shadow
Diocese de Dili > NOTÍCIAS > Notícias > Feliciano Agradece; Tan Recupera Ona Housi Covid-19

Feliciano Agradece; Tan Recupera Ona Housi Covid-19

Dili 1 Maio 2020 (DCAD) – Centro Integrado Gestão de Crise ohin (1 maio 2020) reintegra tan paciente na’in sanulu (10) nebé curado ona iha sala isolamento Vera Cruz composto housi feto 5 no mane 5 ba ida-idak nia família tanba resultado teste iha laboratório nacional hatudu negativo dala rua tutuir malu. entre sira na’in sanulu nebé recuperado, ida mak Feliciano Amadeu de Carvalho.

Feliciano Amadeu de Carvalho haktuir nia experiência viagem nian katak iha loron (31 março 2020), nia halo nia viagem housi Indonesia (Kediri) mai Surabaya, Kupang no Atambua. No iha loron (1 Abril 2020) transporta housi Batugade mai Dili no submete kedas ba quarentena iha Hotel Katuas.

Nia dehan, iha loron (12 Abril) Pessoal saúde hasai teste primeiro ba sira nia colega ida nebé hatudu sitomas hanesan isin manas, mear no kakorok moras. No resultado fo sai positivo.

Nia hateten, Iha momento nebá como ami trauma ho colega ida nebé positivo ne’e, ami exige ba parte Saúde nian atu muda ami sai housi hotel katuas ba fali Tasi-Tolu. E consegue muda duni ba Tasi-Tolu. Liu tiha ne’e, Iha loron (15 Abril), doutor sira bolu ha’u ho ha’u nia colega balun dehan ami na’in lima composto housi feto na’in 2 no mane na’in 3 resultado housi ami nia teste iha (12 Abril) ne’e Positivo covid-19. Maske positivo maibé ami la iha sintomas ruma hanesan Mear, isin manas, fani no kakorok moras ka inus metin, maibé doutor sira esplica katak iha dunik virus ituan iha kakorok. Ho nune’e, tauk moras ne’e atu alastra tan ba colega sira seluk, então equipa saúde muda kedas ami mai iha fatin isolamento Vera-Cruz.

Nia reforça tan, Iha loron (22 Abril) pessoal saúde sira hasai fali teste ba dala uluk nian no resultado nebé sai negativo. Hafoin iha loron (26 Abril) ami hasai teste ba dala rua nian, graças a Deus resultado Negativo nafatin.

Feliciano Amadeu de Carvalho hateten, Ami lahaluha agradece ba Maromak no ami hato’o mos ami nia obrigado wain ba pessoal saúde nian hanesan Doutor no doutora sira hotu nebé mak acompanha ami durante ami iha fatin isolamento nian, ami agradece tebes tanba kna’ar nebé ita boot sira hala’o todan no fo risco boot ba imi, maibé imi nafatin brani tulun no tau matan mai ami. Dadaun ne’e ami la iha buat ida atu fo ba ita boot sira, maibé iha ami nia oração sira lor-loron nian ami reza atu Na’i Maromak tulun no nafatin acompanha ita boot sira iha imi nia serviço.

Feliciano Amadeu de Carvalho apela mos ba cidadão sira katak ba timoroan hotu hakaas an mantein nafatin regras hanesan distância social, fase liman bebeik no uja máscara wainhira sai ba fatin público nian, tanba virus ne’e ita la espera ka ita la sente wainhira kona ita. Tanba ne’e hakaas an ba mantein regras nebé mak iha ona. (Leo S’mauS)

Leave a Reply

Your email address will not be published. Required fields are marked *