shadow
Diocese de Dili > NOTÍCIAS > LETURA DIÁRIA > Terça – Feira, I Semana Tempo Comum (ANO A)

Terça – Feira, I Semana Tempo Comum (ANO A)

Primeira Leitura                   1Sm. 1. 9-20

Lia housi primeiro livro Samuel nian:

Iha loron hirak nebá, wainhira iha Silo, han no hemu hotu tiha, Ana hamriik, hodi ba hatudu-an iha Na’i nia futar oin. Na’ilulik Eli tur hela iha nia banku, iha odamatan oin, iha Na’i nia fatin Santo. Ho laran susar tebes, hodi tanis wa’in, Ana harohan ba Na’i nune’e: “Na’i Lalehan no Rai nian, ho laran di’ak Ita simu karik ba Ita atan nia susar; hanoin Ita atan ha’u, keta haluha Ita atan, maibé haraik oan mane ida ba nia; ha’u sei hasa’e nia ba Na’i iha moris tomak no tudik sei la liu housi nia ulun”.

Tan nia harohan kleur iha Na’i nia oin, Eli hahu fihir nia ibun. Ana ko’alia ba nia-an rasik, nia ibun de’it mak book-an, maibé, la rona nia lian; Eli hanoin katak nia lanu. Nune’e, Eli dehan ba nia: “Ó sei lanu to’o wainhira? Ó husik tiha tua ne’e”. Maibé, Ana hatan ba nia: “Lae, ha’u na’i, ha’u feto susar na’in ida. Ha’u la hemu tua no la hemu mós tua nebé halo lanu ema; ha’u atu hato’o de’it ha’u nia laran susar iha Na’i Nia Futar Oin. Keta hanoin ó atan hanesan feto seluk ida, basá, ha’u laran susar liu tebes mak lori ha’u atu ko’alia to’o oras ne’e”. Nune’e, Eli hatan ba nia: “Ba ho damen, Israel nia Maromak sei haraik ba ó, buat nebé ó husu ba Nia”. Ana dehan fali ba nia: “Di’ak, ó atan bele hetan di’ak housi ó nia hakaran”. Tuir mai, feto la’o tuir nia dalan, han no hemu hamutuk ho nia la’en, la hanesan ona uluk.

Dader nakukun sira hamriik hodi ba hakneak iha Na’i futar oin; hafoin, sira tuir sira dalan hodi fila ba sira uman iha Ramá. Elcana moris hamutuk ho nia féen Ana, Na’i hanoin hetan nia. Tempo liu daudaun, Ana kô’us duni no hahoris oan mane ida, nebé hanaran Samuel, basá, dehan: “Ha’u mak husu ba Na’i”.

Maromak Futar Lia.

 

Salmo Responsorial                                                                                                                           1Sam. 2. 1, 4-5, 6-7, 8abcd (R. 1ª)

Refrão : Ha’u fuan haksolok iha Na’i, ha’u Makoyn!!! Repete-se

Ha’u fuan haksolok iha Na’i,

Ha’u nia kbiit iha Na’i Maromak.

Loke ha’u ibun hodi sadik funu baluk sira,

Ha’u haksolok tan Ita Maromak tulun. Refrão

 

Ema kbiit sira nia kroat toha lakon,

Ema kbiit laek sira sei hetan kbiit foun.

Sira be iha sasan wa’in, buka aihan,

Sira be hamlaha, bosu fali.

Feto be la kô’us, hetan oan barak;

Inan be kô’us, la hetan tan oan. Refrão

 

Na’i mak haraik moris no mate,

Na’i mak lori ita ba rate no hasai ita housi rate;

Na’i mak halo ita kiak no halo ita riku;

Nia mak hatun ema sira no mós foti sira. Refrão

 

Nia foti housi rai sira be moris hakru’uk,

Hasai ema kiak sira housi asuknu’uk fatin.

Halo sira tur ho boot sira rai nian,

Haraik ba sira fatin ida oin na’in. Refrão

 

Aclamação                                                                                                                                                                                         1Tes. 2. 13

Refrão : Aleluia, Aleluia!! Repete-se       

Simu ba ho laran tomak lia menon nebé Na’i hato’o ba imi;

La’os hanesan ema nia liafuan, maibé, nu’udar Maromak Futar Liafuan. Refrão

 

Evangelho                                                                                                                                                                                       Mc. 1. 21-28

Na’i Jesus Cristo nia Evangelho nu’udar São Marcos haktuir:

Iha tempo nebá, Jesus hela iha cidade Cafarnaum. Iha loron sábado ida, Nia tama iha sinagoga, hahu hanourin. Ema hotu hakfodak ho nia doutrina, basá, nia hanourin hanesan ema nebé iha autoridade, la’os hanesan ema escriba.

La kleur mosu iha sinagoga, mane ida diabo iha laran, nebé dehan ho lian maka’as: Ó hakarak sáida ho ami, Jesus Nazaré nian? Ó mai atu halakon ami? Ha’u hateten Ó sé: Maromak Nia santo!” Jesus lia tun ba nia ho siak: “Nonok, sai housi ema ne’e”. Diabo doko maka’as tiha ema ne’e, hakilar maka’as, hodi sai tiha housi ema ne’e. Ema hotu hakfodak teb-tebes hodi husu ba malu: “Ne’e sáida mak ne’e? Doutrina foun ida ho autoridade! Nia haruka mós diabo sira, sira halo tuir nia haruka!” Jesus nia naran boot lalais kedas iha fatin hotu, iha Galileia tomak.

Lia Maksoyn.

Leave a Reply

Your email address will not be published. Required fields are marked *