shadow
Diocese de Dili > NOTÍCIAS > LETURA DIÁRIA > XXXIV Domingo Tempo Comum (ANO C)

XXXIV Domingo Tempo Comum (ANO C)

Nosso Senhor Jesus Cristo Rei do Universo

 

Primeira Leitura  2 Sam. 5, 1-3

Lia housi Livro Profeta Samuel:

Iha loron hirak neba, uma-kain tomak Israel ninian ba hasouru David iha Hebron, hodi dehan ba nia: “Ami ho ó, ita ran kona ba malu. Houri uluk kedas, bainhira Saúl sei ukun hela ami, ó mak Israel nia liman-kro’at nia ulun. Iha oras neba, Na’i lia tun ba ó: ‘Ó mak sei ukun Israel, Ha’u nia povo; ó mak sei hela hanesan Israel nia ulun’. Nune’e, katuas sira hotu Israel nian, ba hasouru liurai iha Hebron. Iha neba mak liurai David hemu moruk ida ho sira; hotu tiha, sira foti David nu’udar Israel nia Liurai.

Maromak Futar Lia. 

 

Salmo Responsorial                                                                                                                                    Sal. 121(122), 1-2. 3-4a. 4b-5

Refrão : Ho ksolok ita sei la’o ba Na’i uman!!! Repete-se

Ha’u haksolok, wainhira ema dehan mai ha’u:

“Ita la’o ba Na’i nia uman!’ 

Ami sama ona ó rain, 

ami tau ona ain iha ó odamatan, Jerusalém. Refrão

 

Jerusalém, cidade ema hari,

kota furak, kota kmanek,

ema sira, Israel emar sira hotu

sa’e ba to’o iha neba. Refrão

 

Atu hahi Na’i naran, tuir lei haruka,

basa, iha neba, iha David kadunan,

ema halo tuir justiça. Refrão

 

Segunda Leitura                                                                                                                                                                          Col. 1, 12-20

Lia housi São Paulo nia surat ba sarani sira iha Colosso:

Maun-alin sira: Fo agradese ba Maromak Aman, nebe haraik ba imi liman rohan nebe rai hela ba ema judeu di’ak sira iha roman lalehan. Nia mak hasai ita housi ukun nakukun nian, lori ita ba Nia Oan doben nia Reino. Hodi Nia Oan doben ne’e, mak ita hetan salvasaun, ita hetan perdua ba ita salan. Jesus Cristo mak Na’i Maromak, nebe ita la hare Nia futar ílas. Nia uluk liu criatura hotu-hotu. Tan Nia, Maromak haki’ak sasan tomak iha lalehan, iha rai, sasan nebe ita la hare, no sasan nebe ita bele hare, katak:  Anjo sira,  nebe liurai no ukun-na’in. Sasan tomak Na’i Maromak haki’ak hodi Jesus Cristo no tan ba Jesus Cristo. Jesus Cristo mak uluk liu sasan tomak. Sasan tomak moris nafatin hodi Jesus Cristo. Jesus Cristo mak Kreda nia ulun; Kreda mak Jesus Cristo nia isin lolon. Nia mak ulun, Nia mak uluk liu ema hotu-hotu nebe moris hias.  Ne’e duni, Nia mak uluk sasan hotu-hotu. Tan Na’i Maromak hakarak, rahun-diak tomak hela iha Nia. Bainhira Maromak dame fali ho ema sira hodi Jesus Cristo futar Ran, nakfakar iha cruz Na’i Maromak hakarak mos, hodi Cristo, dame malu ho sasan hotu-hotu iha rai no iha lalehan.

Maromak Futar Lia.

 

Aclamação                                                                                                                                                                                          Mc. 11, 10

Refrão : Aleluia, Aleluia!! Repete-se

Rahun-di’ak ba Ida be mai, hodi Na’i nia naran: 

rahun-di’ak ba ida be mai, ita aman David nia reino.   Refrão

 

Evangelho                                                                                                                                                                                     Lc. 23, 35-43

Na’i Jesus Cristo nia Evangelho nu’udar São Lucas haktuir:

Iha tempo neba, Judeu nia ulun sira hasara Jesus, hodi dehan:  “Nia salva ema seluk:  Nia Maromak nia Messias karik, nebe Maromak hili nanis, ne’e sa, salva nia-An rasik ba”.  Soldado sira mos hasara Nia, hodi dehan:  “Judeu sira nia Liurai mak ó karik, soi Ó nia-An ba”.  Iha Nia ulun fohon ema hakerek hela nune’e:  “Ida ne’e mak Judeu sira nia Liurai”.  Iha oras ne’e, naokten sira be ema hedi iha cruz, mos hateten aat Jesus, sira dehan:  “Laos Ó mak Messias? Salva Ó-an rasik, hodi salva mos ami”.  Maibe, ida seluk haksi’ak netik, hodi dehan:  “Ó ne’e la hamta’uk Maromak; ó be hetan terus hanesan los Nia? Ita terus tuir justisa, basa, ita simu castigo tuir ita hahalok aat. Maibe, ema ne’e la halo buat aat ida, atu bele hetan castigo”.  Hafoin, nia dehan tan: “Jesus, hanoin atan ha’u, iha oras Ita fila mai nu’udar Liurai Boot”.  Jesus hatan ba nia: “Tebes, Ha’u dehan kedas ba ó: Ohin duni, ó sei tama hamutuk ho Ha’u iha Reino lalehan.

Lia Maskoyn.

Leave a Reply

Your email address will not be published. Required fields are marked *