shadow
Diocese de Dili > NOTÍCIAS > REFLEXÃO > IMI MAK MASIN RAI NIAN! MAIBE MASIN LAKON KARIK NINIA MER, NIA HAMER AIHAN OINSA

IMI MAK MASIN RAI NIAN! MAIBE MASIN LAKON KARIK NINIA MER, NIA HAMER AIHAN OINSA

Maun alin sarani doben sira ita ema sarani sira ninia moris tuir fiar nebe ita iha, ita hatene katak la hotu deit iha rai ne’e ona maibe sei rohan laek. Ita hatene mos katak ita nia moris sai nune’e tamba Maromak be rohan laek nee haraik mai ita moris ida nune’e liu husi ninia oan Mane mesak Jesus Cristo nebe mai moris, lao hamutuk ho ita ema sira iha mundo nee, terus to’o mate no moris hias fial afali mak haraik hakonu ita nia moris mundo nian no haraik mai ita moris ida nebe rohan laek. Moris rohan laek nee hahau ona iha oras nee to’o moris iha Lalehan fatin moris rohan laek nian. Doben maun alin sira ne’e duni ita sei moris mak ba to’o rohan laek tamba fiar, laos mate mak sei rohan laek lae, mate sei rohan laek no hahu ona iha ita to’o rohan laek wainhira ita moris iha mundo nee lao dook no haketak an ona husi Maromak, la fiar ona iha Maromak maibe fiar fali deit iha ita ninia kbiit no sasan sira hanesan osan no material sira seluk nebe sai facilidade moris nian mai ita.

Leitura sira ohin nian hnorin no fo tada mai ita oinsa mak ita ema tem que halao moris nee hodi garante moris rohan laek nee nebe Cristo haraik ona mai ita nee permanente iha ita-an. Primeira leitura haktuir mai ita kona ba dalan moris ida nebe hatudu início ba moris rohan laek ne’e. Haktuir mai ita katak dalan moris ne’e iha moris mundo nee nian ita bele ona hahu. Hatudu concreto iha hahalok caridade ema sarani sira nian be Maromak rasik husu mai ita atu ita “labele han hemu karak maibe fahe aihan ho ema sira nebe hamlaha, comcerteza implica mos la estraga hahan sira, tau matan ba ema sira nebe laiha liu aihan ruma atu han netik iha loron ka kalan ida, fo uma ka halo fodik uma ba ema kiak sira nune’e sira bele hamahan-an no horik netik ba, fo hena ka hatais ba ema sira nebe lao luan ka laiha hena no hatais ruma atu taka netik ba sira an, la taka matan ba ema sira be percisa tulun. Hodi halo ida ne’e nafatin iha ita ninia moris, ita hatudu halo tuir Maromak ninia hakarak, ita lori Maromak ninia hakarak ba mos ema seluk, katak ema hotu hotu hetan moris no moris diak, hodi halo nune ita ninia justiça sai los iha Maromak futar oin, ita ninia moris sai roman ba ema seluk no ita harohan karik Maromak sei rona no hatan mai ita.

Doben sarani sira, ita percisa moris duni iha caridade sarani sira nian nee maibe ita percisa hatene no pratica lolos caridade nee basa caridade lolos mak ida nebe fo tulun no halo diak la hein atu simu kolen no fo lolos ba ema sira nebe kiak no mukit duni, percisa duni caridade ruma atu sira moris. Ohin loron iha ita nia sociedade, liu liu iha Dili laran ita hare ba mosu ema kiak barak fali mas que uluk tempo indonesia nian ita la hare ema kiak barak iha cidade ka iha ita ninia comunidade ninia leet, ita percisa halo caridade hare didiak no los hodi halo los basa ohin loron ema barak moris iha bosok nia laran, iha baruk ten nia laran no iha finzi nia laran, laos kiak ida mos halo-an sai kiak hanesan dalan moris foun ida atu bele hetan tulun no atenção caridade nian husi ema sira nebe sira hasoru. Ita nia caridade maun alin sira la limita-an deit ba fo sasan sira maibe mos caridade iha hahalok tulun sira nebe laos material mos, bele espiritual bele relaçional no seluk seluk tan.

Na’i Maromak husu mos mai ita atu ita hadook-an husi hahalok sira nebe la tulun ita lao iha dalan moris Maromak oan sira nian, hadok-an husi ita nia hahalok nebe fo terus mai ita an rasik, liu liu fo terus fali ba ema seluk, hadok-an husi ita ninia liafuan kroat no liafuan at sira nebe halo terus ema, halo ema laran moras, liafuan sira nebe konta ema tun sae, gosta hateten at ema seluk, hahalok nebe castigo ema ka fo terus ema iha buat sira nebe violento. Iha ita le’et hahalok sira nee dala balun ita halo tamba deit nervozo, tamba deit ita la controla ita ninia emoção sira, tamba deit ita ninia arogância hodi la rona no la respeita malu.

 

São Paulo fo hanoin mai ita iha segunda leitura katak los duni ita ema sira dala barak tebes mak monu ba hahalok salan sira nee maibe nudar ema fiar nain ita percisa hamrik fila fali husi salan nee hodi fila ba Maromak hametin ita ninia fiar no lao fila fali iha dalan moris nian ida nebe hatudu halo tuir Nai Maromak ninia hakarak ba moris rohan laek.

Maun alin sira ita ninia fiar iha Maromak no ita ninia hakribi salan sira mak sai ponto de partida foun ida mai ita atu halao moris foun ida los no halo los ho halo diak nafatin mas que ita hatene katak ita ema sala nain. Nune’e mak fundamental tebes ita tau ita ninia fiar metin nafatin iha Nai Maromak. Ita ninia esforço sira sei la to’o no la garante mai ita moris diak no moris los ida iha mundo nee hodi too ba moris rohan laek sei ita laiha fiar ba Maromak. Se ita laiha fiar ba Maromak ita lao iha mundo nee hakasan halo diak hanesan ema baibain ida deit maibe moris nee namlele nafatin hela basa buat diak sira nebe ita halo la lori ita too’o ba moris rohan laek tamba ita la tau fiar iha Maromak. Uluk liu ita ninia fiar iha Maromak mak garante moris diak iha mundo nee lori to’o moris rohan laek, la ho fiar ita nia moris bele hakas-an to’o dala hira ba mos ita to’o deit iha nivel ida moris diak iha mundo rai klaran nee nian, moris rohan laek ita sei la hetan tan moris rohan laek nee so bele hetan ho deit Maromak basa Maromak rasik mak moris rohan laek nee ninia nain.

Ohin loron mosu fenómeno global ida nebe ita hanaran areligioso ka areligiosidade. Fenómeno be hatudu katak ema TEMI DEIT IHA IBUN TUTUN KATAK FIAR IHA MAROMAK, maibe nia nunca hakbesik-an ba Maromak, nia la preocupa atu hatene Maromak ninia hahalok sira hodi moris tuir, hanoin kloot deit Maromak ninia hahalok sira iha hahalok diak ida ka rua. Nai Maromak ninia hahalok diak nee infinito, ninia hahalok diak nee lao hamutuk ho domin no ho fiar. Hatudu iha Ninia-An nebe hakarak diak, hadomi no tau fiar uluk mai iha ita iha criação sira hotu no iha ita ninia hakarak diak, domin no fiar nebe hatudu fali ba Nia iha moris tuir ninia hakarak ka vontade sira. Concretamente nudar ema sarani hatudu iha observância ka buka hatene ninia ukun fuan no regra ka dalan moris nian sira hodi moris tuir ho fiar ho domin no ho laran metin tebes. Ita tem que halo nune duni no halo nune nafatin atu ita labele comprende sala Maromak ninia hakarak sira mai ita iha ita ninia moris no labele comprende tuir hakarak deit ita ninia FIAR ba Ita ninia Maromak.

Atu bele iha fiar nebe metin no fiar nebe bo’ot São Paulo dehan ita percisa hakbesik ba Maromak Espirito Santo no entrega ita-an ba Nia, tau confiança, laran metin iha Nia, laos iha ita ninia esforço no ita ninia kbiit sira. Ita ninia esforço no ita ninia kbiit, sasan ka instrumento sira nee hotu meio ida deit atu hakonu ita ninia moris ksolok lolos no moris rohan laek, centro, we matan no kbiit ba moris ksolok lolos no rohan laek nee mak Espirito Santo, tamba ne’e ita buka moris hamutuk no halo buat hotu iha moris nee hamutuk ho Espirito Santo.

Doben sarani sira, hodi moris fiar metin lolos iha Maromak mak ita bele pratica caridade sarani sira nian, caridade be halo ho fuan no laran, halo tamba domin be mos, la hein atu simu buat ruma ka hetan buat ruma husi ema seluk tamba hahalok ne’e; hodi fiar nebe metin lolos mak ita bele hadok-an husi hahalok sira nebe violento, lia kroat, lia bosok, lia konta, hahalok fo terus, la justo no la fo moris; hodi fiar metin lolos ba Maromak mak ita bele sai MASIN RAI NIAN. Katak halo ita ninia moris hatudu no lori ksolok, lori paz, lori laran metin, lori perdão, lori laran maus, laran malirin, lori fiar metin ba malu no ba Maromak, lori unidade iha ita le’et no unidade ho Maromak tinan ba tinan, iha rai ne’e no sai completo iha laelhan. Amen.

 

Becora, V Domingo Comum, Ano A-2020

Pb.

Leave a Reply

Your email address will not be published. Required fields are marked *