shadow
Diocese de Dili > NOTÍCIAS > LETURA DIÁRIA > SOLENIDADE SANTÍSSIMA CORPO E SANGUE DO SENHOR (ANO A)

SOLENIDADE SANTÍSSIMA CORPO E SANGUE DO SENHOR (ANO A)

Primeira Leitura       Deut. 8, 2-3. 14b-16a

Lia housi Livro Deuteronómio:

Iha loron hirak nebá, Moisés ko’alia ba povo nune’e: “Ó sei hanoin nafatin dalan sira hotu nebé Na’i, ó nia Maromak, halo ó la’o tuir iha rai-fuik maran tinan hatnulu nia laran. Ne’e, atu ó keta foti-an, atu koko ó nia laran, ó moris tuir eh lae Ninia ukun-fuan sira. Na’I hatún ó nia oin, halo ó hamlaha, fo han ó ho Maná nebé ó la hatene, ó nia bei-ala sira mos la hatene. Ne’e, atu hanourin ó katak ema kriatura la moris de’it ho ai-han: ema kriatura moris ho lia-fuan hirak nebé mai housi Na’i Nia futar ibun. Ne’e duni, ó keta haluha Na’i, ó nia Maromak: Nia mak hasai ó housi rai Egipto housi ema terus fatin. Nia halo ó liu housi rai-fuik maran nebé halo ta’uk ema, samean ibun-moruk no sakunar sira rain. Rai maran dekor, la hetan wé; Nia mak housi fatuk inan to’os halo wé suli ba ó. Nia mak fo han ó iha rai fuik-maran ho Maná nebé ó nia bei-ala sira la hatene”.

Maromak Futar Lia.

 

Salmo Responsorial                                                                                                                                     Sal. 147, 12-13. 14-15. 19-20

Refrão : Jerusalém hahí ó Na’in!!! Repete-se

Jerusalém hahí ó Na’in,

Sião, hana’i ó nia Maromak!

Nia harí metin ó nia uman,

Nia haraik bensa ba ó nia oan sira. Refrão

 

Nia haraik hakmatek ba ó rain,

Haraik ai-han di’ak liu ba ó;

Haruka Nia Lia-fuan mai rai-klaran

Lia-fuan ne’e la’o lemo rai. Refrão

 

Nia hatudu Nia Lia-fuan ba Jacob,

Nia haraik Nia Ukun-fuan no Lia-foun ba Israel.

La iha povo ida hetan di’ak nune’e;

Maromak la haklaken Nia kmanek ba povo seluk. Refrão

 

Segunda Leitura                                                                                                                                                                    1 Cor. 10, 16-17

Lia housi São Paulo nia surat ba sarani sira iha Corinto:

Maun alin sira: Cális kmanek nebé ami fo bensa laós ida de’it ho Cristo Nia Ran? Pão nebé ami fahe laós de’it ho Cristo Nia Isin? Tan iha de’it ai-han ida, ita bele wa’in tebes, halo isin ida de’it, basá, ita hotu hamutuk hola ai-han ida ne’e mesak.

Maromak Futar Lia.

 

Aclamação                                                                                                                                                                                       Jo. 6, 51-52

Refrão : Aleluia, Aleluia!! Repete-se

Na’i dehan:

Ha’u ai-han moris tun housi Lalehan;

Ema nebé han ai-han ne’e,

Sei moris ba nafatin. Refrão

 

Evangelho                                                                                                                                                                                        Jo. 6, 51-59

Na’i Jesus Cristo Nia Evangelho nu’udar São João haktuir:

Iha tempo nebá, Jesus hateten ba ema lubun boot nune’e: “Ha’u ne’e ai-han moris nebé tun housi Lalehan mai. Ema nebé han ai-han ne’e, sei moris ba nafatin. Ai-han nebé Ha’u sei fo, mak Ha’u nia Isin rasik, nebé Ha’u fo ba mundo nia moris”. Judeu sira hateten ba malu: “Oin sá, Nia bele fo Nia Isin mai ita han?” Jesus dehan teni ba sira: “Tebes, Ha’u dehan tebes ba imi: Imi la han karik Mane Maksoyn Nia Isin, imi la hemu karik Nia Ran, imi sei la hetan moris. Ema nebé han Ha’u Nia Isin, ema nebé hemu Ha’u Nia Ran, hetan moris ba nafatin; Ha’u sei halo nia moris hias iha loron ikus. Ha’u Isin ai-han lós duni, Ha’u Ran wé di’ak tebes. Ema nebé han Ha’u Isin, hemu Ha’u Ran, hela ho Ha’u, Ha’u hela ho nia. Hanesan Ha’u Aman nebé moris haruka Ha’u mai, Ha’u moris ho Nia; nune’e mos, ida nebé han Ha’u Isin, moris ho Ha’u. Ne’e ai-han nebé tun housi Lalehan; Laós hanesan ai-han nebé imi nia aman sira han. Sira mate tiha ona; Ema nebé han Ai-han ne’e, sei moris ba nafatin.

Lia Maksoyn.

Leave a Reply

Your email address will not be published. Required fields are marked *