shadow
Diocese de Dili > NOTÍCIAS > REFLEXÃO > IMI HAKRIBI IMI SALAN BA BASA MAROMAK NINIA REINO BESIK ONA

IMI HAKRIBI IMI SALAN BA BASA MAROMAK NINIA REINO BESIK ONA

Maun alin doben sira Nai Jesus ohin lia tun mai ita dehan “IMI HAKRIBI IMI SALAN BA BASA MAROMAK NINIA REINO BESIK ONA”. Jesus husu ita prepara ita an atu Na’i Maromak ninia Reino wainhira to’o mai ita ita hotu pronto ona hodi simu Maromak ninia reino no la lakon Maromak ninia reino ne’e.

Primeira leitura no Evangelho leitura fo hanoin mai ita katak Na’i Maromak ninia Reino ne’e mosu mai sai nudar roman boot ida. Roman ida nebe lakan atu hodi fo ksolok ba ema sira nebe lao hela iha nakukun laran. Leitura sira ne’e tulun ita refelete realidade nakukun nian balun nebe ita hasoru iha moris hanesan; terus, susar, buat todan, hamlaha, no seluk seluk tan nudar. Naroman be lakan ne’e atu soi ita ema sira husi ita ninia ralidade nakukun nian sira ne’e. Naroman ne’e lakan mai atu halibur ema hotu sai ida deit nudar Maromak ninia povo, atu halakon lia fahe malu nian iha ita le’et, atu halakon lia la tuir malu nian, basa roman nee ninia kbiit mak halakon nakukun no halibur hamutuk sira nebe fahe malu.

Evangelho fo tada momos mai ita hodi halo ita comprende diak tebes katak ROMAN BE MOSU ne’e mak Jesus Cristo. Jesus Cristo nebe depois de simu tiha batismo iha mota Jordão hahu halao ninia missão haklaken Maromak ninia domin no fo perdão ba salan sira no halo diak hodi soi ema no rai klaran tomak. Na’i Jesus Cristo ninia hanorin sira mak sai roman ba ema no mundo ninia moris, tamba ne’e ema hotu nebe mak rona hodi lao tuir Jesus Cristo ninia hanorin sira ema sira nee laos ona nakukun ninia oan sira, maibe sira naroman ninia oan ona basa Maromak ninia Reino iha Cristo Jesus to’o ona ba sira, halakon ona nakukun. Cristo mai atu halibur ema hotu hamutuk sai ida deit nudar Maromak ninia povo liu husi ninia terus, mate no moris hias. Cristo mak sai centro, sai we matan no sai roman ba ita ninia moris. Tamba nee mak São Paulo iha segunda leitura husu ita atu tau Cristo mak uluk liu iha ita leet, laos atu tau ita nini-an mak uluk liu, basa wainhira tau ita sira ninia-an mak centro no uluk liu ita sei fahe malu, maibe la fahe malu wainhira Cristo mak sai centro no uluk liu iha ita ninia moris. Los duni dala barak tebes ita fahe malu tamba ita lao ses husi Cristo, tamba ita ninia atenção laos ba iha Cristo nune,e ita dehan hau mak halo, ida neba mak la halo, sira nee mak halo, sira neba mak la halo barak, hau hamutuk ho grupo ou partido ou chefe ida nee, imi la hola parte iha ami, imi ida neba nian, ami Creda ida nee nian, imi Creda neba nian, no seluk-seluk tan. Hodi halo nune’e automaticamente ita fahe malu, no sei fahe malu nafatin, hodi halo nune’e ita konta liu mak buat sira nebe ita halo hodi haluhan tiha providência divina ka buat sira nebe Maromak halo mai ita no tamba ita ba ita hotu ninia diak no ita hotu ninia unidade ho Maromak ne’e, nebe katak Maromak ninia Reino horik iha ita.

Maun alin doben sira condição dahuluk liu atu ita bele hola parte iha Nai Maromak ninia reino ne’e mak “HAKRIBI ITA NIA SALAN SIRA”. Nune’e mak wainhira hahu ninia missão Cristo dehan “HAKRIBIT IMI SALAN, BASA NA’I MAROMAK NINIA REINO BESIK ONA”. Hakbribi salan hodi fiar iha Jesus Cristo, hakribi salan hodi fo laran ba malu, hakribi salan hodi la fahe malu tan, hakribi salan hodi moris hamutuk sai ida deit, nudar familia ida deit, Maromak ninia familia be hatudu iha Cristo ninia Creda.

Doben maun alin sira mai ita hamutuk halao moris ida nune’e duni nudar missão ida ita sarani hotu nian, no nudar sasin moris ita ninia moris sarani nian. Amen.

 

Domingo Comum III, Tinan A (2020)

Capela São Sebastião Bidau Mota Klaran

Pb.

Leave a Reply

Your email address will not be published. Required fields are marked *