shadow
Diocese de Dili > NOTÍCIAS > LETURA DIÁRIA > Sabado, III Semana iha Tempo Comum (ANO A)

Sabado, III Semana iha Tempo Comum (ANO A)

Primeira Leitura       2Sm. 12. 1-7ª, 10-17

Lia housi segundo livro Samuel nian:

Iha loron hirak nebá, Na’i haruka profeta Natã ba David. Profeta ba hasoru nia hodi dehan: “ iha cidade ida, hela ema na’in rua; ida riku no ida seluk kiak. Ida be riku iha bibi-malae ho karau vaka wa’in liu. Ida be kiak iha de’it bibi-malae kiik ida nebé nia sosa. Nia haré hodi trata didiak bibi oan ne’e; bibi oan ne’e boot ba daudaun iha nia sorin no nia oan sira sorin. Bibi oan ne’e han aihan nebé nia han, hemu wé iha kopu, toba iha nia hitin leten, hanesan lós nia oan feto. Iha loron ida, bainaka ida to’o iha ema riku ne’e nia uma, maibé nia lakohi hasai nia bibi ida atu oho hodi tein hahan ba bainaka be mai ne’e. Ema riku ne’e ba ka’er tiha ida be kiak ne’e nia bibi, oho tiha hodi haruka tein hahan ba nia bainaka”.

David laran nakali teb-tebes hasouru ema ne’e dehan ba Natã: “hodi Na’I be moris, ema ida be halo ida ne’e, merese mate. Nia sei selu bibi ne’e liu dala háat, basá, wainhira nia halo nune’e nia la hanoin netik nia maluk”. Nune’e, Natã hatan ba David: “ema ne’e mak ó; ne’e duni, Na’i be Maromak Israel nian, dehan: oras ne’e, surik sei la hadook tan housi ó uman, tan ó fila kotuk mai ha’u, hodi hola Urias nia feen, ema hitita nian hodi halo nia nu’udar ó nia féen.

Na’i dehan nune’e: ‘Ha’u sei halo atu susar sai housi ó nia uma-kain rasik hasouru ó. Ha’u sei káer ó nia féen sira iha ó nia oin rasik, fó sira ba ema seluk, hodi moris ho sira iha loron nia naroman. Ó halo subar, maibé, ha’u sei halo buat hirak ne’e iha Israel tomak nia oin no iha naroman loron nian’.

David dehan ba Natã: “Ha’u halo sala hasouru na’i”. Nune’e, Natã hatan ba nia: “Na’i mos perdua ó nia salan: ó sei la mate! Basá, ó fila kotuk ba Na’i tan sala nebé ó halo, oan nebé moris ona housi ó sei mate”. Natã fila ba nia uma.

Na’i hakanek tiha oan nebé Urias nia féen ko’us ba David, no nia moras todan tiha. David, tan oan ne’e, harohan ba Na’i; la han la hemu buat ida, fila ba uma, kalan tomak toba de’it iha rai. Sira be katuas liu, hela iha nia uma, husu hodi hamaus nia atu hamriik tiha. Maibé, David lakohi halo tuir sira nia liafuan, la hakarak han hamutuk ho sira.

Maromak Futar Lia.

 

Salmo Responsorial                                                                                                               Sal. 50(51). 12-13, 14-15, 16-17 (R. 12ª)

Refrão : Na’i, haraik mai ha’u fuan mós ida!!! Repete-se

Maromak, haraik fuan mós ida mai ha’u,

Halo foun hikas biit ha’u klamar.

Keta soe ha’u ba dook housi ita futar oin;

Keta hadook ita espírito housi ha’u. Refrão

 

Haraik fali mai ha’u ksolok ita maksoin nian,

Fó biit ba ha’u hakaran di’ak.

Ha’u sei hanourin ita dalan ba sira be halo áat,

Maksalak sira sei fila ba ita. Refrão

 

Maromak, ha’u maksoi, soi ha’u housi susar,

Ha’u ibun sei haklaken ita laran di’ak.

Na’I, loke ha’u ibun ba,

Ha’u sei haklaken ita nia gloria. Refrão

 

Aclamação                                                                                                                                                                                             Jo. 3. 16

Refrão : Aleluia, Aleluia!! Repete-se

Maromak hadomi tebes mundo, nia fó nia oan-mane-mesak ba nia.

Ema hotu nebé fiar nia, hetan moris rohan laek. Refrão

 

Evangelho                                                                                                                                                                                      Mc. 4. 35-41

Na’i Jesus Cristo nia Evangelho nu’udar São Marcos haktuir:

Iha loron hirak nebá, tan loraik tiha ona, Jesus lia tun ba escolante sira: “ita haktuir liu tiha ba tasi sorin”. Sira husik hela ema lubun boot, lori de’it mak Jesus nebé iha ró laran. Ró sira seluk mós ba hamutuk ho nia. Tan anin boot, laloran baku maka’as ró, halo wé tama nakonu daudaun ró laran. Jesus iha ró ikun, toba hela iha sumasu. Sira fanu nia hodi dehan: “Mestre, la haré katak ita atu mate daudaun ona? Jesus hader tiha ho lian maka’as dehan ba anin no tasi: “ Nonok”! anin nonok, buat tomak hakmatek. Hafoin, nia lia tun ba sira: “ Tansá imi hakfodak hanesan ne’e? Nusá mak imi la fiar hanesan ne’e? Sira ta’uk teb-tebes hodi dehan ba malu: “Nia, sé ne’e? Anin no tasi mós halo tuir de’it nia!”.

Lia Maksoyn.

Leave a Reply

Your email address will not be published. Required fields are marked *