shadow
Diocese de Dili > NOTÍCIAS > REFLEXÃO > REFLEXÃO DOMINGO ADVENTO II, TA 2019

REFLEXÃO DOMINGO ADVENTO II, TA 2019

“Hadia Nai nia dalan, Halos Na’i ninia dalan inuk, taka rai klean hotu. Hatun foho tomak ass ba Badak, Dalan Kleuk sai sei los, dalan at sei tetuk hotu. Hafoin Criatura tomak sei hare Maromak nia Maksoin!”

 

Maun alin sarani doben sira, rona tiha liafuan ne’e ita bele hanoin ho maneira cómico nian ita bele dehan São João Batista hatene hela karik ita nia rai Timor ninia condição em geral karik, nee mak nia koalia los mai ita hanesan nee. Mas hau hanoin ita hotu hatene hela katak nia halo ilustração deit hodi convida ita atu ba hadia laos dalan kuak no rai klean ho fohon sira nee, maibe hadia ita ida idak ninia an iha tempo advento nee hodi ba hasoru loron Na’i nian. Loron nebe Maromak halo-an ba ema hodi mai moris hamutuk ho ita, incarnação, emanuel.

Tempo advento be ita liu hela dadaun ne’e tempo ida nebe ita hein hela Maromak ninia maksoin mai ita hotu nudar Maromak ninia povo. Maksoin ida nebe laos ita husu mak Maromak sei haraik mai ita maibe, tamba domin no laran luak rohan laek Maromak nian, Maromak sei haraik mai ita. Tempo ida nee tempo nebe Maromak hatudu ninia laran luak no ninia domin sai momos liu mai ita, hatudu iha buat nebe nia dehan ona sei halo mai ita. Na’i Maromak promete no nia halo.

Ita rona kedas ona iha primeira leitura Nai’i Maromak liu husi ninia profeta Baruc convida ita atu ita hasai tiha ka kolu tiha husi ita leet laran susar no taridu sira, laran triste no desesperado hodi hakonu deit ita an ho ksolok no laran metin lolos basa Na’i Maromak sei hatudu ninia naroman ba ita ema no ba sasan ho mundo tomak. Naroman ida be lori justiça, dame no  domin, iha ksolok no iha laran luak nudar Maromak rasik hakarak nanis ona mai ita. Ho ne’e Maromak sei hafoun ita ema sira nebe moris hela iha nakukun laran, iha susar, triste, tarido, desesperado nia laran sai ema nebe neon metin, laran metin no fiar metin lolos iha Maromak basa Maromak sei hit-An mai horik ho ninia povo sira.

São Paulo fo hanoin mai ita iha segunda leitura katak Maksoin nebe Na’i Maromak sei halo mai ita iha Ita Nain Jesus Cristo be mai moris hola isin ida hanesan ita nee ne’e sai momento nebe Na’i Maromak halo nakonu lolos ona buat diak tomak nebe nia promete mai ita nia beala sira no nia halo ba sira mai too ita sira tempo ohin loron nee nian.  Nune’e maun alin sira, tan Maromak halo diak mai ita  ita mos tem que buka hadomi malu lolos ho neon mos, ita tem que laran metin lolos iha Maromak basa loron Maromak ninia maksoin mai iha ita leet nee laos ona promessa ida maibe certeza ida. Certeza ida katak Na’i sei soi duni ninia povo sira.

Ba ne’e atu ita bele to’o duni iha loron Na’i ninia hit-an mai ho roman maksoin nian nee’ ita percisa harohan Maka’as. Katak atu ita ninia preparação sira iha tempo advento nee bele lori ita ba too selebra Nai ninia natal didiak oras nee ita tem que harohan makas liu tan, harohan ba ita an rasik, ba ita ninia rain no ba ema seluk, liu liu ba sira nebe precisa tebes tulun. Harohan ida laos atu convence Maromak ba buat nebe ita husu iha ita nia oração sira, maibe harohan nafatin ka harohan makas atu ita besik liu tan ba Maromak, atu ita fiar no laran metin liu tan iha Maromak, atu ita hadomi liu tan Maromak no maun alin sira seluk. Ita percisa harohan liu tan duni basa la ho oração ita sei labele hakat ba to’o celebração festa Natal Nai nian no familia nian ida diak no nakonu ho graça tebes. Ita sei harohan makas duni tan oração mak bele fo laran metin lolos mai ita, haburas no haboot ita ninia fiar, ita nia domin no ita ninia laran luak. Susar ba ita wainhira iha tempo advento nee ninia laran ita la harohan makas ou la ha halo oração.

Maun alin sarani doben sira hodi halo nune’e mak ita prepara-an duni, ita halo duni buat nebe São Joã Baptista dehan “Hadia Nai nia dalan., Halos Na’i ninia dalan inuk, taka rai klean hotu. Hatun foho tomak ass ba Badak, Dalan Kleuk sai sei los, dalan at sei tetuk hotu. Hafoin Criatura tomak sei hare Maromak nia Maksoin!.” Evangelista hatudu dalan completo liu tan mai ita hodi halo ita ninia preparação tempo advento nian nee sai diak liu tan hodi dehan mai ita atu oras nee kedas ona ita percisa hakribit salan sira. Hodi hakribi sala mak ita bele fila fali ba besik Na’i Maromak, mak ita hamos duni ita ninia-an, ita prepara duni ita ninia-an sai diak tebes ba Nai be sei hiit-an mai. Hakribi salan nee unica condição  atu bele fila fali ba Maromak, atu haboot Na’i ninia domin, paz, laran luak no ksolok mai ita.

Doben maun alin sira, nudar ema sarani hakribi salan nee buat ida nebe ita precisa halo duni loron loron no iha tempo forte sira hanesan advento nee ita precisa hakribit liu tan, hakribit fila fila. Wainhira ita la hakribit salan ita laos sarani ona, odamatan maksoin nian taka ona ba ita. Mai ita hakribit salan husi kedas, hakribit violência, ódio, vingança, laran moras, lori lia, bosok, lia falço, tolok, hakribi ema no seluk seluk tan. Hahau uluk husi ita ida idak ninia an hafoin mak tulun ema sira seluk liu husi ita ninia liafuan, hahalok no oração, atu nune’e iha loron Na’i to’o mai ita hotu bele hamutuk haksolok iha fiar ida deit, domin ida deit, no dame ida deit hamutuk iha Na’i. Amen.

Becora, 08.12.19, II D.Advento. Pb.

Leave a Reply

Your email address will not be published. Required fields are marked *