shadow
Diocese de Dili > NOTÍCIAS > REFLEXÃO > CINZAS : ODAMATAN BA TEMPO QUARESMA NO TEMPO PÁSCOA.

CINZAS : ODAMATAN BA TEMPO QUARESMA NO TEMPO PÁSCOA.

Quaresma hanesan tempo importante ida nebé igreja oferece ba sarani sira nu’udar tempo preparação kiik ida ba festa boot: festa páscoa. Tempo preparação kiik ne’e, dura loron hát-nulu (40) hahú husi loron quarta-feira cinzas. Loron nebé sarani sira simu sinal ahi kdesan ida iha ren-tos. Husi ne’e, sarani ida loke ona odamatan ba tempo quaresma no tempo páscoa. Tan ne’e, Quarema bele sai escola moris nian ida. Pelo menos escola nebé sarani sira bele aprende buat ruma atu organiza, hadia, halo lós ou halo diak liu tan (magis) moris sarani nian ba tinan tomak. Ho lia fuan seluk, tempo kmanek ida atu ita ordena (organiza) ita nia moris iha direção “mehi Maromak nian” ba ita ema (humanidade). Mehi ne’e la seluk, la leet makita nia “salvação”.

Tempo litúrgico quaresmal nian husu ita atu considera, tetu no halo ezame ba ita nia relação vital sira hanesan: relação ho Nai Maromak, relação ho ita-an rasik, relação ho maun-alin sira, relação ho criação no relação ho mundo. Atu nune’e, ita bele prepara-an diak liu tan ba festa Páscoa hodi celebra mistério central fiar sarani nian: Jesus Cristo nia vida tomak liu-liu nia terus, mate no moris hias.

Ita hetan convite atu moris tempo quaresmal ne’e ho naroman foun no hetan inspiração husi centro ita nia moris nian nebé mak Jesus Cristo rasik, Ninia pessoa, Ninia mensagem, Ninia mate no Ninia moris hias hanesan temi ona iha leten. Dala barak ita monu iha risco katak iha tempo sira hanesan ne’e, ita passa ho maneira routina (baibain, normal) nebé ita conhece tiha ona. Risco ida ne’e, la tulun atu ita bele loke odamatan ba “mudança ka transformação ou conhecido ho lia fuan  metanoia” iha ita nia moris nudar sarani.

Wainhira ita comtempla Jesus Cristo, ita descobre ita nian-an. Leitura sira nebé ita sei ba rona iha quarta-feira cinzas nian, hatuir mai ita konaba prática quaresmal nian: Oraçao, Jejum, Esmola nst. Iha ne’e, ita nia relação sira hetan naroman housi modo (cara/maneira) no procedimento Jesus nian. Gesto tolu(3): oração, jejum, esmola sai hanesan dalan kiik balu hodi halo ita sai ema liu tan (ser mais humano), halo ita nia moris sai kmán liu tan, ho sentidu sira nebé fó valor ba sentido moris cristão nian no apresenta hanesan alternativa ida atu moris iha profundidade moris cristão nian.

Moris nakloke ba ema seluk mak hatudu liu husi fó esmola. Ne’e sintonia ho fuan Maromak nian katak oração. Ida ne’e lori ba mudança ruma iha ita nia moris liu housi tau ordem ba moris lor-loron nian liu husi jejum. Precisa cria espaço ka fatin foun iha ita fuan no hanoin atu buat foun bele acontece.

 

Jejum: buat nebé foun husi jejum laos iha hamenus hahan, maibé, refere li-liu ba ita nia visão. Ita nia “modo de olhar” nu’udar ema sarani, katak haré ba ita-an rasik, tau matan ho diak ba sá mak ita han, ativa ita nia prática laran maus/compaixão, hadook-an husi sasan nebé satan netik ita atu haré buat diak, kmanek Nai Maromak nian. Hadook-an housi buat nebé estraga ita housi fuan laran nst. (Hare-tau matan-olhar nu’udar lalenok ida ba ita nia interioridade).

 

Esmola: fó buat nebé ita iha. Laos buat nebé naresin. Katak iha ita nia “jeito haré” (modo de olhar) ba sasan sira tenke sai foun. Jeito haré ida nebé  tulun ema seluk, nebé Consegue haré buat diak haksumik  iha ema seluk, haré ida nebé sai humano liu tan, fo coragem, consola,… nst.

 

Oração: hahu housi nebé ita hare (ponto de partida)?  Hare husi/hahu housi Na’i Maromak. Ita nia matan tenki fihir metin iha Jesus Cristo, hare ba nia ho fuan tomak, haré ba maun-alin (adversário sira mos) ho domin, haré ba criação sira ho admiração (wow). Só nune’e deit mak oração iha nia abut nebé metin no lori mudança ba moris.

Ho lia fuan badak, quaresma convida ita atu começa vida foun ida, atu consentra ita nia energia no lao ba direção Maromak nian (mehi Maromak nian). Iha sentido ida ne’e, moris tempo quaresmal nian mak escola moris nian nebé los, iha nebé ita aprende kona-ba ita nia-an, atu haklean ita nia moris iha fuan ba Nai Santíssima Trindade.

Mai ita loke odamatan quaresma no Páscoa nian ho cinzas atu purifica ita nia motivação jejum nian, halós ita nia conciência ba prática caridade nian, hakur tama ba ita nia interioridade, hodi conversa iha oração ho ita nia Criador. Só nune’e de´it ita bele halo quaresma ida ne’e sai “projeto de vida”  ida, no “modo de proceder” ida, ba ita nebé hakarak loke-an, hodi hetan tebes naroman husi Na’i Jesus rasik, no Na’i Jesus nia roman duni. (Lupersj)

Leave a Reply

Your email address will not be published. Required fields are marked *