shadow
Diocese de Dili > NOTÍCIAS > REFLEXÃO > O BELE HILI IDA NEBÉ O HAKARAK

O BELE HILI IDA NEBÉ O HAKARAK

O hakarak, o bele halo tuir lolos Ukun-Fuan – nee nudar o hakarak. Maromak tau iha o nia oin, ahi no we: o bele hili ida nebé o hakarak.Evangelho Mateus semana nee contem Jesus niadoutrina balu nebe nia proclama ona iha Bem Aventurança (Mt 5-7). Doutrina nee sai hanesan bukae ba ita nobun nudar sarani Católico nebe fiar hodi tuir Jesus. Nudar seguidor Jesus nian, ita hotu hetan convite hodi banati tuir hahalok no doutrina nebé Jesus hanorin nudar sinal de fé ba Maromak no servi ema seluk.

Hasoru figura Jesus, ema balu iha sociedade judaica iha tempo nebá, considera Jesus nia doutrina contradis ho lei Moises nian (Leis Pentateuco no profeta sira nia hanorin).

Hasoru acusação hirak nee, Jesus afirma:” Hau mai laos atu hasai; Hau mai atu halo ema cumpri lolos(Mt 5,17)”. Tuir Jesus, princípio de interpretação nebé los mak; sentido husi lei ida precisa haré no compreende husi ninia objectivo, laos husi lei nia letra deit.

Nunee, Jesus considera existência/validade lei hodi halo tuirno dever hodi hadook-an husi hahalok fingido (munafik) nebe grupo fariseu ho escriba sira hatudu demasiado. Pelo contrário, Maromak nia mandamento no misericórdia nudar Jesus hanorin no hatudu rasik iha Ninia lalaok moris. Nee mak hanaran espírito Evangelho nebé expressa sentido lolos husi Lia Fuan Diak nebé Jesus hanorin.

Perante lei Judaica (Lei Moises), Jesus define lalaok principal rua: balu Nia simu no haklean iha Ninia missão (Cf v. 21-22, 27-28, 43-44). Balu Jesus rejeita tanba la serve ba interece ema barak (serve deit ba grupo Fariseu ho escriba) (cf v. 31-32, 33-37, 38-39).

Nudar exemplo ba aprofundação  lei judeu mak; ita precisa halakon sentimento vingança (dendam) nebé contem intenção aat. Tuir Moises, ema nebé oho tenke hetan castigo. Jesus fali aumenta tan katak: Imi rona dehan ba bei-ala sira nee:’o keta oho; ema nebé oho, sei hatan justiça’. Maibé, Hau dehan ba imi: ema nebé laran nakali hasoru nia maun alin,  sei hatan lia justiça (v. 22).

Motivo husi Jesus nia afirmação nee mak; por amor. Motivo ida nee, Jesus interpreta no aplica tuir situação lolos. Jesus dehan:”nee duni, o atu hasae dadaun karik, o nia buat karan iha altar fohon (Igreja), o hanoin katak, o aat malu ho maun-alin ruma, husik hela o nia buat karan, ba uluk dame malu ho nia, hafoin, mai hasae o nia buat karan” (v. 23-24).

Nee mak sentido lolos husi sentido domin Cristão Católico lolos. Ema nebé coloca sentido ida nee nudar domin lolos iha moris, mak considera ema seluk nia dignidade hanesan iha Maromak futar oin. Oração, sacrifício no oferta (esmola) nebé ita hatoo ba Maromak sei saugate wainhira ita sei iha sentimento ódio no vingança ba malu.

Exemplo husi lei judeu nebé Jesus rejeita mak lei número 6 iha decálogo (ukun fuan 10) nudar ukun fuan be Maromak fo liu husi Moises. Moises iha nebá bandu:”comete adultério (selingkuh)”. Maibé, Jesus exige lalaok nebe extrim liu hodi dehan:” Imi rona ema dehan: ’keta halo adultério’. Maibé, Hau dehan ba imi: ema nebé kan hateke ba feto ida, nia halo pecado ho feto nee iha laran”. 

Nee significa katak laos deit prática adultério mak considera pecado tuir Moises haruk maibé, tuir Jesus, foin hanoin deit mos comete ona adultério (pecado). Tanba nee mak Jesus koalia iha relato Evangelho katak; “imi keta hanoin katak Hau hasai tiha Lei ka profeta sira; Hau mai laos atu hasai; Hau mai atu halo ema cumpri lolos. Hau dehan lolos ba imi: maski Lalehan ho rai lakon; lei baluk ida mos sei la lakon; sei cumpri hotu. Profeta Isaías mos halo nanis ona previsão kona ba Jesus nia afirmação nee hodi dehan: “A erva seca e a flor fenece, mas a palavra de nosso Deus permanece eternamente”. (Is 40,8).

Nunee, Jesus fo hanoin mai ita hodi hadook-an husi biban (oportunidade) hirak nebé bele halo ita monu ba pecado (cf v.29-30). Lalaok ida nee ohin loron ita dehan; kesempatan dalam kesempitan, selingkuh la mate selingkuh tiha deit, halo la mate, halo tiha deit, haré deit nee la buat ida, aproveita la mate, aproveita tiha deit, korupsi la mate, korupsi tiha dei,……nst. Nee mak mentalidade ita nian iha tempo ida nee. Naran mak sarani maibé, lalaok moris sarani nia mihis ba bebeik ho presença tecnologia nebé hamout iha iha nível degradação moral no espiritual. 

Tuir mai, Jesus rejeitalei nebé Moises fo licensa (permite) mak; mane ida bele divorcia nia fen eh laen nebé halo sala (adultério/selingkuh) ho carta/surat divórcio (v.31). Tanba sá? Lalaok nee Jesus haré hanesan fo licensa atu ema mane sira no mos feto sira bele soe malu (divócio) conforme hakarak. Jesus haré ida nee la basea ba princípio domin (hukum cinta kasih). Husi nee, Jesus hakarak hanorin eh afirma katak matrimónio (casamento) ida iha valor (sentido) wainhira futu ou hakesi ho união ida nebé comprometida iha sacamento matrimónio basea ba princípio domin (hukum cinta kasih) (Mt 19, 1-12).

Husi reflexão nee, Jesus hakarak hanorin ita katak; nudar escolante (batismado) la bele desconfia malu, precisa fiar malu, hodi kaer metin princípio domin no união entre feto no mane hodi hatete los, los, lae, lae.

Atu taka reflexão nee, mensagem husi relato São Mateus semana nee mak; princípio Jesus nia perante lei judaica laos hodi halako maibé, cumpri no halo tuir lolos. Lei nee Maromak fo hodi cumpri Maromak nia vontade ba salvação humanidade.

Jesus, aman Maromak haruka hodi halao knaar missionário ba salvação humanidade, no cumpri lolos Maromak nia lei. Maromak iha Antigo Testamento hanesan deit ho Maromak iha Novo Testamento nebé Jesus mai anuncia. Nunee, Maromak nia promessa no vontade mos hanesan deit iha Testamento Foun tanto Testamento Tuan. Buat nebé, Maromak hakarak husi ita mak relata iha Evangelho nebé tenik:”ema nebé moris tuir didiak Ukun-Fuan, hodi hanorin mos maluk seluk, ema nee sei sai boot iha Reino Lalehan. Nee duni, Hau dehan ba imi: imi nia justiça la los lis karik escriba ho fariseu sira nian, imi sei la tama iha Reino Lalehan.” Assim Seja e Bem Haja! (ignasoliveira2020).

Leave a Reply

Your email address will not be published. Required fields are marked *