shadow
Diocese de Dili > NOTÍCIAS > LETURA DIÁRIA > III Domingo Iha Tempo Advento (ANO A)

III Domingo Iha Tempo Advento (ANO A)

Primeira Leitura                    Is. 35, 1-6a. 10

Lia housi Livro Profeita Isaias:

Rai mamuk no rai fuik maran haksolok ba! Rai tetuk maran haksolok no hafuan ba; hanesan ai-funan kmo’ok ida, hadahur no haklalak ba, tan laran haksolok.  Nia sei simu Glória líbano nian no Maromak ninia roman nabilan. Hakbiit imi liman sira be kole, hakbiit imi ain-tur sira be nakdedar. Dehan ba ema sira be fuan taridu:“Aten  boot, keta hakfodak! Imi nia Maromak mak mai nebá! Nia mai atu halo justiça;  Nai mai atu selu kolen;  Nia rasik mai atu soy ita”. Iha oras ne’e,  matan-delek sira haré,  tilun diuk sira sei rona,  ain kudeik sira sei haksoit hanesan rusa,  nunuk sira sei hananu ho ksolok.  Ema sira be Na’i soy,  sei fila.  Sira sei ba to’o Sião hodi hananu no haksolok, ksolok  rohan laek sei haroman sira oin;  iha sira leet sei hetan de’it ksolok no neon di’ak,  sei la hetan tan terus no halerik.

Maromak Futar Lia.

 

Salmo Responsorial                                                                                                                                   Sal. 145(146), 7. 8-9a. 9bc-10

Refrão : Na’i hiit-An mai! Na’i mai soy ami!!! Repete-se

Na’i tahan ho justiça

Kiik sira be ema hanehan.

Na’i, haraik ai-han ba ema hamlaha     

Haraik liberdade ba ema dadur.  Refrão

 

Na’i haraik naroman ba ema matan-delek

Hodi nia kbiit tahan ema kbit laek.

Nia hadomi ema sira be la sala.  Refrão

 

Na’i, tahan ema la’o rai;

Na’i haraik tulun ba oan ki’ak no faluk,

Maibé, taka dalan ba ema aat.  Refrão

 

Na’i, ukun nafatin;

Sião, Na’i mak o nia Maromak

Hodi otas ba otas.  Refrão

 

Segunda Leitura                                                                                                                                                                              Tg. 5, 7-10

Lia housi São Tiago nia Surat:

Maun-alin sira:  imi haterus-an  ba,  to’o Na’i  hiit-An mai.   Imi haré oin sá,  ema toos na’in hein ai-han furak mai housi rai, no terus to’o simu udan-tinan ka udan-udan sala-rai.  Imi mos haterus-an no laran metin ba,  tan Na’i besik ona atu mai.  Maun-alin sira:  Imi keta kesar malu atu ema la bele tesi lia ba imi. Tesi-lia na’in mai besik daudaun ona.  Mau-alin sira: kona ba terus no paciência imi sei banati tuir profeta sira,  nebé ko’alia hodi Na’i nia naran.

Maromak Futar Lia.

 

Aclamação                                                                                                                                                                          Is. 61, 1 (cf. lc. 4, 18)

Refrão : Aleluia, Aleluia!! Repete-se

Na’i, nia Espíritu horik ho ha’u haruka

Ha’u haklaken lia-foun ba ki’ak sira.  Refrão

 

Evangelho                                                                                                                                                                                      Mat. 11, 2-11

Na’i Jesus Cristo nia Evangelho nu’udar São Mateus haktuir:

Iha  tempo nebá, João Baptista dadur hela  iha  kadeia,  nia rona ema haktiur Cristo nia hahalok. Nia  haruka  escolante  sira  ba  husu  Jesus  nune’e: “ita mak ida nebé mai, ka ami sei hein fali ida seluk?” Jesus  simu ba sira:“imi ba haktuir ba João  buat  sira nebé  imi rona  no haré:  matan-delek sira haré, ain-kudeik sira la’o, ema moras  lepra sira hetan isin di’ak,  tilun-diuk sira rona,  mate sira moris hi’as,  ema  ki’ak  sira  rona lia-foun  di’ak.  Rahun-di’ak  ba  ema nebé la  hetan iha  ha’u leet ida atu halo sala”.   Wainhira  manu-ain sira ne’e  fila tiha, Jesus  hahú dehan ba ema lubun-lubun: “imi  ba haré sá iha rai  fuik maran? Fafulu  ida  anin  baku-ba  baku-mai?  Imi  ba  hare  sa?  Mane  ida  hatais de’it  hena  lahan  lotuk?  Maibé,  ema sira  hatais  de’it  hena  lahan  lotuk hela iha liurai Kaduna! Ne’e duni, imi ba hare sa? Los duni; ha’u  dehan ba imi, liu tan profeta  ida! Kona ba nia, ema  hakerek ona nune’e:  ha’u atu haruka ha’u  nia manu-ain la’o iha o nia oin, hodi hadi’a dalan ba o. Tebes, ha’u dehan ba imi: housi ema  hotu nebe feto hahoris, ladauk mosu ema ida, boot liu  João Baptista; maibé, ida nebe kiik liu  iha Reino lalehan, boot liu fali nia.

Lia Maksoyn.

Leave a Reply

Your email address will not be published. Required fields are marked *