shadow
Diocese de Dili > NOTÍCIAS > REFLEXÃO > O FIAR MANE MAKSOIN?

O FIAR MANE MAKSOIN?

Jesus husu ba nia O FIAR MANE MAKSOIN? Nia hatan maibé se Na’i, atu hau bele fiar Nia. Jesus hatan: O hare tiha ona Nia, Nia mak koalia hela dadaun ho o ne’e. Ema oan ne’e hatan: Hau fiar Na’i

Jo 9,1.6-9.13-17.37-38

 

Maun alin doben sira ita hotu Na’i Maromak hili atu sai ninia oan doben sira nebé moris iha liberdade nia laran, iha ksolok no iha domin nia laran. Ne’e katak Moris ida dok housi terus no susar sira tomak. Maibé wainhira hare mai realidade moris nian ita hare ba katak ita hasoru terus no susar barak tebes, problema impasse política, Virus COVID-19 no ikus mai semana kotuk ba inundasaun be afeta ita. Realidade hirak ne’e hotu halo ita reflete fila fali mai ita ninia-an no ita ninia relação ho Maromak, ho natureza nebé Maromak haraik mai ita no comcerteza ho mos ita ninia maun ho alin sira seluk. Ita ninia relação lao iha buat lolos nia laran ka lao iha buat sala ninia laran mak barak. Tan sa mak buat hirak ne’e mosu no monu mai ita leet?

Iha situação sira hanesan ne’e facil tebes ita atu fo salah ba malu, até fo sala tan ba Maromak. Maibé Maromak rasik nu’udar ita ohin rona iha ninia futar liafuan sira katak Nia nunca hakarak at mai ita ema sira, hori uluk kedas nia be buat hotu ninia nain ne’e hakarak diak liu hotu mai ita ema sira. Tamba ne’e hau hanoin katak oras ne’e ita precisa haraik an hodi reconhece mos ita ninia salan sira katak dala barak liu ita terus ne’e tamba ita ema sira ninia salan. Tamba ita ninia egosimo, ita ninia arogância, ita ninia laran tos ba malu, ita ninia baruk ten atu cuidado ita-an no ita ninia ambiente moris nian no seluk seluk tan. Ita mak hakarak buat hotu mai ita de’it karik hodi la hanoin no la fahe malu ho ema seluk, ita makla cuidado ita ninia-an housi moras hodi mos cuidado ema seluk atu labele hetan moras, ita la cuidado ita ninia ambiente karik hodi tesi ai no sunu rai naran de’it, la hamos valeta sira, ate soe tan foer ba valeta ka ba mota laran. Hahalok sira hanean ne’e lori ita ba salan hodi halo ita terus nafatin de’it.

 

Doben maun slin sira, masque hasoru terus no susar ho dificuldade moris oi-oin de’it maibé ita buka moris turi nafatin ita nina moris nu’udar Maromak oan. Basa ida ne’e mak dalan moris nian nebé bele haketak ita housi salan, terus susar no mate. Hodi rona no moris tuir Maromak ninia Maromak ninia hakarak sira garantido mai ita katak ita sei hetan perdão ba ita ninia salan sira, ita sei hetan duni solusção ba ita ninia problema sira, ita sei hakat liu duni obstáculo moris nian sira tamba Maromak la housik ita mesak, Maromak lao hamutuk ho nafatin ho ita.

 

Iha tempo quaresma ne’e ita hanaran dalan moris ida hanesan ne’e dalan moris conversão nian. Katak housi salan, housik nakukun, lao ba moris los, lao ba naromak. Hare ba realidade moris nian no buat sira nebé ita hasoru hela dadaun ida ne’e katak iha tempo sira hanesan ne’e ita buka atu haraik-an ba malu no rona malu liu tan hodi bele hetan diak mai ita-an no mos ba ema barak nian, tau interesse comum nian as liu ita ida idak ninian, as liu ita ninia grupo nian, as liu ita ninia familia nian, ita buka tulun malu liu tan, halo caridade liu tan. Liu-liu tulun no halo caridade ba ema sira nebé hetan susar no precisa tebes ita ninia tulun, tulun material maibé mos tulun espiritual liu housi ita ninia consolação no ita ninia oração, ho ita ninia hakarak diak sira ba ema seluk. Ita percisa tulun malu no halo diak ba malu liu housi cuidado ita ida idak ninia-an no maluk sira seluk no ita ninia ambiente housi moris mos hodi la fo biban atu desastre kona ita, la fo biban atu moras kona ita, liu liu moras corona nebé halo sociedade preocupa los ne’e, nebé halo maluk barak iha mundo ne’e lakon ona sira ninia moris. Ita buka sai badinas liu tan iha hamos ita ninia ambiente, cuidado ita ninia natureza hodi nune’e la hamosu mai ita leet desastres naturais sira, quer inundação, quer aquecimento global, quer polução, no sira seluk seluk tan.

 

Maun alin sira hodi halo nune’e ita lao nafatin ba oin liu housi dalan moris Maromak oan sira nian, dalan moris naroman oan sira nian ita hamutuk luta hasoru buat at no salan sira hotu nebé haterus ita. Fo liaman ba malu lao ho laran metin lolos no fiar lolos ba Maromak basa ho Maromak buat ida la susar. Iha Evangelho domingo ohin nian, domingo ba dala hat tempo quaresma nian nebé relata mai ita kona ba Jesus haraik tulun ba ema sira be percisa tulun hodi haraik fali matan mos ba matan delek ida halo ita hateke ba oin hodi halao moris ne’e ho laran metin no fiar metin tebes, basa Maromak la housik ita lao no lori mesmesak ita ninia dificuldade no terus ho susar sira be ita hasoru hela dadaun, Maromak la housik ita ida-idak ka mesa-mesak mak luta hasoru moras COVID-19 no moras sira seluk tan. Maromak lao hamutuk ho ita iha buat hirak ne’e hotu, Maromak luta hamutuk ho ita, nune’e ita hatene lolos kata iha buat sira ne’e hotu ita sei Manan.

 

Iha Na’i Jesus ninia conversa ho ema matan delek be hetan fali matan mos ka hare diak fila fali ne’e Jesus husu ba nia “O FIAR MANE MAKSOIN?” Nia hatan, maibé se Na’i, atu hau bele fiar Nia. Jesus hatan: O hare tiha ona Nia, Nia mak koalia hela dadaun ho o ne’e. Ema oan ne’e hatan: Hau fiar Na’i. Hafoin nia hakneak tiha iha Jesus nia futar oin.

 

Doben maun alin sira oras ne’e ita la precisa laran susar demais tamba buat hirak nebé ita hasoru iha moris ne’e, atu terus eh atu susar, atu desastre naturais e atu moras oi-oin to’o moras ida nebé perigo liu hotu hanesan COVID-19. Ita buka lao de’it tuir Maromak ninia dalan moris nian hodi housik salan sira no buka halao moris ne’e lolos nafatin nu’udar roman ninia oan sira, nu’udar Maromak ninia oan sira, basa Cristo rasik lao hamutuk ho ita. Jesus ninia futar liafuan no ninia conversa ho ema Matan delek be hetan fali matan diak ne’e hatudu mai ita katak hamutuk ho Cristo ita sei bele manan buat hotu, inclusivamente COVID-19. Mai ita hahu lao iha dalan moris ida nune’e ho fiar no ho confiança tomak iha Cristo, hahu kedas ho atitude simples ida nebé ema matan delek ne’e halo depois de Jesus halo nia bele hare fial fali, mak HAKNEAK IHA NA’I JESUS NINIA FUTAR OIN HODI AGRADECE, HODI HAROHAN NO HAROHAN NAFATIN, HODI MORIS NO MORIS BA NAFATIN. Ida ne’e nu’udar sinal ita ninia unidade ho CRISTO. Hamutuk ho Cristo buat at ida sei la estraga ita, buat ida sei la manan ita. IHA CRISTO NO HAMUTUK HO CRISTO ITA SEI MANAN BUAT HOTU. AMEN.

 

Bidau, 22 de Março 2020

IV DOMINGO QUARESMA-A

Pb.

Leave a Reply

Your email address will not be published. Required fields are marked *