shadow
Diocese de Dili > NOTÍCIAS > LETURA DIÁRIA > Terça-Feira, III Semana iha Tempo Comum (ANO A)

Terça-Feira, III Semana iha Tempo Comum (ANO A)

Primeira Leitura           2Sm. 6. 12b-15, 17-19

Lia housi segundo livro Samuel  nian:

Iha loron hirak nebá, David ba lori arca Maromak nian housi uma-kain Obed-Edom nian, mai ho ksolok wa’in ba “Cidade David nian”. Wainhira ema sira be lori Na’i nia arca hakat ba dala neen, nu’udar sacrifício nian hasa’e karau vaka ida no bibi-malae bokur ida. David, ho hatais linho nian ida iha knotak dansa maka’as lós iha Na’i nia oin. Nia, ho uma-kain tomak Israel nian tau matan ba Na’i nia arca ho hananu ksolok nian tuir trombeta nia lian. Wainhira sira hatama Na’i nia arca, sira lori ba hatur iha fatin rasik iha tenda nia klaran nebé David haruka harí ba Nia. Hafoin, David hasa’e buat-karan no sacrifício dame nian iha Na’i nia oin. Wainhira hasa’e tiha hotu buat karan no sacrifício dame nian fó bensa ba povo hodi Na’i be Lalehan no Rai tomak nia naran. Hafoin, haruka fahe ba povo tomak, ba ema lubun boot Israel nian, mane no feto sira, pão fuan ida, na’an baluk ida no dosi uvas nian ida ba ema ida-idak. No povo tomak ida-idak fila ba sira nia uma.

Maromak Futar Lia.

 

Salmo Responsorial                                                                                                                           Sal. 23(24). 7, 8, 9, 10 (R. cf. 8ª)

Refrão : Na’i mak Liurai glória nian!!! Repete-se

Loke imi an ba, odamatan sira,

Harí an ba imi, odamatan boot sira uluk nian;

Liurai glória nian atu tama daudaun ona. Refrão

 

Sé mak Liurai glória nian?

Na’i kbiit na’in no bele hot-hotu,

Na’i asuwa’in boot liu hot-hotu. Refrão

 

Loke imi an ba, odamatan sira,

Harí an ba imi, odamatan boot sira uluk nian;

Liurai glória nian atu tama daudaun ona. Refrão

 

Sé mak Liurai glória nian?

Na’i klibur funu-na’in nian,

Nia mak Liurai glória nian. Refrão

 

Aclamação                                                                                                                                                                                           Mt. 11. 25

Refrão : Aleluia, Aleluia!! Repete-se       

Rahun di’ak ba Ita, Aman, Na’i Lalehan no Rai nian, tan

Ita hatudu mistério reino Lalehan nian ba kiik sira. Refrão

 

Evangelho                                                                                                                                                                                      Mc. 3. 31-35

Na’i Jesus Cristo nia Evangelho nu’udar São Marcos haktuir:

Iha tempo nebá, to’o iha uma nebé Jesus hela ba, Jesus nian inan no nia maun-alin sira. Sira hela de’it iha liur hodi haruka bolu nia. Ema lubun boot tur hela hale’u nia wainhira sira ba nia: Ó nia Inan no mau-alin sira hela iha liur hodi buka Ó”. Maibé, Jesus hatan ba sira: “Sé mak Ha’u nia Inan no Ha’u nia maun-alin sira?” Hateke ba sira hotu nebé tur hale’u nia hodi dehan: “Sira ne’e mak Ha’u nia inan no Ha’u nia maun-alin sira. Ema nebé halo tuir Maromak Nia hakaran, ema ne’e mak Ha’u nia maun-alin, Ha’u nia bin-feton no Ha’u nia inan”.

Lia Maksoyn.

Leave a Reply

Your email address will not be published. Required fields are marked *