shadow
Diocese de Dili > NOTÍCIAS > LETURA DIÁRIA > DOMINGO DENTRO DA OITAVO DO NATAL

DOMINGO DENTRO DA OITAVO DO NATAL

FESTA SAGRADA FAMÍLIA

 

Primeira Leitura          Sir. 3, 3-7. 14-17a ou 2-6. 12-14

Lia housi Livro Ben Sirá:

Na’i hahí aman sira iha oan sira nia oin; Na’i tahan inan sira nia ukun kona ba oan sira. Ema nebé hamta’uk nia aman, sei hetan perdua ba nia salan; ema nebé hahí nia inan, sei halibur soin barak teb-tebes. Ema nebé hahí nia aman, sei haksolok ho nia oan sira; wainhira nia hamulak, Na’i sei rona duni nia harohan. Ema nebé hahí nia aman, nia moris sei naruk. Ema nebé tuir Maromak Futar Lia, sei fo ksolok ba nia inan. Ha’u nia oan, tulun ó nia aman, wainhira nia katuas; keta halo nia neon sala, wainhira nia sei moris. Maski nia neon la hanoin tuir ona, ó sei hanoin nia, keta hakribit nia, basá, ó foin sa’e. Di’ak nebé ó halo ba ó nia aman, Maromak sei la haluha. Nia sei kasu ó nia salan.

Maromak Futar Lia

 

Salmo Responsorial                                                                                                                                                      Sal. 127, 1-2. 3. 4-5

Refrão : Rahun di’ak ba ema sira nebé hamta’uk Na’i!

                 Rahun di’ak ba sira nebé la’o tuir Na’i nia dalan!!! Repete-se

Rahun di’ak ba ema be hamta’uk Maromak,

No la’o tuir Na’i nia dalan!

Ó kosar-wén la turu leet ba rai,

Riku-soy no ksolok sei horik ho ó! Refrão

 

Ó káben nu’u-malus nadiki iha uma laran;

Ó oan nu’u-bua nasare iha ó sorin. Refrão

 

Bensa ba ema be hamta’uk Na’i,

Housi Sião Na’i hahí nia;

“Ó sei haré Jerusalém di’ak liu tan

Wainhira ó sei moris”. Refrão

 

Segunda Leitura                                                                                                                                                                          Col. 3, 12-21

Lia housi São Paulo nia surat ba sarani sira iha Colosso:

Maun-alin sira: Imi, Maromak fihir ona, nu’udar ema santo no doben, imi sei laran luak, sei laran di’ak, sei haraik-an, sei laran maus, sei paciência. Imi terus malu, perdua malu, wainhira imi ida iha lia ruma nia maluk. Nu’udar Maromak perdua imi, nune’e mos imi sei perdua malu. Maibé, kmanek liu ida ne’e, hadomi malu. Basá, domin mak halo kmanek liu hotu. Ha’u hakarak Cristo Nia Dame, horik iha imi laran; Tan dame ne’e mak Maromak bolu imi atu sai isin ida de’it ho Cristo; hatudu ba Maromak imi nia laran di’ak. Husu barak Cristo Futar-Lia-Fuan horik ho imi, atu imi hatene hanourin malu, hatene fo lia di’ak ba malu ho neon. Ho Laran tomak hananu ba Maromak hodi hatudu imi laran di’ak: Hananu dadolin, hananu hahí, hananu ho lian Santo. Ko’alia ka halo buat seluk, imi sei halo hotu hodi Na’i Jesus naran; sei fo agradece ba Maromak Aman hodi Na’i Jesus naran. Feto sira, sei haraik-an iha laén sira oin; ne’e mak lós iha Maromak Futar Oin. Mane sira, hadomi imi nia káben; keta hateten lia króat ba sira. Oan sira, halo tuir aman sira, kona ba buat hotu. Basá, ne’e fo ksolok Maromak. Aman sira, keta fo terus imi oan sira, atu keta neon salan.

Maromak Futar Lia.

 

Aclamação                                                                                                                                                                              Col. 3, 15a – 16a

Refrão : Aleluia, Aleluia!! Repete-se

Cristo nia dame haksolok imi;

Nia futar lia fuan hela iha imi. Refrão

 

Evangelho                                                                                                                                                                          Mt. 2, 13-15, 19-23

Na’i Jesus Cristo Nia Evangelho nu’udar São Mateus haktuir:

Wainhira Magos sira fila tiha, Na’i nia Anjo ida, iha mehi ida mosu tiha ba José, hodi dehan ba nia: “Ó hamriik ba, hodi lori Labarik oan ho Nia Inan halai tiha ba Egipto hodi hela iha nebá, to’o loron nebé Ha’u fo hatene fali ba ó, basá, Herodes sei buka Labarik oan atu oho tiha”. José hamriik tiha kedas, iha kalan, lori Labarik oan ho Nia Inan hodi halai tiha kedas ba Egipto, hodi hela iha nebá, to’o Herodes nia mate. Nune’e, halo tuir lolóstiha duni buat nebé Na’i fo hatene nanis housi Profeta nebé dehan: “Housi Egipto Ha’u bolu tiha Ha’u Oan”. Wainhira Herodes mate tiha, iha mehi ida, Na’i nia Anjo ida, mosu ba José iha Egipto, hodi dehan ba nia: “Ó hamriik ba, hodi lori Labarik oan ho Nia Inan ba rai Israel nian, basá, sira nebé buka Labarik oan nia mate, sira mate tiha ona”. José hamriik tiha kedas, lori Labarik oan ho Nia Inan hodi fila fali ba rai Israel nian. maibé, rona katak Arquelau ukun iha Judeia, iha nia aman Herodes nia fatin, nia ta’uk atu ba nebá. Tan fó hatene iha mehi ida, José la’o ba rai Galileia no iha nebá, hela tiha iha cidade ida naran Nazaré, atu halo tuir lolós buat nebé hato’o nanis housi profeta sira: “Sira hanaran Nia Nazareno”.

Lia Maksoyn.

Leave a Reply

Your email address will not be published. Required fields are marked *