shadow
Diocese de Dili > NOTÍCIAS > LETURA DIÁRIA > Segunda-Feira, X Semana Tempo Comum (ANO A)

Segunda-Feira, X Semana Tempo Comum (ANO A)

Primeira Leitura                     1Rs. 17. 1-6

Lia housi Primeiro Livro Liurai sira nian:

Iha loron hirak nebá, Elias, profeta housi Tisbé, rai Galaad nian, dehan ba liurai Acab: “Tebes duni, Na’i, Israel nia Maromak moris hela, ba Nia ha’u serbi, nune’e, iha tinan hirak ne’e nia laran, sei la iha maho- uen no udan, seláe uainhira ha’u dehan!”

Hafoin, Na’i lia tun ba profeta nune’e: “ Sai housi ne’e, ba iha Loro-Sa’e no hôrik-an iha ué boot Querit nian nebé hela iha loro-sa’e Jordão nian. Ó sei hemu ué boot ne’e, no Ha’u sei haruka manu-metan sira atu fó aihan ba ó iha nebá”. Elias ba hodi halo tuir nu’udar  Na’i dehan; ba hôrik-an tiha iha úe boot Querit nian nebé hela iha loro-sa’e Jordão nian. Manu metan sira dader-dader lori pão no iha lokraik na’an ba nia; nia hemu housi ué boot ne’e.

Maromak Futar Lia.

 

Salmo Responsorial                                                                                                             Sal. 120(121). 1-2, 3-4, 5-6, 7-8 (R. cf. 2)

Refrão : Ita nia tulun mai housi Na’i, be halo lalehan no rai!!! Repete-se

Ha’u foti matan ba foho,

Tulun sei mai housi nebé?

Ha’u nia tulun mai housi Na’i

Be halo lalehan no rai. Refrão

 

Nia sei la husik atu ó ain kois,

Ó nia mata-dalan la toba;

La toba no matan la dukur,

Israel nia tulun na’in. Refrão

 

Na’i mak ó hôrik fatin,

Nia iha nafatin ó nia sorin.

Iha loron, loron sei la halo áat ba ó

No mós fulan iha kalan. Refrão

 

Na’I sei hasai ó housi áat,

Nia tau matan ba ó moris.

Na’i sei la’o hamutuk ho ó,

Iha ó nia moris tomak. Refrão

 

Aclamação                                                                                                                                                                                          Mt. 5. 12ª

Refrão : Aleluia, Aleluia!! Repete-se

Imi haksolok ba, hahí ba, basá,

imi nia kolen iha lalehan ua’in  liu. Refrão

 

Evangelho                                                                                                                                                                                        Mt. 5. 1-12ª

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus haré ema lubun boot, Nia sa’e ba foho. Hafoin, Nia tur tiha, escolante sira besik ba Nia. Nia hahu hanourin sira hodi dehan nune’e: “ Ksolok ba ema kiak sira nebé kiak iha laran, basá, reino lalehan sira nian. Ksolok  ba sira nebé tanis, basá,  sira sei hetan kmaan. Ksolok ba sira nebé haraik-an, basá, sira sei simu rai hanesan liman-rohan. Ksolok ba sira nebé hamlaha no hamrook justiça, basá, sira sei bosu. Ksolok ba sira nebé laran luak, basá, sira sei hetan di’ak. Ksolok ba sira nebé laran mós, basá, sira sei haré Maromak. Ksolok ba sira nebé buka dame, basá ema sei bolu sira Maromak oan. Ksolok ba sira nebé ema duni, fó terus tan buka justiça, basá, reino lalehan sira nian. Ksolok ba imi, uainhira, tan Ha’u, ema hateten áat imi, duni imi, hodi foti lia bosok oi-oin hasouro imi. Imi haksolok ba, hahí ba, basá, imi nia kólen iha Lalehan wa’in liu”.

Lia Maksoyn.

Leave a Reply

Your email address will not be published. Required fields are marked *