shadow
Diocese de Dili > NOTÍCIAS > REFLEXÃO > Reflexão Natal 2019

Reflexão Natal 2019

Arcebispo da Arquidiocese de Dili, Dom. Virgílio do Carmo da Silva, SDB

 

Saida mak ita hare laos Árvore Natal nian, laos iluminação Natal nian basar baratu, Música Natal, Paixão nia taruto…ida ne’e mak Natal? Natal ida oinsa ne’e? Presente ida oinsa mak ha’u hein? surpesa saida mak Natal sei lori mai? Hanesan Amo Papa dehan: “Iha Natal Maromak hatudu Surpresa oi-oin”…

Fila oituan ba história original Natal nian atu descobre fali duni sentido nebé los… Natal dahuluk iha Belem nakonu ho surpresa oi-oin… hahu ho Maria no José sira nia prontidão atu colabora iha Maromak nia plano maske sira rasik preucupa iha início. Anjo nia presença iha Maria nia moris muda nia moris…hanesan Feto virgem nebé sei kous, “Feto ran ida sei kous no hahoris oan mane ida, oan ne’e ema sei hanaran EMANUEL”

Nune’e mos José, “David nia oan, keta tauk simu ó nia noiva Maria, basá nia kous hodi Espírito Santo nia kbiit”. José nebé hanoin atu lakohi simu Maria ba nia kaben, maibé Maromak muda nia plano iha mehi ida… husu José atu simu Maria nudar nia kaben. Wainhira Kosok Oan moris ona, José hanoin ona oinsa atu tau matan ba oan ne’e, maibé iha mehi Maromak haruka nia lori Kosok Oan ne’e ho nia Inan ba Egipto.

Hanesan uluk, ohin mos Natal Continua lori mudança oi-oin mai ita maske ita la soi no la hein. Se ita hakarak duni atu experiênçia Natal, ita precisa iha boa vontade ida, nune’e bele loke ita nia-an no pronto hasoru Surpresa oi-oin… surpresa nebé ita la espera duni, maibé bele lori mudança iha ita nia moris.

Ne’e duni, saida mak ita hare iha kalan Natal? Laos Maromak, buat hotu nia Nai, nebé halo-An kiik no kiak hanesan kosok oan ida! Liafuan Maromak nian mak Kosok Oan ida nebé latan hela, “labele koalia”; liafuan halo an ba ema no moris iha ita le’et! Maibé…

Laiha lia nain ida atu halo sergala eh lia dadolin atu simu…nune’e mos la iha autoridade ida mos presente iha nebá atu tara netik hela tais… atu simu ita nia Messias, Maksoin ne’e, maibé bibi atan sira nebé hetan novidade ne’e housi Anjo sira… los duni, Se mak hatene no hein hela kona ba ne’e? Maibé, ohin lae ona… basá, Atu celebra Natal Katak atu simu iha rai ne’e surpresa housi lalehan; ita la to’o atu hakmatek de’it ho buat nebé rai ne’e oferece wainhira housi lalehan lori mai novidade foun mai ita.

“Ohin iha Belem, moris ona mai ita Maksoin ida!”

Natal marca ho epoca foun nebé la tama iha ema nia plano moris, maibé Na’i Maromak haruka Nia Oan halo An ba ema no moris iha ita le’et:

Atu hanorin ema mos laos moris de’it ona ba nia an rasik, tuir de’it ida-idak nia gosto, maibé moris ba de’it Maromak no ho Maromak basá housi kedas ona tempo nebá “Maromak ho ita”, Nia horik ho ita, Nia lao ho ita.

Celebra Natal katak husik novidade Natal nian fanun no penetra iha ita nia moris; Natal marca ho vitória ida humildade nian laos arrogância; vitória ida simplicidade nian laos abundância, vitória ida silêncio nian laos halo barulho no rumores barak basá, iha silêncio de’it mak Maromak bele koalia mai ita.

Atu celebra Natal atu halo hanesan buat nebé Jesus halo, Nia mai hasoru ita nebé hein hela no buka atu hakruk ba hirak nebé precisa ita nia tulun; nune’e mos convite ida ba ita atu aprende hakruk ba malu mak dalan ba harmonia, paz no domin!

Atu halo hanesan Maria Santíssima: confia iha Maromak ho fuan no laran tomak, maske labele comprende buat hotu; nune’e mos ita hatene reconhece ita nia-an nudar ema, nebé iha nia limitação no hatene buka foti ita nia matan ba lalehan no fiar metin iha Nia nebé nain ba moris ne’e.

Celebra Natal katak halo buat nebé São José halo: hamrik no halo buat nebé Maromak hakarak, maske dala barak contra ita nia plano sira. São José ema nebé nonok, nia ita la rona liafuan ida nebé sai housi nia ibun, nune’e mos hanourin ita aprende atu rona uluk molok atu foti decisão, koalia no condena…

Celebra Natal katak prefere liu lian ida nebé nonok… hakmatek iha sociedade ida nebé nakonu ho barulho oi-oin… Tan ne’e, iha kalan Natal molok atu haksolok pausa oituan iha presépio nia oin… ó sei descobre katak; Natal ne’e mos surpresa ida ba ó… basá o bele descobre tan buat foun nebé o nunca imagina. Keta halo ita labele celebra Natal didiak, wainhira ita la compriende didiak oinsa tem que celebra Natal nebé los…. ita prefere celebra tuir buat nebé mundo exige laos tuir buat nebé Maromak nia plano…

Ne’e katak ita iha tendência atu celebra Natal ne’e hodi enfeita halo buat hotu furak no ita mak sai centro ba Natal laos ona ida nebé ita hein; Ne’e duni, keta buka atu halo fali Natal ida hanesan Festa han, hemu, lanu, dança no ikus mai hakiak hela conflito iha bairo no comunidade laran. Mai ita haka’as an duni ita celebra didiak, se lae bele acontece hanesan buat nebé São João hakerek:“Ha’u mai, maibé Ha’u nian sira la simu hau” (Jo 1:11).

Iha Natal mai ita hanesan São José fo espaço ba silêncio…

Hanesan Santa Maria, ita sei dehan:”Nai ha’u mak ne’e!

Hanesan Jesus ita hakbesik ba hirak nebé mesak…

Hanesan bibi atan sira ita mos iha coragem atu husik ita na fatin, sai ba buka Jesus.

HAU HAROHAN ATU “FITUN BOOT NATAL NIAN” SEI SAI DUNI NAROMAN BOOT IDA BELE LENO TIMOR OAN HOTU ATU HATENE HILI NO LAO IHA DALAN NAROMAN, DALAN LIA LOS, DALAN UNIDADE, ESPERANÇA MORIS NIAN LAOS TAN ONA DALAN NAKUKUN NIAN.

HO ESPERANÇA IDA NE’E MAK ATAN HA’U DESEJA; RAHUN DIAK NATAL NIAN BA POVO NO SARANI TIMOR TOMAK HO TINAN FOUN IDA NAKONU HO FIAR, ESPERANÇA NO DOMIN BA EMA HOTU LIU-LIU BA FAMÍLIA SIRA NEBÉ LAKON FIAR, ESPERANÇA NO DOMIN.

Leave a Reply

Your email address will not be published. Required fields are marked *