shadow
Diocese de Dili > NOTÍCIAS > REFLEXÃO > PESCADOR vs PISCADOR

PESCADOR vs PISCADOR

Wainhira ita assume knaar ida, knaar nee (exige) responponsabilidade (Tanggung Jawab). Laos privilégio hodi atinge interece pessoal, família, grupo ou Partido. Iha história mundial hanorin ona lição lobuk ida mai ita nudar ema. Entre figura rihun ba rihun nebé assume knaar iha qualquer cargo estado, ema oitoan deit mak consegue exerce função nee ho sucesso no doko mundo tanba sira consciente katak knaar nee Responsabilidade ida. Barak mout haksumik iha história tanba hetan tiha knaar, haluha tiha responsabilidade hodi halao serviço nebé pertence ba ninia knaar (The Wrong Man in the Right Place).

Iha contexto Igreja Católica, sarani ida nebe simu ona we baptismo hetan knaar no responsabilidade hodi moris tuir doutrina/mandamento Maromak nian nebé, profeta sira hatoo no hetan ninia plenitude iha Jesus Cristo nia personalidade. Iha relato Evangelho, Jesus fo knaar ba Pedro ho nia maluk sira hodi sai pescador ema nian. Nee significa katak; sira hetan knaar hodi haklaken Reino Lalehan.

Iha contexto sarani Timor Leste nian, Jesus bolu nafatin ita hodi sai pescadorba ema hotu liu husi nia responsabilidade ba knaar sira, hatudu exemplo moris sarani, sai ukun nain nebe luta ba prosperidade povo nian, sai gestor ba instituição nebé, serviço ba atendimento público, sai religioso/a hodi fo sasin kona ba santidade, sai membro comunidade nebé hatene exige direito ao mesmo tempo hatene exerce dever nudar cidadão iha sociedade.

Laos sai fali PISCADOR hodi pisca ema nia laen kaben eh fen kaben, laos hodi pisca fali mak cargo político, laos atu pisca fali mak percen husi projecto sira estado nian, laos pisca fali mak partidário hodi hetan cargo, laos pisca fali mak ema boot partido sira hodi hetan cargo ministro, laos pisca fali mak ema estrangeiro hodi hetan persen wainhira facilita ema estrangeiro hetan cartão eleitoral. Sai sarani lolos precisa moris los tuir Maromak nia ukun fuan hodi hatene servi tuir pescador diak nebe Jesus deseja.

Iha Evangelho Mateus 4, 12-23 ba Domingo semana nee, relata kona ba Jesus nia lalaok rua molok hahau Nia missão ba emar sira iha tempo neba. Lalaok primeiro mak; Conhece lai situação terreno no lalaok segundo mak bolu eh convida eam balu atu sai companheiro.

Jesus nia presença  certamente ema conhece ona iha região Judeia, liliu iha área sira besik Jerusalém. Wainhira situação política ladun seguro, Jesus hasees-na ba região Galileia iha parte norte liliu iha cidade nia boot fatin; Nazaré. Tuir mai Jesus muda fali tan ba cafarnaun iha parte tasi ibun nian (vers. 12-14). Hahu husi Cafarnaun mak Jesus hahu exerce Ninia missão salvífica kona ba Reino Lalehan (vers. 15). Jesus mos bolu Ninia escolante sira ba dala uluk hanesan Simão Pedro no nia maun alin sira hanesan; André hafoin tuir mai bolu mos Zebedeu nai oan  sira;Tiago nia alin João(vers. 18-22).

Le tiha relato Mateus nian iha Evangelho Domingo semana nee kona ba oinsa Jesus hahu concretiza Ninia missão. Ita bele hamosu pergunta ida nunee; Jesus nee figura oinsa nian? Por coincidência, ita bele considera Jesus hanesan ema nebe hatene le sinal tempo nian eh mudança iha sociedade hafoin actua ho néon matenek (prudente). Jesus tuir los iha possibilidade boot hodi realiza Ninia missão basá, povo iha área neba hamrook tebes ba assunto espiritual. Provas mak; sira balu ba deserto hodi buka João Baptista hodi simu Baptismo (moris foun) eh moris hakmatek. Wainhira ema barak lalin-na ba buka João Baptista, Herodes sente la hakmatek tan nia sente ameaçado ho movimento nee. Herodes hanoin João atu halo revolta, tanba nee mak iha relato Evangelho seluk ita rona katak tan deit problema herodiades (Mat 11, 2-11), Herodes kaer João Baptista hatama ba prisão.

Tanba situação ida nee mak Jesus mos la foti risco hodi hasees-na ba haklaken fali iha parte norte hanesan Samaria ho Cafarnaun (Mat 4,12). Iha visão Bíblia nia, lia fuan hasees-na nebe Jesus hili, contem significado boot tebes katak hadook-na husi perigo eh hadook-na husi entidade sira nebe la simu Jesus nia presença.

 Do que Jesus hetan perigo iha rai Judeia, diak liu Jesus prefere hasees-am ba parte Norte. Durante tempo naruk, Parte Judeia ho região parte Norte hanesan Samaria hare malu matan la mos tanba Judea considera parte norte contaminado ona ho doutrina gentio sira nian. Maibé iha realidade, região norte moris economia diak liu, rai buras no ema mesak rico tanba sira nakloke ba comércio livre. Eam husi região norte néon nakloke liu hodi simu Jesus nia presença do que povo iha parte Judeia. Tan condição ida nee mak ema barak husi Judeia mos muda fali ba parte Norte hodi bele hetan moris diak.

Situação política-religiosa iha parte Jerusalém hamosu tensão política bebeik tanba nee mak iha relato São Lucas nian, haktuir katak Jesus passa tempo barak hodi haklaken iha parte Norte nebe ema nia horizonte fiar no matenek nakloke ba novidade nebe Jesus lori. Povo iha Cafarnaun wainhira rona Jesus nia doutrina sira, sira sempre conta ba malu hodi partilha novidade ida nee. Sira la passivo hodi rona hafoin haluha fali maibé, sira troca idea no simu hafoin moris tuir buat nebe Jesus hatete. Maske iha ocasião balu ema la simu Jesus nia presença maibé, maior parte ema hakarak rona no buka tuir Jesus iha fatin hothotu.

Cafarnaun nudar centro comércio ikan nian, situada los iha parte litoral nebe halo ema barak libur malu hodi halo negócio ikan. Iha altura neba, ema nebe pesca ikan, sira mos tama iha categoria ema riku nian. Além de Cafarnaun, fatin seluk hanesan Betsaida, Magdala no Litoral Genesaret tasi Tiberíade nia ninin mos halibur ema barak no iha duni fatin sira nee mak Jesus aproveita pescador sira nia ro hodi b amai haklaken Reino Lalehan. Figura hanesan Zebedeu ho nia oan Tiago no João, inclui mos Simão Pedro ho nia alin André nudar pescador ao mesmo tempo distribuidor ikan nebe sucesso iha moris economia. Hare tiha sira nia lalaok moris nudar ema nebe serviço nain, ikus mai Jesus bolu sira hodi sai Ninia apóstolo. Jesus Laos bolu sira tanba sira riku osan maibé, bolu tanba fiar katak nudar pescador serviço nain, ema sira pronto ona atu contribui ba Maromak nia Reino.  Ohin loron ema riku balu sente Maromak la importante ba sira; osan mak importante liu no sira precisa Maromak wainhira tama ona iha kaisaun laran.

Ba lalaok ema sira ohin loron nian mak durante tempo Advento too Natal, leitura Evangelho sira sempre haroman ita nia fiar hodi dehan katak: Jesus mak naroman los nebe mai haroman ema sira be moris iha nakukun laran. Jesus nudar Maromak, Nia hatene se mak precisa Maromak no se se mak la precisa Maromak iha moris nee.

Nudar relata iha Evangelho katak Jesus husik hela rai Nazaré, hodi ba hotik iha Cafarnaum nebe besik tasi ibun hodi haklaken, no iha fatin hirak nee mak nia bolu Niniaa escolante sira hodi sai companheiro Jesus nian. Evangelista Mateus hare figura Jesus nudar naroman nebe atu mai. Ao passo que Evangelista João utiliza versão nee hodi identifica Jesus nudar ida nebe Maromak promete atum ai iha mundo.

Maske ema nia perspectiva oioin kona ba Jesus maibé, nudar fiar nain, ita hare Jesus nudar Maromak nebe haroman mundo ho nia presença rasik. Iha Maromak nia futar oin mak ema bele hare oinsa Maromak nia glória nia beran. Roman Maromak nian halakon nakukun nia poder iha ema nia fuan. Jesus rasik dehan: ema nebe hare Hau, nia hare Aman Maromak. Tanba nee mai iha Evangelho Domingo semana nee, Jesus dehan hakribi imi salan ba, basa Reino Maromak too ona mai.

Oinsa roman nee bele too ema barak? Iha tempo uluk Jesus bolu companheiro nain 12 deit maibé, ikus nee, we baptismo halo Cristão Católico tomak sai apóstolo ba ema seluk hahu husi ida idak nia-an rasik too família no sociedade. Assi Seja e Bem Haja (Ignas Lopes)

Leave a Reply

Your email address will not be published. Required fields are marked *