shadow
Diocese de Dili > NOTÍCIAS > LETURA DIÁRIA > IV Domingo Tempo Comum (ANO A) APRESENTAÇÃO DO SENHOR

IV Domingo Tempo Comum (ANO A) APRESENTAÇÃO DO SENHOR

Primeira Leitura                          Mal. 3. 1-4

Lia housi Profecia Malaquias nian:

Maun alin sira: Na’i Maromak futar-lia tun nune’e: “Ha’u sei haruka Ha’u nia manu-ain atu loke dalan iha Ha”u oin. Na”i nebé imi buka hela teki-tekir sei tama iha Nia templo no anjo aliança nian nebé imi hakarak tebes. Nia mak mai daudaun ne’e, Na’i, mundo rai-kalaran nian mak dehan. Maibé, sé lós bele tahan to’o loron nebé Na’i hi it- an mai? Sé lós bele hamriik metin wa’inhira Na’i mosu mai? Nia hanesan ahi nebé ema hodi halo uen bessi, hanesan lixívia (aimoruk hodi hamós nóda) nebé hodi fase roupa nian. Nia sei mai tur nu’udar badaen nebé halo besi nabén no ida nebé atu fase mós. Nia sei hamos Levi oan sira hanesan hamos osa mean no osa mutin. Iha oras ne’e mak sira bele hasa’e sira nia buat-karan ba Na’i. Nune’e, Judá no Jerusalém nia buat-karan sei fó ksolok tebes ba Na’i hanesan fali tempo uluk nian, hanesan fali iha tinan hirak nebé liu ona.

Maromak Futar Lia.

 

Salmo Responsorial                                                                                                                               Sal. 23(24). 7, 8, 9, 10 (R. 10b)

Refrão : Na’i mundo rai-klaran mak Liurai glória nian!!! Repete-se

Odamatan sira, foti imi liras ba,

odamatan sira uluk nian, haboot imi-an ba,

Liurai glória nian sei tama mai. Refrão

 

Sé mak Liurai glória nian ne’e?

Na’i biit Na’in no bele hotu,

Na’i asua’in iha funu. Refrão

 

Odamatan sira, foti imi liras ba,

odamatan sira uluk nian, habo’ot imi-an ba,

Liurai glória nian sei tama mai. Refrão

 

Sé mak Liurai glória nian ne’e?

Na’i biit Na’in no bele hotu,

Na’i asua’in iha funu. Refrão

 

Segunda Leitura                                                                                                                                                                        Heb. 2. 14-18

Lia housi São Paulo nia Surat ba Hebreu sira:

Maun alin sira: Nu’udar oan sira simu ran no isin housi aman sira, nune’e mós Cristo simu ne’e hotu hanesan sira, atu nune’e hodi Nia mate, sobu rahun tiha diabo nia biit, hodi hasai fali sira nebé iha hela diabo nia ukun. Tebes, Cristo mai la’os atu soi anjo sira, maibé, atu soi Abraão nia bei-oan sira, Tanba ne’e, mak Cristo tenki sai lolós hanesan nia maun-alin sira, atu Nia, iha Maromak futar oin, sai nu’udar Na’ilulik boot laran-luak tebes, nebé bele selu povo hot-hotu nia salan. Tanba Nia rasik hakarak terus no liu housi tentação, atu nune’e Nia bele tulun sira nebé hetan tentação.

Maromak Futar Lia.

 

Aclamação                                                                                                                                                                                             Lc. 2. 32

Refrão : Aleluia, Aleluia!! Repete-se

Naroman atu leno nação sira no glória

Ita povo Israel nian. Refrão

 

Evangelho

Forma longa : (alinea rua ne’e hotu)                                                                                                                                    Lc 2. 22-40

Forma breve : (Le de’it iha » « nia leet)                                                                                                                               Lc. 2. 22-32

Na’i Jesus Cristo nia Evangelho nu’udar São Lucas haktuir:

» To’o tiha loron hamos-an nian. tuir Moises nia ukunfuan, Maria no José lori Jesus ba Jerusalém atu saran Nia ba Na’i, nu’udar hakerek iha Na’i nia ukunfuan, katak “Oan mane boot ida-idak sei hassae ba Na’i”. no mós atu hasa’e, nu’udar buat-karan. manu falur rua eh manu pombu oan rua, nu’udar Na’i nia ukunfuan haruka. Ema ida naran Simeão hôrik iha Jerusalém. Nia ema lós nebé hamta’uk Maromak hodi hein Israel nia ksolok. no Espirito Santo hôrik ho nia. Nia simu lia housi Espirito Santo katak nia sei la mate molok nia haré Na’i nia Cristo. Espírito lori nia ba templo. Wainhira Jesus nia aman no inan lori Kosok Oan Jesus atu halo tuir ukunfuan sira, nia simu Kosok Oan ne’e iha nia liman. hahí Maromak dehan: “Na’i, oras ne’e Itaboot husik ona Ita atan ba iha dame, tuir Ita nia liafuan. basá ha”u nia matan haré ona Ita nia maksoin nebé Itaboot hadi’a ba povo hot-hotu nia oin: naroman atu leno gentio sira no povo Israel nia glória”. «

Kosok Oan nia aman no inan hakfodak ho buat nebé nia dehan kona ba Nia. Simeão fó bensa ba sira. Hodi dehan bania inan Maria: “Haré ba. Labarik ne’e mosu mai atu hatun no foti ema barak iha Israel, no mós atu sai sinal lia la tuir malu nian, no surik ida sei sona borus ita nia fuan atu fó sai buat nebé ema barak hanoin iha sira nia laran” Iha mós feto duina ida, naran Ana, Fanuel housi suku Aser nia oan. Nia otas boot ona. Liu tiha nia tempo fetora nian, nia moris ho nia la’en ba tinan hitu; hafoin nia moris nu’udar feto faluk to’o tinan ualu nulu resin háat. Nia la husik templo, maibé serbi Maromak kalan loron, hodi halo jejum no hamulak. Iha oras nebá, nia mai hodi fó agradece ba Na’i no ko’alia kona ba Labarik ne’e ba sira hotu nebé hein libertação Jerusalém nian. Halo tuir tiha buat hotu nebé Na’i nia ukunfuan haruka, sira fila fali ba Galileia, ba sira nia cidade iha Nazaré. Labarik oan sai boot ba daudaun no maka’as liu tan, nakonu ho matenek, no Maromak nia graça hela hamutuk ho Nia.

Lia Maksoyn.

Leave a Reply

Your email address will not be published. Required fields are marked *