shadow
Diocese de Dili > NOTÍCIAS > LETURA DIÁRIA > V Domingo Quaresma (ANO A)

V Domingo Quaresma (ANO A)

Primeira Leitura                    Ez. 37, 12-14

Lia housi Livro Profeta Ezequiel:

Na’i Maromak dehan: “Ha’u loke imi nia rate; Ha’u halo moris hias imi, Ha’u nia povo, hodi lori hikas imi ba rai Israel. Imi sei fiar katak Ha’u Maromak, wainhira Ha’u loke imi nia rate, hodi halo moris imi, Ha’u nia povo. Ha’u tau Ha’u nia Espírito iha imi: imi sei moris, Ha’u sei tau metin imi, iha imi rain; imi sei fiar katak Ha’u Maromak, dehan no halo”.

Maromak Futar Lia.

 

Salmo Responsorial                                                                                                                              Sal. 129(130), 1-2. 3-4. 5-6. 7-8

Refrão : Na’i laran luak duni, haraik maksoyn wa’in tebes!!! Repete-se

Na’i, foti ha’u lian ba Ita ho neon ho laran,

Na’i, rona ha’u lian!

Haraik tulun mai ha’u,

Rona ha’u susar. Refrão

 

Ita hanoin karik ami salan,

Na’i, sê mak bele soy-an?

Maibé, iha Na’i ema hetan perdua;

Tan ne’e, ami hamulak ho laran. Refrão

 

Ha’u klamar hein Maromak,

Ha’u fiar Nia lia-fuan.

Ha’u klamar buka Maromak

Di’ak liu ema hein rai hun mutin. Refrão

 

Hanesan ema hein loron atu sa’e,

Nune’e, Israel hein nia Na’in.

Tan Na’i laran luak,

Haraik maksoyn wa’in tebes.

Na’i de’it mak sei soy Israel, housi nia susar tomak. Refrão

 

Segunda Leitura                                                                                                                                                                         Rom. 8, 8-11

Lia housi São Paulo nia Surat ba sarani sira iha Roma:

Maun-alin sira: Ema nebé husik isin lolon ukun sira, sira la hetan Maromak nia domin. Maromak nia Espírito horik karik iha imi, Espírito mak ukun imi, laós buat isin mak ukun imi. Maibé, ema ruma la iha Cristo nia Espírito karik, espírito ne’e laós ninian. Cristo horik karik iha imi, maski imi nia isin sei mate, tamba salan, imi nia espírito moris, basá imi sala laek. Maromak nebé halo Cristo moris hias housi mate, Ninian Espírito horik karik iha imi, Nia sei fó mos moris ba imi nia isin maten, hodi nia Espírito nebé horik iha imi.

Maromak Futar Lia.

 

Aclamação                                                                                                                                                                                  Jo. 11, 25a, 26

Refrão : Na’i Jesus Cristo, ami hahí hana’i Ita!! Repete-se

Na’i ko’aliá: Ha’u moris hias no moris hun;

Sê fiar Ha’u, sei la mate teni. Refrão

 

Evangelho (forma Longa)                                                                                                                                                         Jo. 11, 1-45

Na’i Jesus Cristo nia Evangelho nu’udar São João haktuir:

Iha tempo nebá, ema moras ida: nia naran Lázaro, ema rai Betânia, housi knua Maria ho nia bin Marta nian. Maria ne’e, mak tau mina-morin ba Jesus, hodi hamaran Jesus ain ho nia fuuk. Nia maun Lázaro mak moras. Nia feton sira haruka fó hatene ba Jesus: “Na’i, ida nebé Ita hadomi, moras”. Jesus rona tiha, Nia dehan: “Moras ne’e laós atu mate; ne’e atu fó glória ba Maromak, atu halo ema hahí Maromak Oan”. Jesus ho Marta, ho nia alin, ho Lázaro, sira belun boot. Maibé, rona tiha katak Lázaro moras, Nia sei hela tan loron rua iha nebá. Liu tiha, Nia foin dehan ba Escolante sira: “Ita ba fali Judeia”. Escolante sira dehan ba Nia: “Mestre, foin daudaun sira hakarak tuda mate Ita Boot, Ita sei hakarak fila fali ba nebá?” Jesus hatán, dehan: “Loron la iha oras sanulu resin rua? Ema nebé la’o loron, la sidi, basá, haré naroman mundo ne’e nian; maibé, la’o karik kalan, sidi, basá ninia naroman la iha”. Tuir mai, Jesus dehan ba Escolante sira: “Imi nia belun Lázaro toba; Ha’u ba nebá, atu fanu nia”. Escolante sira dehan: “Nia toba karik, nia sei la hetan susar”. Jesus ko’alia tiha kona ba Lázaro nia mate, maibé, sira hanoin katak Jesus ko’alia kona ba dukur bain-bain. Tan ne’e, Jesus dehan sai momós: “Lázaro mate tiha ona; Ha’u haksolok, tan Ha’u la iha nebá, atu imi bele fiar. Ita ba haré nia”. Ida Tomé, ema hanaran kaduak, dehan ba maluk sira: “Ita mos ba, atu mate hamutuk ho Nia”. Nune’e, Jesus la’o tiha ba, Nia hetan nia belun, ema hakoi liu tiha ona loron haat. Betânia besik Jerusalém, kala quilómetro tolu, Judeu barak ba haré Marta ho Maria, atu hato’o cumprimentos no laran susar, tan sira maun mate. Marta rona katak Jesus to’o daudaun ba, nia sai ba hasouru. Maria tur hela iha uma. Marta dehan ba Jesus: “Na’i, Ita iha ne’e karik, ha’u nia maun la mate. Maibé, ha’u hatene katak, oras ne’e mos, buat hotu nebé Ita husu ba Maromak, Maromak haraik ba Ita”. Jesus dehan ba nia: “Ó nia maun sei moris hias”. Marta hatán: “Ha’u hatene katak, nia sei moris hias, wainhira hotu-hotu moris hias iha loron ikus”. Jesus dehan: “Ha’u mak moris hias, Ha’u mak moris hun. Ema nebé fiar Ha’u, nia maski neneik sei mate, nia sei moris; ema hotu nebé moris, hodi fiar Ha’u, nia sei la mate tan. Ó fiar ne’e?” Marta dehan: “Ha’u fiar Na’i. Ha’u hatene nanis katak, Ita mak Messias, Maromak Oan nebé atu mai iha mundo!”. Dehan tiha ida ne’e, nia ba bolu nia alin Maria, hodi dehan subar: “Mestre iha ne’e, Nia haruka bolu ó”. Rona ne’e, Maria hamriik kedas, ba buka Jesus. Jesus la dauk tama iha knua; Nia sei hela iha fatin nebé Marta hasouru Nia. Judeu sira nebé hamutuk ho Maria iha uma, hodi hato’o cumprimentos no laran susar, haré nia hamriik sai lalais, sira tuir nia, tan hanoin katak nia ba tanis iha rate. Maria to’o tiha fatin nebé Jesus hela ba, haré Nia, monu ba Nia ain, hodi dehan: “Na’i, Ita iha ne’e karik, ha’u nia maun la mate”. Jesus haré nia hanre’u, Judeu sira nebé mai ho nia hanre’u hotu, Nia laran nakdedar, neon susar, tan hanoin. Hafoin, Nia husu: “Imi tau nia iha nebé?” Sira dehan ba Nia: “Ita mai haré”. Jesus tanis. Judeu sira dehan: “Nia be loke matan delek nia matan, Nia la bele halo ema ne’e la bele mate?” Jesus tan hanoin, Nia laran nakdedar tan dala ida, hodi besik ba rate. Rate ne’e, fatuk ko’ak ida, taka hela ho fatuk ida. Jesus dehan: “Imi hasai tiha fatuk”. Marta, mate-bian nia feton hatán: “Íis ona, Na’i; loron haat ona” Jesus dehan: “Ha’u la dehan ba ó katak, ó fiar karik, ó sei haré Maromak nia glória?” Sira hasai tiha fatuk, Jesus foti matan ba Lalehan, dehan: “Ha’u fó agradece ba Ita Boot tan rona Ha’u. Ha’u hatene nanis katak, Ita rona nafatin Ha’u; maibé, Ha’u ko’alia hanesan ne’e, tan ema lubun hale’u ami, atu sira fiar katak, Ita mak haruka Ha’u mai”. Dehan tiha ne’e, Nia foti lian maka’as dehan: “Lázaro, sai mai liur”. Mate sai mai, liman ain fulun ho hena, oin taka ho lensol ida. Jesus dehan ba sira: “Kore nia, husik nia la’o. Nune’e, Judeu barak nebé ba haré Maria, sira haré buat nebé Jesus halo, sira fiar iha Nia.

Lia Maksoyn.

 

Evangelho (forma Breve)                                                                                                                               Jo. 11, 3-7. 20-27. 33b-45

Na’i Jesus Cristo nia Evangelho nu’udar São João haktuir:

Iha tempo nebá, Lázaro nia feton sira haruka dehan: “Na’i, Ita nia belun moras”. Jesus rona tiha, Nia dehan: “Moras ne’e laós atu mate; ne’e atu fó glória ba Maromak, atu ema hahí Maromak Oan”. Jesus ho Marta, ho nia alin Maria ho Lázaro, sira belun boot. Maibé, rona tiha katak Lázaro moras, Nia hela tan loron rua iha nebá. Liu tiha, Nia dehan ba Escolante sira: “Ita ba fali Judeia”. Jesus to’o ba, hetan Nia belun ema hakoi liu tiha loron haat. Marta rona katak Jesus to’o daudaun ona mai, nia sai ba hasouru. Maria tur hela iha uma. Marta dehan ba Jesus: “Na’i, Ita iha ne’e karik, ha’u nia maun la mate. Maibé, ha’u hatene katak, oras ne’e mos, buat hotu nebé Ita husu ba Maromak, Maromak haraik ba Ita”. Jesus dehan: “Ó nia maun sei moris hias”. Marta hatán: “Ha’u hatene katak, nia sei moris hias, wainhira ema hotu moris hias iha loron ikus”. Jesus dehan: “Ha’u mak moris hias, Ha’u mak moris hun. Ema nebé fiar Ha’u, maski neneik sei mate, nia sei moris; ema hotu nebé moris no fiar Ha’u, sei la mate tan. Ó fiar buat ne’e?” Marta dehan: “Na’i, ha’u fiar. Ha’u fiar nanis katak Ita mak Messias, Maromak Oan nebé atu mai iha mundo!” Jesus laran nakdedar, noeon susar tan hanoin. Hafoin, Nia husu: “Imi tau nia iha nebé?” Sira dehan: “Na’i, mai haré”. Jesus tanis. Judeus sira dehan: “Nia be loke matan delek sira nia matan, Nia la bele halo ema ne’e la bele mate?” Jesus laran nakdedar tan dala ida, tan hanoin, hodi to’o ba rate. Rate ne’e fatuk ko’ak ida, taka hela ho fatuk ida. Jesus dehan: “Hasai tiha fatuk”. Marta, mate-bian nia feton dehan: “Íis ona Na’i, basá loron haat ona”. Jesus dehan ba nia: “Ha’u la dehan ba ó katak, ó fiar karik, ó sei haré Maromak nia glória?” Sira hasai tiha fatuk, Jesus foti matan ba Lalehan, dehan: “Aman, Ha’u fó agradece ba Ita, tan rona Ha’u. Ha’u hatene katak, Ita rona nafatin Ha’u; Maibé, Ha’u ko’alia hanesan ne’e, tamba ema lubun nebé hale’u ami, atu sira fiar katak, Ita mak haruka Ha’u mai”. Dehan tiha ne’e, Nia foti lian maka’as, dehan: “Lázaro, sai mai liur”. Mate sai mai, ain ho liman bobar ho hena, oin, falun ho lensol ida. Jesus dehan ba sira: “Kore tiha nia, husik nia la’o”. Judeus barak, nebé mai haré Maria, haré buat nebé Jesus halo, sira fiar iha Nia.

Lia Maksoyn.

Leave a Reply

Your email address will not be published. Required fields are marked *