shadow
Diocese de Dili > NOTÍCIAS > LETURA DIÁRIA > DOMINGO DO PENTECOSTES (ANO A)

DOMINGO DO PENTECOSTES (ANO A)

Primeira Leitura                        Act. 2, 1-11

Lia housi livro haktuir Apóstolo sira nia Hahalok:

To’o tiha loron Pentecostes, Apóstolo sira hamutuk hela iha fatin ida de’it. Teki-teki housi lalehan, sira rona tarutu boot ida, hanesan anin áat, tama to’o uma laran, nebé sira hela ba. Sei nune’e hela, sira haré buat ida mosu mai hanesan áhi-lakan, fahe-an, hodi tun ba sira ida-idak. Sira hotu simu Espírito santo, hodi hahú ko’alia lian oi-oin de’it, nu’udar Espírito Santo haraik ba sira, atu sira bele ko’alia. Tur mos iha Jerusalém, judeus oan di’ak balun, mai housi nação hotu-hotu rai-klaran nian. Rona tiha tarutu boot ida ne’e, ema lubun boot ho hakfodak, halibur malu tan sira ida-idak rona sira lian rasik. Hodi hakfodak no hamta’uk, sira dehan: “ Sá lós mak ida ne’e? Ema sira be ko’alia daudaun ne’e laós ema Galileia nian de’it? Oin sá lós mak ita rona sira ko’alia, ita ida-idak nia lian rasik?  Ema Partos, Medos, Elamitas, ema housi rai Messopotânia, Judeia no Capadócia, ema housi rai Ponto no Ásia, Frigia no Panfilia, ema housi rai Egipto, housi rai Líbia, besik Cirene no Árabe, ita ne’e hotu, ida-idak rona ema hirak ne’e haklaken Maromak nia Hahalok wa’in, hodi ita nia lian rasik.”

Maromak Futar Lia.

 

Salmo Responsorial                                                                                                             Sal. 103(104), 1ab, 24ac. 29bc-30, 31, 34

Refrão : Na’i, haraik Espírito Santo Mai ami atu hafoin hikas rai!!! Repete-se

Ha’u klamar hahí Maromak,

Ha’u nia Maromak kmanek tebes!

Ita nia hahalok sura labele,

Rai-klaran belar ho ita nia kriatura. Refrão

 

Ami moris iha ita nia liman,

Ami sei mate, sei fila fali ba rai rahun.

Maibé ita sei haraik moris hias,

Rai-klaran sei hetan íilas foun. Refrão

 

Hahí nafatin Maromak,

Maromak haksolok ho Nia kriatura.

Maromak sée tilun mai ha’u nia hananu,

Ha’u sei haksolok ho Maromak. Refrão

 

Segunda Leitura                                                                                                                                                          1 Cor. 12, 3b-7, 12-13

Lia housi São Paulo nia suratBa sarani sira iha Corinto:

Maun-alin sira: La ho Espírito Santo kbiit ema ida la bele hatene: “ Jesus mak Na’i”. Tebes duni, Espírito nia di’ak oi-oin, maibé Na’i ida de’it. Hahalok iha oi-oin, maibé Maromak ida de’it. Nia mak halo buat tomak iha ema hotu-hotu. Nu’udar ita ema ida, isin ida de’it; isin ida, maibé baluk barak. Baluk sira hotu maski barak, sira halo isin lolon ida de’it; nune’e mos Cristo. Tebes duni, ita hotu sarani hodi Espírito santo ida de’it atu sai ema ida de’it, maski ita balu Judeu, balun Grego, balun atan, balun laós atan. Ita hotu-hotu simu Espirito santo ida de’it.

Maromak Futar Lia

 

Sequência:

Espírito Santo hiit-An mai,

Haksolok netik Ita emar!

Hakmanek hodi Ita di’ak,

Ami neon no ami laran!

 

Ita ami nia ksolok duni,

Maromak kmanek tebes!

Wé ulun, áhi-knulu no domin,

Ami klamar sira nia kbiit!

 

Aman Maromak nia kbiit

Haraik kmanek hitu

Tuir menon Maromak,

Ita ami nia lia-fuan!

 

Maromak ami neon,

Haraik domin mai ami laran!

Haraik Ita nia kbiit mai ami,

Ami, mesak ema susar na’in de’it!

 

Hadook housi ami funu-balu,

Haraik Ita dame mai,

Atu ami hodi Ita kbiit no roman

Hadook-an housi buat aat hotu.

 

Tulun ami hatene Aman Maromak,

Hatene nu’udar Oan Maromak,

Tulun ami hatene,

Ami fiar Ita nafatin.

 

Glória ba Aman Maromak,

Glória ba Maromak Oan nebé moris-hias ona;

Glória ba Epírito Santo ksolok na’in;

Glória ba nafatin.

Amen.

 

Aclamação                                        

Refrão : Aleluia. Aleluia!! Repete-se

Espírito santo hiit-an mai!

Haksolok ita emar sira,

Hakmanek sira neon no laran

Hodi ita nia kmanek. Refrão

 

Evangelho                                                                                                                                                                                      Jo 20, 19-23

Na’i Jesus Cristo nia Evangelho nu’udar São João haktuir:

Iha loron nebá, katak iha loro kraik, loron uluk semana nian, uma nebé Apóstolo sira hela ba, odamatan taka metin, tan sira ta’uk Judeu sira. Sei nune’e hela, Jesus mosu mai hamriik iha sira leet, dehan: “Hakmatek hela Ho imi!” Dehan tiha nune’e, Jesus hatudu ba sira, Nia liman no sorin kanek. Haré tiha Jesus, Apóstolo sira haksolok teb-tebes. Jesus lia tun teni ba sira: “Hakmatek hela ho imi! Nu’udar Aman Maromak haruka Ha’u mai, nune’e mos, Ha’u haruka imi ba!” Ne’e hotu tiha, Jesus húu íis ba sira, dehan: “Simu Espírito Santo ba! Ba ida nebé imi perdua nia salan, nia sei hetan perdua ba nia salan; ba ida nebé imi la perdua nia salan, nia sei la perdua ba nia salan.

Lia Maksoyn.

Leave a Reply

Your email address will not be published. Required fields are marked *