shadow
Diocese de Dili > NOTÍCIAS > HOMILIA DO BISPO > ADVENTO CONVIDA ITA ATU HARAIK AN

ADVENTO CONVIDA ITA ATU HARAIK AN

Ohin iha loron ida ne’e ita sarani Lis-Mori nian halibur hamutuk ho sarani sira housi Dare, Aileu nian hamutuk iha Lis-Mori ita mai ho finalidade ida; hamutuk ho sira iha Primeira Semana ADVENTO nian ne’e atu Inaugura sira nia Capela. Tan ne’e ha’u hakarak hahu ho liafuan ida ne’ebe ohin ita rona iha Primeira Leitura Profeta Isaias nian ne’ebe dehan: “Imi mai ita sae ba Na’i nia foho, ba Jacob nia Maromak nia Uma Lulik”. Então ohin ita mai iha Uma Kreda ida ne’e katak ita mai iha Maromak nia horik fatin. Ita mai iha ne’e ho finalidade ida katak ita mai atu rona Maromak nia liafuan. Maromak nia Liafuan haklaken ba ita hotu. Maromak nia liafuan ne’e laos ita rona de’it, Maromak nia liafuan ne’e convida ita atu aprende kona ba moris.

Ó keta moris hanesan ema bilan maibe buka moris hanesan ema matenek. Moris ne’e laos ó nian, moris ne’e Maromak mak tau iha ó nia liman. Ne’e duni hadomi moris ne’e ba! Respeita moris ne’e ba! Tau matan ba moris ida ne’e. maromak nia liafuan ne’ebe ohin rona labele rona de’it maibe ita aprende housi buat ne’ebe ita rona, atu Maromak nia liafuan bele transforma ita nia moris.

Nu’udar oan iha uma keta la halo to’os karik, la obedece ba Inan-Aman karik, buka de’it imi nia hakarak de’it, buka problema de’it karik, ADVENTO ne’e Maromak convida sai oan ida ne’ebe hatene obedece, sai oan ida ne’ebe hatene halo tuir Inan-Aman, sai oan ida ne’ebe tem que hatene disciplina. Wainhira ita aprende atu rona no halo tuir maka aban bainrua ita bele sai labarik ne’ebe diak.

Ba Inan-Aman sira iha tempo ADVENTO ne’e nia laran, Maromak nia liafuan ne’ebe haklaken ba Inan-Aman sira atu halo saida? Inan-aman sira nia papel oinsa mak hatudu sira ninia domin ba oan sira, dedicação ba oan sira, acompanha oan sira, hanourin sira atu lao iha dalan ne’ebe los. Tanba ne’e iha Maromak nia futar oin Maromak husu ba ó; nu’udar Inan-Aman ó halo duni ó nia dever kalae? Tanba ne’e mak ADVENTO convida ita atu ida-idak hare ba ninia an.

Nu’udar juventude iha rai ida ne’e oinsa mak contribui ba Uma Kreda no Estado ka nu’udar jovem buka de’it problema. Ikus mai liafuan no hahalok hotu ne’ebe ita halo ita ida-idak sei hatan iha Na’i Maromak nia Futar oin. Cedo ou tarde ita hotu tem que hatan. Laiha ema ida ne’ebe moris mai sai desconhecido iha Na’i Maromak nia Futar oin. Iha Timor ema gosta usa liafuan Desconhecido; ha’u halo tiha buat ida subar tiha tanba tauk atu tama iha cadeia. Maibe iha Maromak nia oin ita sei la halai housi justiça tanba Maromak tau iha ita ida-idak nia sorin ita nia Anjo da Guarda atu acompanha ita. Tan ne’e mak ADVENTO fila fali mai ita mai iha Kreda ida ne’e ita mai ho finalidade ida ne’e; ‘Atu rona Maromak nia Liafuan’. Iha mensagem ida ne’ebe Domingo-Domingo Maromak koalia nafatin mai ita atu ita keta baruk atu rona, atu ita keta baruk ba missa no reza.

Ha’u fó parabens ba Amo Pároco, ba sarani Lis-Mori, ba Benfeitor sira, sira ne’ebe soe hamutuk força halo Capela oan furak los. Ne’e duni Capela furak laos atu ema hamriik iha fatin ruma ema hare mai furak, maibe Capela ida ne’e fatin capáz tanba fatin ida ne’e atu ita hasoru malu ho Na’i Maromak. ita la gasta ita nia energia, ita la gasta ita nia osan saugate de’it, maibe ita gasta ita hatene katak contribuição ne’ebe ita fó hodi halo fatin diak ida iha ne’ebe ita bele hasoru malu ho Na’i Maromak.

Dala barak ita ba iha fatin ruma ita hare katak ema wainhira halo rate ne’e furak los, halo ita nia Uma lisan kapáz gasta osan bobot, maibe ita nia Capela dala barak kiik, kiak, bibi ho karau mak hela tiha fali. Se ita fo ba matebian sira buat mesak furak, ba ita nia uma lisan atu halo buat mesak furak no ba Maromak ne’ebe fó moris mai ita, Maromak ne’ebe fó buat hotu mai ita, ita labele fó fila fali ba Nia diak ne’ebe ita hetan ne’e bele halo fali diak ida ba Maromak atu ita bele hasoru malu ho Nia? Tan ne’e mak ba sarani Lis-Mori hakasan duni halo duni Capela oan ida hanesan Pároco dehan uluk ne’e didin de’it ho Bebak, maibe ho esforço sarani ida ne’e nian consegue tau hamutuk força hodi rehabilita Capela ida ne’e atu nune’e bele hasoru malu ho Maromak. ho condição Capela ne’ebe diak, imi tama iha Capela imi iha duni hanoin ida katak atu hasoru malu ho Maromak atu ita rona Maromak koalia mai ita no ita mos bele loke ba Maromak ita nia defeito sira.

Iha momento hirak ne’ebe mak ema ses housi ita, iha momento hirak ne’ebe mak ema haluha ona ita, iha momento ida ne’e mak ita buka duni Maromak, loke ha’u nia an husik Maromak atu hela, hatudu dalan mai ha’u no resolve ha’u nia problema. Maromak la tun mai atu fó kedas 100 dolar ba ó atu resolve kedas ó nia problema, maibe Na’i Maromak haraik matak malirin ba ó nia fuan no laran ó bele hetan dalan atu bele resolve ó nia problema. Hetan dalan atu lao ba oin, loke ó nia fuan hanesan naroman boot ida mai ita. Tan ne’e ita haksolok ho ita nia celebração ohin ho inauguração Capela.

Ne’e duni, ADVENTO convida ita atu hare liu tan ba ponto ida ka rua: 1). Se ohin ita rona didiak iah Evangelho kona história Centurião ninian. Centurião katak Comandante boot ida ne’ebe ba buka Jesus tanba ninia atan feto ne’ebe morias todan. Ikus mai nia hetan milagre Jesus haraik ba nia isin diak. Maibe buat ida ne’ebe ohin hakarak dehan mai ita buat balun ne’ebe dada ita nia atenção; se dehan katak Centurião hetan milagre tanba sa? primeiro tanba ninia domin. Nia comandante boot ida maibe nia preucupa ho ninia atan ne’ebe moras. Ne’e atu dehan mai ita sarani katak tempo ADVENTO ninian ne’e atu ita loke ita nia matan, loke ita nia fuan, atu hateke mos ba ita nias família laran. Dala barak iha ita nia família laran dala ruma iha ema ruma ne’ebe ita la tau matan; sira ne’ebe moras, kiik, sira ne’ebe ita despreza, sira ne’ebe lao iha dalan ita la liga sira, iha tempo ADVENTO mak Maromak convida ita labele hare de’it sira ne’ebe mos, diak, matenek, maibe hare ema hotu liu-liu sira ne’ebe iha ó nia uma laran.

Se imi hakarak celebra imi nia NATAL didiak aprende iha semana 4 ne’e nia laran husu ba Maromak loke ó nia fuan, loke ó nia matan atu bele hare. Atu bele hare precisa virtude ida tan; virtude HARAIKAN ninian. Ohin loron iha ita nia família, iha ita nia rain virtude humildade ne’e dala barak lakon. Jesus ne’ebe Maromak Oan iha NATAL ne’e comvida ita atu hanoin kona ba mistério boot ne’e; Haraikan ninian.

Virtude ida tan iha centurião ne’e mak FIAR. Ho nia fiar centurião ne’e dehan; naran katak ita dehan liafuan ida de’it ha’u nia atan sei hetan isin diak tanba nia hare ba Jesus nu’udar Messias Maromak nia Oan. Tanba fiar ida ne’e mak ita hamutuk, tanba fiar ida ne’e mak ita hari ita nia Uma Kreda.

Leave a Reply

Your email address will not be published. Required fields are marked *