shadow
Diocese de Dili > NOTÍCIAS > LETURA DIÁRIA > II Domingo da Páscoa (ANO A) Ou Da Divina Misericórdia

II Domingo da Páscoa (ANO A) Ou Da Divina Misericórdia

Primeira Leitura                       Act. 2, 42-47

Lia housi livro Apóstolo sira nia hahalok:

Iha loron hirak neba, maun-alin sira nebe ba rona bei-beik Apóstolos sira nia hanourin, sira hare malu di’ak hodi fahe ha-han ba malu, hodi reza mos ba malu. Ema hotu-hotu ta’uk; Apóstolo halo kmanek wa’in no buat oin-oin de’it. Sira hotu nebe fiar, moris hamutuk, hodi tau hamutuk riku-soin, hodi fahe osan ba malu, tuir ida-idak nia susar. Loron-loron sira ba Uma Kreda ho neon no laran ida, sira fahe paun iha uma hodi han ho ksolok ho domin. Sira hahi Maromak. Povo hotu-hotu laran di’ak ba sira. Na’i Maromak, loron-loron halibur hamutuk tanba sira ema nebe Nia hakarak soi.

Maromak Futar Lia.

 

Salmo Responsorial                                                                                                                              Sal. 117(118), 2. 4, 13-15, 22-24

Refrão :  Haklaken Maromak, tan Nia di’ak, Nia hadomi nafatin!!! Repete-se

Israel nia uma laran dehan: Nia hadomi nafatin!

Aarão nia uma laran dehan: Nia hadomi nafatin! 

Ema hotu nebe hamta’uk Maromak, dehan; 

Nia hadomi nafatin. Refrão

 

Sira hakarak halakon ha’u, maibe, Na’i tahan ha’u;

Maromak, ha’u nia kbiit, Nia, ha’u nia Maksoin.

Ema di’ak hananu haksolok,

Na’i nia liman beran boot. Refrão

 

Fatuk ida be ema hewai sai tiha fatuk inan; 

ne’e, Maromak nia beran, nebe, Maromak halo mai ita.

Ne’e, Maromak nia loron;

hawelok hananu ba Maromak. Refrão

 

Segunda Leitura                                                                                                                                                                             1 Pe. 1, 3-9

Lia housi São Pedro nia surat:

Maun-alin sira: Kmanek ba Maromak, ba ita Na’in Jesus Cristo nia Aman, nebe, tan Nia laran luak, no tan Jesus Cristo nia moris hias housi mate, halo ita moris ba neon metin foun, ba rahun-di’ak ida la aat, la fo’er, la lakon. Rahun-di’ak ne’e, rai hela iha lalehan, ba imi nebe, tan fiar, Maromak nia kbiit tahan imi, atu hetan Maksoin nebe sei mosu iha loron ikus. Lia hirak ne’e fo ksolok ba imi, maski  imi sei hetan babeur no susar, iha loron ruma karik. Nune’e, housi susar nebe mai, tan fiar, imi bele hetan kbiit, di’ak no soin, iha loron Jesus mosu mai;  fiar folin liu osan-mean nebe bele lakon, maski áhi la han. Imi hadomi Jesus Cristo maski la hatene Nia, hanesan imi fiar Nia, maski la hare, imi iha ksolok ida rohan laek no beran boot;  imi sei hetan rahun-di’ak iha loron ikus, tan imi nia fiar: maksoin ba imi nia klamar.

Maromak Futar Lia.

 

Aclamação                                                                                                                                                                                          Jo. 20, 29

Refrão : Aleluia, Aleluia!! Repete-se

Na’i dehan ba Tomé:  “Tan hare, ó fiar;

rahun-di’ak ba sira nebe fiar, maski la hare”. Refrão

 

Evangelho                                                                                                                                                                                     Jo. 20, 19-31

Na’i Jesus Cristo nia Evangelho nu’udar São João haktuir:

Iha loron hirak neba, iha loron kraik, loron uluk semana nian, uma nebe Apóstolo sira hela nia odamatan taka metin tan sira ta’uk Judeu sira. Jesus mosu mai hamriik iha sira leet hodi dehan:  “Paz hela ho imi!”  Dehan tiha nune’e, Jesus hatudu daudaun ba sira Nia liman no sorin kanek. Hare tiha Jesus, Apóstolo sira haksolok teb-tebes. Jesus lia tun teni ba sira:  “Paz hela ho imi!”  Nu’udar Aman Maromak haruka Ha’u mai, nune’e mos, Ha’u haruka daudaun imi”.  Hotu tiha ne’e, Jesus huu íis ba sira, dehan:  “Simu Espirito Santo! Sira nebe imi perdua sira salan, sira hetan duni perdua ba sira salan;  sira nebe imi la perdua sira salan, sira la hetan duni perdua ba sira salan.”  Tomé, sira sanulu resin rua ne’e ida nebe ema hanaran Dídimo, nia la iha neba, uainhira Jesus mosu. Apóstolo  sira seluk hateten ba nia:  “Ami hare ona Na’i!”  Maibe Tomé hatan ba sira:  “Ha’u la hare karik besi-kusan fatin iha Nia liman, ha’u la hatama karik ha’u liman iha Nia sorin kanek, ha’u sei la fiar!”  Liu tiha loron walu, Apóstolo sira halibur hamutuk fali iha uma laran.  Tomé mos iha hotu neba, Odamatan sei taka metin hela, Jesus mosu mai; Jesus hamriik iha sira leet, dehan:  “Paz hela ho imi!”  Tuir, Jesus lia tun ba Tomé:  “Hakbesik ó nia liman fuan mai, hodi hare Ha’u liman! Hakbesik ó nia liman hodi hatama ba Ha’u sorin kanek!  Keta laran to’os, maibe laran mamar atu fiar!”  Tomé hasa’e lia ba Jesus, dehan:  “Ha’u Na’in, ha’u nia Maromak!”  Jesus lia tun teni ba nia:  “Ó fiar tan ó hare Ha’u.  Rahun di’ak ba sira nebe fiar maski la hare!”  Iha Apóstolo sira leet, Jesus halo tan milagre oi-oin. Milagre hirak ne’e la hakerek iha livro ida ne’e.  Ami hakerek milagre iha livro ne’e, atu imi bele fiar katak, Jesus, Maromak Oan Mane; Atu nune’e, hodi imi nia fiar, imi bele hetan mos moris rahun di’ak, tan Jesus naran.

Lia Maksoyn.

Leave a Reply

Your email address will not be published. Required fields are marked *