shadow
Diocese de Dili > NOTÍCIAS > LETURA DIÁRIA > Loron dala nen (6) iha Oitavo Natal nian

Loron dala nen (6) iha Oitavo Natal nian

Primeira Leitura                      1 Jo. 2. 12-17

Lia housi São João nia Primeira Surat :

Ha’u oan sira, oras ne’e ha’u hakerek daudaun ba imi, basá imi salan simu ona perdua, tan Jesus nia naran. Ha’u aman sira, ha’u hakerek daudaun ba imi, tan imi hatene ona Ida nebé iha nanis ona housi uluk mai. Ha’u foin-sa’e sira, ha’u hakerek daudaun ba imi, tan imi manan buat áat. Ha’u oan sira, ha’u hakerek tiha ona ba imi, tan imi hatene Aman. Ha’u aman sira, ha’u hakerek tiha ona ba imi, tan imi hatene Ida nebé iha nanis ona. Ha’u foin-sa’e sira, ha’u hakerek tiha ona ba imi, tan imi iha kbiit, Maromak Nia liafuan sei hôrik iha imi, tan imi mana tiha ona buat áat. Imi keta hadomi mundo no mós buat nebé mundo iha. Ema ruma hadomi karik mundo, domin Maromak nia la hôrik iha nia. Basá buat hotu nebé mundo iha, isin nia hakaran, matan nia hakaran no riku-soi loko-an nian, la mai housi Aman, mai housi mundo. Nune’e mundo sei mohu, nia hakaran mós sei mohu, maibé ema nebé halo tuir Maromak nia hakaran sei moris ba nafatin.

Maromak Futar Lia.

 

Salmo Responsorial                                                                                                                      Sal. 95(96). 17-8a, 8b-9, 10 (R. 11ª)

Refrão : Lalehan haksolok, rai-klaran hahi!!! Repete-se

Hawélok, povo sira, hawélok Na’i;

Hawélok Nia glória no Nia kbiit.

Hawelok, Nia naran Nia glória. Refrão

 

Lori buat karan no tama ba iha Nia kadunan,

Adora Na’i hodi hatais be lulik,

Nakdedar iha Nia futar oin, rai-klaran tomak . Refrão

 

Haklaken ba povo hot-hotu : ‘Na’i mak liurai’

Nia hari mundo metin, sei la nakdoko,

Na’i ukun povo hotu ho justiça. Refrão                                                                                                                                                                                                                                                                                                                        

 

Aclamação                                                                                                

Refrão : Aleluia, Aleluia!! Repete-se       

Santo mak loron nebé naroman ida mosu mai ita.

Mai adora Na’i ba. Ohin ne’e naroman boot ida nabilan mai rai tomak. Refrão

 

Ou                                                                                                                                                                                                         Heb. 1. 1-2

Refrão : Aleluia, Aleluia!! Repete-se       

Iha tempo uluk no ho dalan oi-oin, Maromak ko’alia ba ita nia aman sira housi profeta sira;

ikus mai, iha loron hirak ne’e, Maromak ko’alia ho ita housi Ninia Oan Mane. Refrão

 

Evangelho                                                                                                                                                                                       Lc. 2. 36-40

Na’i Jesus Cristo Nia Evangleho nu’udar São Lucas haktuir:

Wainhira Maria ho José lori Jesus ba hasa’e ba Na’i iha Jerusalém, iha templo iha hela profeta feto ida, naran Ana, Fanuel nia oan feto, housi uma-kain Aser nian. Nia ferik ona, moris tiha nu’udar feto-káben-na’in kmanek iha tinan hitu nia laran, hafoin hela faluk to’o tinan walunulu resin háat. Nia la hadook-an housi templo, kalan-loron serbi de’it Na’i Maromak, la han la hemu, no harohan nafatin. Iha oras nebá, nia mai hodi fó agradece ba Na’i no ko’alia kona ba Labarik ne’e ba sira hotu nebé hein maksoyn Jerusalém nian.

Halo tuir tiha ona buat hotu nebé Na’i nia ukunfuan haruka, sira fila fali ba Galileia, ba sira nia cidade iha Nazaré.

Labarik oan mós sai boot ba daudaun no maka’as liu tan, nakonu ho matenek, no Maromak nia graça hela hamutuk ho Nia.

Lia Maksoyn.

Leave a Reply

Your email address will not be published. Required fields are marked *