shadow
Diocese de Dili > NOTÍCIAS > LETURA DIÁRIA > Domingo de Ramós (ANO A)

Domingo de Ramós (ANO A)

Primeira Leitura                          Is. 50. 4-7

Lia housi livro profeta isaías nian:

Na’i haraik tulun, atu ha’u ko’alia nu’udar escolante ida, hodi hatene tulun ho lia fuan ida, ema sira be iha susar laran. Dadersan-dadersan, Nia loke Ha’u tilun atu Ha’u rona, hanesan escolante sira rona. Na’i Maromak loke Ha’u nia tilun, Ha’u la sees, Ha’u la hakiduk. Ha’u, see Ha’u kotuk ba ema sira be baku Ha’u; Ha’u see Ha’u hasan ba ema sira be fokit Ha’u hasanrahun; Ha’u la subar Ha’u oin ba lia aat no kaben tasak. Na’i Maromak mai tulun Ha’u, tan ne’e Ha’u la moe. Ha’u halo Ha’u oin to’os hanesan fatuk, Ha’u hatene katak Ha’u sei la hein leet.

Maromak Futar Lia.   

 

Salmo Responsorial                                                                                                                   Sal 21 (22), 8-9, 17-18ª, 19-20, 23-24

Refrão : Ha’u nia Maromak, Ha’u nia Maromak, tan sá hewai ha’u? Repete-se

Sira bé har’e ha’u, hamoe ha’u,

Sira biu ibun, hodi doko ulun:

“Nia fiar iha nia Na’i, Na’i nee sadia Nia ba!

Sadia Nia, tan hakarak Nia di’ak!” Refrão

 

Asu lubun boot haleu ha’u,

Ema aat lubun boot hadulas ha’u.

Sira hedi borus ha’u liman no ain,

Ha’u bele sura ha’u ruin tomak. Refrão

 

Sira lees fahe Ha’u unuk ba sira,

Sira har’e Ha’u tais atu monu ba sé.

Maibé, Na’i, Ita keta hadook-An housi Ha’u;

Ho kbiit, mai sadia Ha’u! Refrão

 

Ita naran Ha’u sei haklaken ba maun-alin sira,

Ha’u sei hahii Ita iha ema sira leet.

Imi be ta’uk Na’i, hahí Nia ba,

Jacob oan sira houtu, imi fo glória ba Nia,

Israel oan sira houtu, hanai Nia ba. Refrão

 

Segunda  Leitura                                                                                                                                                                             Flp 2, 6-11

Lia housi São Paulo nia surat ba sarani sira iha Filipo:

Maun-alin sira: Jesus Cristo maski Maromak los, Nia la hatudu Nia íilas nu’udar Maromak, maibé, Nia haraik-An nu’udar atan, hodi mósu mai nu’udar mane los. Nu’udar mane los, Nia haraik-An liu atan, wainhira Nia halo tuir deit too mate, hodi mate iha Cruz! Tamba nee, Maromak hahí Nia, hodi haraik naran boot ida ba Nia, naran ida boot liu naran hotu hotu iha rai-klaran. Tan ne’e, ema hotu-hotu rona tiha Jesus nia naran, sei tuku tur hanai Nia iha lalehan, ka iha rai-klaran, ka iha inferno laran! Nune’e mak povo houtu sei hatene katak Jesus Cristo mak Na’i, hodi fo glória ba Aman Maromak.

Maromak Futar Lia.

 

Aclamação                                                                                                                                                                                         Flp. 2, 8-9

Refrão : Liurai, glória rohan laek, ami hahí Ita!! Repete-se

Cristo halo tuir de’it to’o mate, mate iha cruz tan ne’e,

Maromak hahí Nia, hodi fó naran ida ba Nia, Boot liu naran houtu. Refrão

 

Evangelho (Forma Longa)                                                                                                                                              Mt. 26, 14-27. 66

Na’i Jesus Cristo nia Evangelho nu’udar São Mateus haktuir:

N. Iha tempo nebá,

Escolante na’in sanulu resin rua ne’e ida,

naran Judas Iscariotes,

ba futu-lia ho sacerdotes boot sira, hodi dehan:

 

R. “Imi hakarak fó sá mai ha’u,

atu ha’u bele fó Jesus ba imi?”

 

N. Sira hakotu lia fó osan-mutin tolunulu ba nia.

Houri loron ne’e,

Judas buka fatin atu saran Jesus.

Iha loron uluk Ázimós nian,

Escolante sira ba hasouru Jesus hodi dehan:

 

R. Ita hakarak ami ba hadi’a sasán iha nebé,

atu ita han Páscoa?

 

N. Jesus dehan:

 

J. Imi ba hasouru ema ida iha cidade, hodi dehan ba nia:

‘Ha’u nia loron besik ona.

Ha’u sei han Páscoa iha ó nia uman,

hamutuk ho Ha’u nia Escolante sira!”

 

N. Escolante sira halo tuir nu’udar Jesus haruka,

hodi hadi’a Páscoa.

Loron monu tiha,

Jesus ho Escolante na’in sanulu resin rua tur iha mesa.

Sira han daudaun, Jesus dehan

 

J. “Ha’u dehan lolós ba imi:

Imi ne’e ida sei saran Ha’u ba mate.

 

N. Ho laran susar teb-tebes,

sira ida-idak husu ba Nia:

 

R. “Ha’u karik, Na’i?”

 

N. Jesus hatán:

 

J. Ida nebé hatama liman hamutuk ho Ha’u iha bikan,

nia mak sei saran Ha’u.

Mane-Maksoyn bá ona mak ne’e,

nu’udar hakerek nanis ona ba Nia.

Maibé susar ba ida nebé saran Mane-Maksoyn ba mate.

Ema ne’e la moris karik, kala di’ak liu.

 

N. Judas ida nebé atu saran Nia,

ko’alia hodi dehan:

 

R. “Keta ha’u karik Mestre?”

 

N. Jesus dehan ba nia:

 

J. “Hanesan ó dehan”.

 

N. Sira han daudaun,

Jesus pão, halo oração fo bensa,

silu fahe ba Escolante sira dehan:

 

J. Simu bá hodi han: NE’E HA’U ISIN”.

 

N. Hafoin, Nia foti kalis ida,

fó tiha agradece, fó ba sira, hodi dehan:

 

J. “Imi hotu hemu ba,

basá, ne’e HA’U NIA RAN, RAN MORUK NIAN,

sei nakfakar hodi kasu ema lubun nia salan.

Ha’u dehan ba imi katak:

Ha’u sei la hemu tan housi uvas fuan,

to’o loron nebé

Ha’u sei hamutuk ho imi, tua foun,

iha Ha’u Aman nia Reino”.

 

N. Sira hananu tiha salmo,

sira la’o ba foho Oliveira.

Jesus dehan:

 

J. “Ohin kalan, tan Ha’u,

imi hotu monu koi-kois, basá, hakerek nanis: Ha’u sei hakanek bibi-atan, bibi sira sei halai namkari. Maibé, moris hias tiha housi mate, Ha’u sei ba uluk hein imi iha Galileia”.

 

N. Pedro hatán netik, dehan:

 

R. “Maski, tamba Ita, hot-hotu sei monu, ha’u sei la monu”.

 

N. Jesus dehan ba nia:

 

J. “Ha’u dehan lialós ba ó: Ohin kalan duni, molok manu kokorek, ó sei bosok dala tolu katak ó la hatene Ha’u”

 

N. Pedro hatán:

 

R. “Maske ha’u mate ho Ita, ha’u sei la bosok katak ha’u la hatene Ita”.

 

N. Escolante sira seluk mós dehan hotu hanesan ne’e. Jesus ho sira to’o iha toos ida naran Getsémani. Nia dehan ba Escolante sira:

 

J. “Imi hela iha ne’e, wainhira Ha’u ba nebá, atu reza”

 

N. Nia lori Pedro ho Zebedeu nia oan mane na’in rua, ho neon nakraik no laran susar, Nia dehan ba sira:

 

J. “Ha’u laran susar teb-tebes, besik mate. Imi hela iha ne’e, hodi hadér ho Ha’u”.

 

N. La’o oituan ba oin, Nia taka oin ba rai, hodi harohan nune’e:

 

J. “Ha’u Aman, bele karik, hadook tiha kalis ne’e housi Ha’u. Maibé, la bele halo tuir Ha’u nia hakarak; halo tuir Ita nian hakarak”.

 

N. Hafoin, Nia fila ba Escolante sira, hodi hetan sira toba hela. Nia dehan ba Pedro:

 

J. “Nune’e fali, imi la bele hadér ho Ha’u oras ida nia laran? Hadér, halo oração, atu imi keta monu ba babeur. Espírito hein hela de’it, maibé, isin kbiit laek”.

 

N. Nia hadook-An dala ida tan, hodi harohan nune’e:

 

J. “Ha’u Aman, kalis ne’e la liu, molok Ha’u la dauk hemu, ne’e sá halo tuir Ita nia hakarak ba!”

 

N. Fila fali mai, nia hetan sira toba hela, basá, sira dukur la terus. Nia husik hela sira, hadook-An hias ba sorin, hodi harohan teni ba dala-tolu, dehan hikas lia-fuan sira uluk; hafoin, ba hasouru fali sira, dehan ba sira:

 

J. “Oras ne’e, imi toba ba, hamahan-an ba! Oras to’o ona, atu ema saran Mane-Maksoyn ba maksalak sira liman. Hamriik ita la’o! Ida nebé atu saran Ha’u, mai ona.”

 

N. Jesus sei ko’alia hela, sira na’in sanulu resin rua ne’e ida, naran Judas, to’o daudaun ho ema lubun boot, kaer surik ho ai-donan; mai housi sacerdotes boot ho nia povo nia, katuas sira nia haruka. Ida nebé atu saran Nia, futu-lia ho sira seluk nune’e:

 

R. “Ida nebé ha’u re’in, Nia mak ne’e; imi kaer Nia”.

 

N. Hakbesik tiha ba Jesus, dehan:

 

R. “Adeus, Mestre!”

 

N. Nia re’in Jesus, Jesus dehan ba nia:

 

J. “Belun, halo ona buat nebé ó mai atu halo!”

 

N. Sira hakat ba oin, hodi kaer Jesus. Sira ida be hamutuk ho Jesus ne’e, losu nia surik hodi tesik sacerdote boot nia atan nia tilun tahan sorin balun. Jesus haksi’ak nia dehan:

 

J. “Hatama surik ba nia knuan; basá, ema hotu nebé losu surik, sei mate ho surik. Ó hanoin katak Ha’u la bele husu ba Ha’u Aman, atu Nia tau kedas iha Ha’u nia oin, Anjo companhia sanulu resin rua? Maibé, oin sá, atu halo tuir Escritura nebé dehan nanis katak sei sai nune’e?”

 

N. Jesus dehan ba ema lubun boot ne’e:

 

J. “Imi mai ho surik ho ai-donan atu kaer Ha’u, hanesan fali imi mai kaer áhu-na’in ida? Maibé, loron-loron Ha’u tur hanourin iha Uma Kreda, imi la kaer Ha’u! Buat hirak ne’e hotu mósu, atu halo tuir buat hirak nebé, Profeta sira hakerek”.

 

N. Escolante sira halai hotu, husik Nia mesak. Sira nebé kaer Jesus, lori Nia ba hasouru Sacerdote boot Caifás; ema escriba no katuas sira halibur hotu iha nebá. Pedro la’o tuir Nia housi dook. To’o tiha sacerdote boot nia kadunan, nia ba tur hamutuk ho guarda sira, atu haré buat ne’e sai oin sá. Sacerdote boot sira ho Sinédrio tomak buka lia sasin bosok ida hasouru Jesus, atu oho Nia; maibé, sira la hetan, maski mósu duni sasin bosok barak. Ikus mai, ema na’in rua mósu mai, hodi dehan:

 

R. “Ema ne’e dehan: Ha’u sobu tiha Maromak nia Uma Kreda, hodi bele harí fali iha loron tolu nia laran”.

 

N. Sacerdote boot hamriik husu ba Jesus:

 

R. Ó la hatán buat ida? Sira dehan sá ida hasouru Ó?”

 

N. Jesus nonok hela. Sacerdote boot dehan ba Nia:

 

R. “Hodi Maromak moris, ha’u husu ba Ó atu dehan sai hodi jura katak Ó Messias, Maromak Oan!”

 

N. Jesus simu dehan:

 

J. “Nu’udar ó hateten. Ha’u mós dehan ba imi. Imi sei haré Mane-Maksoyn tur iha Ida nebé be hotu-hotu Nia sorin kuanan, tun mai housi kalohan leten”.

 

N. Sacerdote boot lés hatais, hodi dehan:

 

R. “Nia hateten aat Maromak! Ita buka tan sasin atu halo sá ida? Imi foin rona daudaun Nia hateten aat Maromak. Imi hanoin oin sá?

 

N. Sira hatán:

 

R. “Nia sei mate!”

 

N. Sira tafui ba Nia oin, sira tuku Nia. Sira seluk basá Nia, hodi dehan:

 

R. “Siik to’ok, Messias! Sê mak baku Ó?”

 

N. Pedro iha hela uma oin. Atan feto ida besik ba nia, dehan:

 

R. “Ó mós hamutuk ho Jesus Galileu”.

 

N. Maibé, nia dehan tiha katak lae, iha ema hotu nia oin.

 

R. “Ha’u la hatene ó dehan sá ida mak ne’e”.

 

N. Nia hamriik, la’o ba odamatan boot, atan feto seluk hare kona nia, dehan ba ema sira nebá:

 

R. “Ema ne’e hamutuk ho Jesus Nazaré”.

 

N. Nia dehan teni katak lae, hodi dehan:

 

R. “Ha’u la hatene ema ne’e”.

 

N. La kleur, ema sira be iha nebá, hakbesik ba Pedro, hodi dehan:

 

R. “Lós duni, ó mós sira nian. Ó nia ko’alia ne’e hatudu”.

 

N. Nia hahú hotar, hodi dehan:

 

R. “Ha’u la hatene ema ne’e”.

 

N. Manu ida kokorek kedas. Pedro hanoin kona ba lia-fuan hirak Jesus dehan: ‘Molok manu ida kokorek, ó sei dehan ba dala tolu katak ó la hatene Ha’u’. Pedro sai ba liur, tanis ho laran moras teb-tebes. To’o tiha dader, sacerdote boot sira ho povo nia katuas sira hotu, buka lia hasouru Jesus, atu oho Nia. Sira futu tiha Nia, hodi lori Nia ba Governador Pilatos. Judas nebé saran Jesus, haré ema atu oho Jesus, nia laran susar, nia kaer osan-mutin tolu-nulu ne’e ba fó hikas ba sacerdote boot sira, hodi dehan:

 

R. “Ha’u sala, basá, ha’u saran Ema liman mós”.

 

N. Sira hatán:

 

R. “Ami iha buat ruma? Ida ne’e ó mak hatene!”

 

N. Nia kaer osan, tuda ba Templo laran, hafoin, nia ba tara-an. Sacerdote boot sira, hili tiha osan ne’e dehan:

 

R. “Ne’e la tau iha osan fatin; basá ran nia folin”.

 

N. Sira hanoin didiak tiha, ho osan ne’e, sira sosa Olieiro nia rain, atu halo rate ba ema la’o-rai sira. Tan ne’e, to’o ohin loron, sei bolu nafatin rai ne’e, “Rai ran nian”. Ne’e sai tuir lia nebé Profeta Jeremias haklaken, dehan: “Sira kaer osan-mutin tolu-nulu – osan nebé sira hanoin katak to’o, atu sosa ida nebé Israel oan sira hatudu folin – sira sosa tiha Olieiro nia rain, nu’udar Na’i dehan mai Ha’u”. Hafoin, Jesus mósu ba Governador nia oin, governador husu ba Nia:

 

R. “Ó, Judeu sira nia Liurai?”

 

N. Jesus hatán:

 

J. “Nu’udar ó hateten”.

 

N. Sacerdote boot sira ho katuas sira husu ba Nia, Nia la hatán buat ida. Pilatos dehan ba Nia;

 

R. “Ó la rona buat hirak nebé ema hateten hasouru Ó”

 

N. Maibé Jesus la hatán buat ida, hodi halo governador sai hakfodak teb-tebes. Tuir lisan, iha Festa Páscoa, governador hasai dadur ida nebé ema lubun husu. Iha tempo ne’e, iha dadur ida nebé ema hotu hatene, naran Barrabás. Halibur tiha sira, Pilatos husu:

 

R. “Imi hakarak ha’u husik tiha sê? Barrabás, ka Jesus nebé ema hanaran Messias?”

 

N. Basá, nia hatene katak sira saran Jesus, tan laran moras. Nia tur iha Tribunal, nia fén haruka dehan ba nia:

 

R. “Ó keta halo buat ida ba Ema liman mós ne’e; tamba Nia, ohin ha’u mehi aat teb-tebes”.

 

N. Maibé, sacerdote boot sira no katuas sira, tau lia ba ema lubun ne’e, atu husu Barrabás, hodi saran Jesus ba mate. Governador husu ba sira:

 

R. “Sira na’in rua ne’e, imi hakarak ha’u husik lós ida nebé?”

 

N. Sira hatán”

 

R. “Barrabás”

 

N. Pilatos dehan fali:

 

R. “Ha’u sei halo lós sá ba Jesus, nebé bolu katak Messias”.

 

N. Sira hotu hatán:

 

R. “Hedi ba cruz”.

 

N. Pilatos husu hikas:

 

R. “Maibé, Nia halo aat sá ida?”

 

N. “Sira hakilar liu tan:”

 

R. “Hedi Nia ba Cruz”.

 

N. “Haré ba katak la bele halo buat ida, maibé ema hola ba lia, Pilatos husu wé hodi fase liman iha ema lubun nia oin, dehan:

 

R. “Ha’u liman mós kona ba ema ne’e nia ran. Lia ne’e ho imi”.

 

N. Povo mak hatán:

 

R. “Nia ran todan monu mai ami no ba ami nia oan sira leten”.

 

N. Tan ne’e, nia husik Barrabás. Haruka baku tiha, nia fó Jesus ba sira atu hedi ba Cruz. Governador nia soldado sira lori Jesus ba pretório, hafoin sira halo soldado tomak hale’u Nia. Hasai tiha Nia unuk, sira taka Nia ho hena mean ida, sira leu ai-tarak hodi tau iha Nia ulun. Sira halo Nia kaer unu ida iha liman lós. Sira hakneak iha Nia oin, hamoe Nia, hodi dehan:

 

R. “Na’i, Liurai Judeu sira nian”.

 

N. Hafoin, sira tafui ba Nia, sira kaer onu ne’e hodi baku Nia ulun. Hamoe tiha Nia, sira hasai fali hena mean, hodi fó hatais fali Nia unuk. Hafoin sira lori Nia atu ba hedi ba Cruz. To’o iha fatin ida naran Gólgota, katak, fatin “Ulun-ruin fatin” sira fó tua kahur ho na’an horum ba Nia atu hemu. Maibé, Jesus koko tiha, lakohi hemu. Hedi tiha Nia ba Cruz, sira koko sorti, hodi fahe Nia hatais ba malu. Hafoin, sira tur iha nebá hodi hein Nia. Sira tau iha Nia ulun leten, buat hakerek ida, hodi dehan, tan sá Nia mate: “Ida ne’e JESUS, Judeus sira nia Liurai”. Hamutuk ho Nia, ema hedi mós iha cruz, ahu-na’in, na’in rua, ida iha kuanan, ida seluk iha karuk. Ema sira be la’o liu, hateten aat Nia doko ulun hodi dehan:

 

R. “Ó bele sobu Uma Kreda, hafoin haríi hias iha loron tolu, Ó Maromak Oan sá, soy Ó-an rasik, tun housi cruz mai”.

 

N. Sacerdote boot sira mós, ho escriba sira no katuas sira, hamoe Nia, hodi dehan:

 

R. “Nia soy ema seluk; la bele soy Nia-an rasik. Nia Israel nia Liurai! Tun housi cruz, atu ita bele fiar Nia. Nia fiar metin Maromak! Maromak hadomi tebes Nia, sadia Nia oras ne’e; basá, Nia dehan: ‘Ha’u Maromak Oan’”.

 

N. Ahu-na’in sira nebé hedi mós ho Nia iha cruz, hateten hotu Nia. Liu tiha loron fahe rua, rai hotu nakukun to’o tuku tolu loron kraik. Iha tuku tolu loron kraik, Jesus hateten ho lian maka’as:

 

J. “Eli, Eli, Lamá Sabachthani”.

 

N. Katak, Ha’u nia Maromak, Ha’u nia Maromak, tan sá husik Ha’u Mesak? Sira balun nebé iha oin, rona tiha ne’e, dehan:

 

R. “Nia bolu Elias”.

 

N. Sira ida halai kedas, ba kaer hena ida, habokon ba tua sin, tau iha fafulu ida, lolo ba Nia atu hemu. Maibé, sira seluk dehan:

 

R. “Husik ba! Ita haré to’ok, keta Elias mai bolu Nia karik”.

 

J. Jesus hakilar maka’as dala ida tan, husik Íis………………………….

Teki-Tekil Templo nia kakuluk nakfera ba rua housi leten to’o kraik; rai nakdoko, fatun sira nakfera tan an. Rate sira nakloke. Santo barak nebé mate tiha ona, sira nia isin moris hias tiha, sira sai housi rate, tama iha cidade Santa, hodi mósu ba ema barak. Centurião ho ema sira be hamutuk ho nia, hodi hein Jesus, haré rai nakdoko, ho buat hirak nebé mósu, sira ta’uk hodi dehan:

 

R. ”Lós duni! Nia Maromak Oan”.

 

N. Feto barak iha nebá, hateke de’it housi dook; sira nebé tuir Jesus housi Galileia, atu tulun Nia. Iha sira leet, Maria Magdalena, Maria, Tiago ho José sira nia inan, no Zebedeu nia oan sira nia inan. Iha loro-kraik, ema riku ida mai housi Arimateia, naran José, Nia mós Jesus nia Escolante ida. Nia ba ko’alia ho Pilatos hodi husu Jesus nia Isin. Pilatos haruka fó. José kaer Isin ne’e, falun ho lensol mós ida, tau iha rai kuak foun ida, nebé nia haruka ke’e ba nia-an, iha fatuk. Hafoin, nia duir fatuk boot ba odamatan, nia ba ona. Maibé, Maria Magdala ho Maria ida seluk, tur hela iha rate oin. Loron ida tuir kedas, loron tuir hadi’a sasán nian, sacerdote boot sira ho fariseu sira dehan ba Pilatos:

 

R. “Na’i, ami hanoin kona ba Ema aat ne’e, wainhira sei moris dehan: ‘Liu tiha loron tolu, Ha’u sei moris hias’. Tan ne’e, ita haruka ema hein didi’ak rate to’o loron tolu; keta halo, Escolante sira mai na’ok tiha Nia, hafoin dehan ba povo: ‘Nia moris hias housi mate’. Lia bosok ida ikus ne’e sai aat liu fali ida uluk”.

 

N. Pilatos hatán ba sira:

 

R. “Guarda sira mak ne’e, haruka sira hein metin, nu’udar imi hateten”.

 

N. Sira ba hein metin rate ne’e: sira taka metin fatun, hodi tau guarda hein.

Lia Maksoyn.

 

 

Evangelho (Forma Breve)                                                                                                                                                      Mt. 27, 11-54

Na’i Jesus Cristo nia Evangelho nu’udar São Mateus haktuir:

N. Iha tempo nebá, ema lori Jesus ba governador Pilatos. Governador husu ba Nia:

 

R. “Ó Judeu sira nia Liurai?”

 

N. Jesus hatán:

 

J. “Nu’udar ó hateten”.

 

N. Maibé, sacerdote boot sira ho katuas sira kesar Nia. Nia la hatán hasouru. Pilatos dehan ba Nia:

 

R. “Ó la rona buat hirak nebé ema dehan hasouru Ó?”

 

N. Jesus la hatán buat ida, hodi halo governador sai hakfodak. Tuir lisan, iha Festa Páscoa, governador husik dadur nebé ema lubun husu. Iha tempo ne’e, iha dadur ida nebé ema hotu hatene, naran Barrabás. Halibur hamutuk tiha sira, Pilatos husu:

 

R. “Imi hakarak ha’u husik ida nebé? Barrabás, ka Jesus nebé hanaran Messias?”

 

N. Basá, nia hatene katak sira saran Jesus, tan laran moras. Nia tur iha tribunal, nia féen haruka dehan ba nia:

 

R. “Ó keta halo buat ida ba Ema liman mós ne’e, basá, tan Nia, ha’u mehi aat teb-tebes”.

 

N. Maibé, sacerdote boot sora ho katuas sira, tau lia ba ema lubun, atu husu Barrabás, hodi saran Jesus ba mate. Governador husu ba sira:

 

R. “Sira na’in rua ne’e, imi hakarak ha’u husik tiha ida nebé?”

 

N. Sira hatán:

 

R. “Barrabás”

 

N. Pilatus husu ba sira:

 

R. “Ha’u sei halo lós sá ba Jesus, nebé naran Messias?”

 

N. Sira hotu hatán:

 

R. “Hedi Nia ba cruz”.

 

N. Pilatos husu teni:

 

R. “Nia halo sá ida?”

 

N. Sira hakilar liu tan:

 

R. “Hedi Nia ba cruz”

 

N. Haré katak, la bele halo tan buat ida, maibé ema hola ona ba lia, Pilatos husu wé hodi fase liman iha ema lubun nia oin, dehan:

 

R. “Ha’u liman mós kona ba Ema ne’e nia ran. Ida ne’e imi mak hatene”.

 

N. Povo tomak hatán:

 

R. “Nia ran fakar mai ami leten no ba ami nia oan sira”.

 

N. Tan ne’e, nia husik tiha Barrabás. Haruka baku tiha hafoin nia fó Jesus atu ba hedi iha cruz. Governador nia soldado sira lori Jesus ba pretório, hafoin soldado tomak hala’u Nia. Hasai tiha Nia unuk, hafoin sira taka Nia ho hena mean ida. Sira le’u ai-tarak hodi tau iha Nia ulun; sira halo Nia kaer onu ida iha liman lós. Sira hakneak iha Nia oin, sira hamoe Nia hodi dehan:

 

R. “Na’i, Judeu sira nia Liurai”.

 

N. Hafoin sira tafui ba Nia, sira kaer onu ne’e hodi baku Nia ulun. Hamoe tiha Nia, sira hasai fali hena mean, hodi fó hatais fali Nia unuk. Hafoin sira lori Nia atu ba hedi iha Cruz. Sira sai daudaun, sira hetan ema ida housi Cirene, naran Simão, sira haruka nia lori Jesus nia cruz. To’o tiha iha fatin ida naran Gólgota, katak, “Fatin ulun ruin”, sira fó tua kahur ho na’an horun ba Nia. Maibé Jesus koko tiha, lakohi hemu. Sira hedi tiha Nia ba cruz, sira koko sorti, hodi fahe Nia hena ba malu; hafoin, sira tur iha nebá hodi hein Nia. Sira tau iha Nia ulun leten, buat hakerek ida, hodi hateten, tan sá mak Nia mate. “Ida ne’e Jesus, Judeu sira nia Liurai”. Hamutuk ho Nia, hedi mós iha cruz, ahu-nain, na’in rua, ida iha sorin lós, ida seluk iha sorin karuk. Ema sira nebé la’o liu, hateten aat Nia, doko ulun hodi dehan:

 

R. Ó be, bele sobu Uma Kreda, hafoin liu loron tolu haríi hias fali: Ó Maromak Oan sá, soy Ó-an rasik, tun housi cruz mai.

 

N. Sacerdote boot sira mós ho escriba ho katuas sira hamoe Nia, hodi dehan:

 

R. “Nia soy ema seluk, la bele soy Nia-an rasik! Nia, Israel nia Liurai! Tun housi cruz atu ita bele fiar Nia. Nia fiar metin Maromak! Maromak hadomi Nia, oras ne’e soy Nia ba, basá, Nia dehan: ‘Ha’u Maromak Oan’”.

 

N. Ahu-nain sira nebé hedi mós iha cruz, hamutuk ho Nia, sira hateten aat Nia. Liu tiha loron fahe-rua, nakukun taka rai tomak, to’o tuku tolu loron-kraik. Iha tuku tolu loron-kraik Jesus hateten ho lian maka’as:

 

J. “Eli, Eli, Lamá Sabachthani”.

 

N. Katak, Ha’u nia Maromak, Ha’u nia Maromak, tan sá husik Ha’u Mesak? Ema sira nebé iha oin, balun rona tiha ne’e, dehan:

 

R. “Nia bolu Elias”.

 

N. Sira ida halai kedas, ba habokon hena ida ba tua-sin, tau iha fafulu ida, lolo ba Nia atu hemu. Maibé, sira seluk dehan:

 

R. “Husik ba! Ita haré to’ok, keta Elias mai bolu Nia karik”.

 

J. Jesus hakilar maka’as dala ida tan, husik Íis………………………….

Teki-Tekil, Templo nia kakuluk nakfera housi leten to’o kraik; rai nakdoko, fatuk sira nakfera tan an. Rate sira nakloke. Santo barak nebé mate ona, sira nia isin moris hias. Jesus moris hias tiha housi mate, sira sai housi rate, tama iha cidade Santa, hodi mósu ba ema barak. Centurião ho sira nebé hamutuk ho nia, hodi hein Jesus, haré rai nakdoko ho buat hirak nebé mósu, sira ta’uk teb-tebes hodi dehan:

 

R. ”Lós duni! Nia Maromak Oan”.

Lia Maksoyn.

Leave a Reply

Your email address will not be published. Required fields are marked *