Liurai mundo raiklaran nian? Relato Evangelho nee hakarak hatudu katak; ita horik iha mundo rua; ida, natureza ou mundo nebe iha lia grego bele expressa ho termos KOSMOS. Rua, mundo ida seluk mak  mundo rai klaran (alam semesta) nebe expressa ho lia grego naran MAKROKOSMOS. Makroskosmos mos, ita bele expressa ho liguagem ema nian hodi dehan; ita nia mundo nebe la seluk la leet mak ita idaidak. Individuo ida-idak mos bele hanaran MIKROKOSMOS.

               Evangelho Domingo semana nee apresenta ba ita nobun nudar mikrokosmos, nudar mundo kiik ida. Ema nain rua nebe hedi hamutuk ho Jesus iha Cruz tutun mos ema considera hanesan ema aat nebe merece duni ba castigo nee. Sira nain rua nee ida ikus mai consciente tebes ho nia moris nudar ema aat, hafoin nia arrepende-an hodi hodi husu ba Jesus dehan:”Jesus…..! hanoin hau wainhira ita tama iha Ita nia reino nudar liurai”. Husi arrependimento ema aat nee nian, ita bele compreende katak; afinal lia fuan INRI eh nee liurai Judeu nebe prega iha Jesus nia futar ulun, ema hotu bele no ema hirak nee inclui mos Jesus nia apóstolo balu, só ema sala nain ida deit mak bele compreende hodi confessa ba Jesus katak Jesus nee liurai duni. Ba pedido em aat nee nian, Jesus hatan hodi dehan:”Hau hatete ba o….! ohin kedas, o sei hamutuk ho Hau iha paraiso”.

               Rona tiha confissão ema aat nee no rona mos resposta husi Jesus ba ema aat nee, ita husu:”será que Jesus nee Liurai mundo raiklaran?” oinsa ita ida idak nia convicção/keyakinan kona ba Jesus nudar Liurai Universo? Será que Jesus presente iha hau nia moris nudar liurai? Oras nee sekte testemunha jeová sira tama sai sarani Católico sira nia uma hodi hatoo mos pergunta hanesan katak; ita conhece ona Jesus ka lae? Ema Católico barak mak rejeita no duni sai ona visitante husi sekte testemunha jeova nebe badinas visita sarani sira nia uma……laran metin katak ita nobun nebe sei fiel ba ita nia Nai Jesus Cristo, la bele simu presença grupo testemunha jeova iha ita nia fuan basá, sira sei hanorin katak Jesus Cristo laos Maromak. 

               Realmente Cristo mak determina ita nia destino moris, nudar Católico, ita nia fiar no fidelidade ba Maromak mak justifica ita nia submissão nee. Ita mos precisa consciente duni katak; iha ita nia moris laos ita rasik mak endereça moris nee maibé, Cristo mak sai mata dalan único ba mors nee. Tanba nee mak ho fiar metin, ita nobun proclama katak; Cristo Mak Liurai ba Mundo Rai klaran nee. Nee significa katak; ita nia moris exclusivamente saran iha Jesus nia liman nudar Liurai ba ema hotu.

               Ema hotu hotu por natureza; pecador/sala nain tan monu bebeik ba sala maibé, privilégio boot monu los ba Jesus ho Nain Feto nebe la iha salan durante sei moris. Tan nee, Evangelho Domingo semana nee, hatudu mai ita kona ba figura ema sala nain/ema aat nain rua nebe hedi hamutuk ho Jesus. Tribunal Romano ho influencia judaica decide atu sira nain rua hetan castigo hanesan ho Jesus. Até que, decisão ba Jesus nia mate mos considerado hanesan decisão nebe justo. Maibé, tribunal divino nebe lao dadauk iha Cruz tutun (wanhira Jesus halo diálogo ho ema naok ten nebe arrepende) hatudu no justifica estrutura justiça nebe diferente ho tribunal mundo nian. Iha tinan hirak liu ba, artista Timor balu hananu dehan: iha mundo ita mai hanesan bainaka no iha mundo justiça lori osan…..ba mundo seluk justiça la ho osan.       

                Iha Jesus nia Reino, mate laos fim husi moris/vida. Iha mundo nee, moris ho mate confronta malu halo ema moris dilema, halo ema moris la hakmatek too balbalun buka aimoruk tun sae hodi halo naruk idade, balu uza mina morin oioin hodi awet muda…nst. Basá, mate mak hapara confronto nee no sira be mate hateke ba sira moris dehan: moris hanesan o nian nee hau mos sente ona maibé, mate hanesan hau nian nee o seidauk sente.

               Mate los duni hapara moris iha rai nee maibé, ho Cristo nia mate iha Cruz tutun, confronto entre mate ho moris nee hakotu ona eh hamoos tiha ona. Ba ida nee, ita bele expressa iha lian indonésia dehan:”Dengan demikian untuk selanjutnya tidak ada lagi pertentangan antara hidup dan mati. Tetapi yang akan tetap merupakan pertentangan ialah sikap dasar kita sendiri, yakni kita mau sungguh hidup bagi Tuhan atau hanya mau hidup bagi diri kita  sendiri saja”. Ita hahalok diak eh aat mak hamosu rasik confronto ba ita nia isin no klamar. Hamutuk ho Jesus Nai liurai Universo nian, moris halakon ona mate nia ukun. Jesus Cristo mak Maksoyn mundo tomak nian. Matebian Ex Presidente Indonésia: GUS DUR dala ida dehan: Jesus laos salvador deit ba ema Cristão sira maibé, Jesus ne’e sai Maksoyn ba ema hot-hotu iha mundo ne’e.

                Mai ita comemora solenidade CRISTO LIURAI UNIVERSO nee ho fiar metin nudar ema Católico. Se ema hotu inclui governante sira consciente eh confessa katak Cristo mak Liurai Universo nian, nunee nação hotu hotu sai la mosu tan funu hanesan ohin loron iha fatin barbarak. Assim Seja e Bem Haja (Ignaslopes).

Leave a Reply

Your email address will not be published. Required fields are marked *