shadow
Diocese de Dili > NOTÍCIAS > LETURA DIÁRIA > Quarta – Feira, I Semana Tempo Comum (ANO A)

Quarta – Feira, I Semana Tempo Comum (ANO A)

Primeira Leitura          1Sm. 3. 1-10, 19-20

Lia housi primeiro livro Samuel nian:

Iha loron hirak nebá, foin-sa’e Samuel serbí hela Na’i. Sacerdote Eli tau hela matan ba nia. Iha oras ne’e, Na’i nia lian rona dala ruma no haré dala ida dala ida. Loron ida, Eli toba hela iha nia fatin; nia matan malahuk daudaun ona, la bele haré ona. Áhi-oan Maromak Nian seidauk hamate; Samuel toba hela iha Na’i nia kadunan, iha nebé iha hela Maromak Nia Arca. Nune’e, Na’i bolu Samuel. Samuel hatan: “Ha’u mak ne’e”. Samuel  halai ba hasouru Eli, dehan: “Ha’u mak ne’e, tan ita bolu ha’u”. Maibé, Eli hatan ba nia: “Ha’u la bolu ó. Fila ba toba”. Nia fila ba toba. Na’i bolu hikas fali nia: “Samuel”. Samuel hader, ba hasouru Eli dehan: “Ha’u mak ne’e, tan ita bolu ha’u”. Eli hatan ba nia: “Ha’u oan, ha’u la bolu ó. Fila ba toba”. Samuel seidauk hatene Na’i, seidauk hatene mós Nia liafuan. Na’i bolu Samuel ba dala tolu. Nia hader hodi ba hasouru Eli, dehan: “Ha’u mak ne’e, tan ita bolu ha’u”. Nune’e, Eli hatene ona katak Na’i mak bolu foin-sa’e ne’e. Eli dehan ba Samuel: “Ó ba toba; bolu ó karik, ó sei dehan: ‘Na’i, ko’alia ba, Ita atan rona’”. Samuel fila, hodi ba toba iha nia fatin. Nune’e, Na’i mai hodi hakbesik-An ba nia, bolu nia hanesan dala hirak be uluk: “Samuel, Samuel”. Nia hatan: “Na’i, ko’alia ba, Ita atan rona”. Samuel sai boot ba daudaun. Na’i hamutuk ho nia no la husik liafuan ida housi nia monu ba rai. Povo tomak Israel nian, housi Dan to’o Bersabeia, hatene lolós Samuel nu’udar Na’i nia profeta.

Maromak Futar Lia.

 

Salmo Responsorial                                                                                         Sal. 39(40). 2 e 5, 7-8a, 8b-9, 10-11 (R. cf. 8ª e 9ª)

Refrão : Na’i, ha’u mai atu halo tuir Ita hakaran!!! Repete-se

Ha’u bolu Na’i ho laran metin,

Nia sée tilun mai ha’u hodi rona ha’u.

Nia tau iha ha’u ibun knananuk foun ida,

Knananuk ida atu hahí ita Maromak. Refrão

 

Itaboot la kohi sacrifício no buat karan,

Maibé loke ha’u tilun atu rona.

Ita la husu buat-karan eh na’an maten;

Tan ne’e ha’u dehan: “Ha’u mak ne’e!”. Refrão

 

Iha Livro Lei nian, hakerek nanis ona,

Sáida ha’u atu halo tuir.

Ida ne’e mak ha’u hakarak, ha’u Maromak,

Ita ukunfuan hela iha ha’u fuan laran. Refrão

 

Ha’u sei haklaken Ita justiça ba ema lubun boot;

Na’i, Ita hatene katak ha’u la taka ha’u ibun.

Ha’u la subar Ita Na justiça iha ha’u fuan okos;

Ha’u haklaken Ita Nia fidelidade no maksoyn. Refrão

 

Aclamação                                                                                                                                                                                           Jo. 10. 27

Refrão : Aleluia, Aleluia!! Repete-se       

Ha’u Nia bibi sira rona Ha’u lian, Na’i lia tun;

Ha’u hatene sira, sira mai tuir Ha’u. Refrão

 

Evangelho                                                                                                                                                                                      Mc. 1. 29-39

Na’i Jesus Cristo nia Evangelho nu’udar São Marcos haktuir:

Iha tempo nebá, Jesus sai housi sinagoga hamutuk ho Tiago no João; sira ba Simão ho Adré sira uman. Simão nia banin feto moras isin manas, toba hela.

Sira fó hatene ba Jesus, nebé besik ba nia, káer nia liman, halo nia hamriik. Isin manas husik kedas nia, nia hahu fó han sira.

Loraik, loron monu liu tiha, ema hahu lori ba to’o Nia, moras sira hotu no sira hotu be diabo tama laran, ema cidade tomak mai halibur-an hamutuk iha odamatan. Jesus fó isin di’ak ba ema barak nebé terus moras oi-oin, hodi duni sai diabo barak. Maibé, Nia la husik diabo sira ko’alia, basá, sira hatene Nia sé.

Dadersan nakukun, Nia hamriik, sai ba fatin fuik ida hodi hahu harohan. Simão ho nia maluk sira buka tuir, to’o hetan tiha Nia, sira dehan: “Ema hotu buka Ita!”. Maibé, Nia hatan ba sira: “Ita ba knua sira iha sorin balu ba, atu Ha’u hanourin mós iha nebá, basá, tan ne’e mak Ha’u mai”. Nia ba iha rai Galileia tomak, hanourin iha sinagoga sira no duni sai demónio sira.

Lia Maksoyn.

Leave a Reply

Your email address will not be published. Required fields are marked *