shadow
Diocese de Dili > NOTÍCIAS > REFLEXÃO > JESUS HARAIK KBIIT BA ESCOLANTE SIRA ATU DUNI SAI ESPÍRITO AT SIRA NO FO ISIN DIAK BA MORAS SIRA

JESUS HARAIK KBIIT BA ESCOLANTE SIRA ATU DUNI SAI ESPÍRITO AT SIRA NO FO ISIN DIAK BA MORAS SIRA

Maun alin sarani doben sira,

 

Iha domingo ida ohin Na’i Maromak ninia futar liafuan nebé ita foin mak rona uluk nana’in nia hatudu-an mai ita nu’udar Maromak ida nebé presente nafatin iha ita ema sira nia leet iha historia tomak ita ema sira nian. No iha historia ne’e Nia hatudu-an nu’udar Maromak nebé preocupa nafatin ho ema sira no sempre hakarak diak ba ita ema sira be ninia criatura rasik. Nune’e’e mak nu’udar iha primeira leitura ita rona Nia lia tun housi ninia profeta Moises mai ita dehan “Imi koko no haré ona buat hotu nebé ha’u halo ona ba imi housi soi imi housi at sira tomak…Nune’eé houri ohin ba oin, imi rona duni ha’u lian karik, imi rai didiak duni ha’u nia lia hakotu (aliança) hodi halo tuir imi sei sai ha’u nia riku soin ida, reino sacerdote nian no nação santa ida iha povo hotu nia leet.

 

Maun alin doben sira, primeira leitura Na’i Maromak koalia los mai ita povo no rai Timor nian nebé hatudu iha historia katak houri uluk kedas sai povo ida ninian, povo ida nebé ho ninia tulun hetan maksoin housi ema liman besi asu nian, ema hakarak at sira nian no housi moras at oioin, liu liu soi ita housi moras at COVID 19 nebé oras ne’e halakon ona ema barak ninia moris. Oras ne’e dadaun ita moris iha ambiente Liberdade nia laran, mas que nune’e’e ita percisa tau atenção duni atu Liberdade ida ne’e halo ita la lao dook fali housi Maromak, la halo ita haluhan fali Maromak, la halo ita nega fali buat tomak nebé Maromak halo ona mai ita nu’udar povo no mos nu’udar nação ida. Manan sa lerek se ita hetan tiha Liberdade ita haluhan fali Maromak, se ita iha buat hotu hotu naton no naresin mai ita ninia moris maibé ita laiha Maromak iha ita ninia moris. Nu’udar povo no nu’udar nação ida Maromak nian.

 

Maun alin sira rona tuir ba ninia futar liafuan nebé ohin haktuir mai ita, nu’udar povo Maromak nian los duni mai ita buka atu sai nafatin ninia povo liu housi Rona nafatin Maromak no halo tuir ninia liafuan ho ninia ukun fuan sira hotu, hodi nune’eé ita sai nafatin Maromak ninia riku soin ida, reino sacerdote nian ida no nação santa ida iha rai no povo sira hotu nia leet. Concretamente ha’u hanoin ita ba halo tuir Maromak ninia futar liafuan ne’e liu housi: Rona no respeita malu, la hakarak-at ba malu, la rai odio ba malu, la hatete at malu, la lori lia falsu k alia bobar hodi hamonu malu, maibé hakarak diak deit hanesan Maromak hakarak diak deit mai ita, tulun malu deit no fo perdua ho paz ba malun deit hanesan Maromak ninia oan sira, hanesan Maromak halo tiha ona mai ita ida-idak no mai ita hotu.

 

Maun alin doben sira. Wainhira haré mai ita ninia situação rai laran be oras ne’e ita lao hela dadaun ho dificuldade oioin ho buat salak barbarak no haré mai buat sira be recentemente acontece iha ita ninia comunidade paroquial be ema at sira mai harahun ilas Na’in Feto Maromak nia Inan nian nebé tuir ha’u haré tamba ema at sira lakohi ita hahi hana’i Maromak nia-inan loron kalan, lakohi ita hahai hana’i Maromak ho LIAN MAKAS, Maromak ninia futar liafuan iha segunda leitura bolu duni ita nia atenção atu ita buka haré ba ita ninia moris hodi hadia buat barak iha ita ninia moris, hahu kedas housi ita ida idak ninia-an, ba toó maun alin sira no too ba ita ninia ukun na’in sira rai ida ne’e nian. Ne’e katak ita buka ho haraik-an hakribi ita ninia salan sira hodi ba dame malu lolos duni ho ita-an, ho ita ninia maun alin sira iha vida comunidade ka social nian no dame malu nu’udar lideres Maromak ninia povo nian. Ita sei halo duni ida ne’e atu ita bele hetan PAZ no Maksoin mai ita-an no ba ita rain nafatin ba nafatin.

Atu halo ida ne’e exige mai ita atu uluk nana’in ita pessoalmente, comunalmente no mos geralmente nu’udar nação ba dame malu uluk liu ho Naí Maromak, ho Jesus Cristo nu’udar dame na’in no nu’udar Maksoin lolos ema no rai klaran nian, no ba dame malu ho Naín feto Jesus Maromak ninia inan nebé ita falta respeito ba. Hodi dame malu nune’eé mak ita sei bele hetan duni dame lolos  no maksoin ida rohan laek mai ita-an no mai ita ninia rain Timor Leste ho tulun Naín Feto Timor nia Liurai Feto ninian. Oinseluk dame ita sei la hetan, maksoin ka moris diak ita sei la hetan.  

 

Doben maun alin sira, iha Evangelho Jesus bolu ita hotu hotu atu sai ninia apostolo. Aposolo dame, domin, perdão nian, apostolo laran luak no tulun na’in nian ba ema no ba rai hotu hotu, liu-liu ba ema sira nebé seidauk hatene Cristo no ba ema sira nebé hetan terus no susar tamba moras oioin, tamba situação política, social no economia nebé la favorável ba sira. Jesus convida ita atu sai apostolo nune’eé hahu kedas ho hahalok kmanek ida, HAHALOK HAROHAN NA’IN NIAN. Atu bele halao lolos knar apostolo nian ne’e ka fo testemunha lolos nu’udar Jesus ninia escolante ne’e ita tem que HAROHAN NO HAROHAN NAFATIN loro-lorn iha ita ninia moris tomak. Hodi halo nune’eé  mak ita foin bele iha kbiit hodi husu no fo perdão, fo dame no simu dame, hadomi no simu domin, sai laran luak no hetan laran luak, no sai tulun na’in no simu tulun wa’in basa Oração mak força nebé bele hakbiit ita wainhira ita nia kbiit la too ka kuran, oração halo ita hamutuk nafatin ho Maromak. Tanba ne’e maun alin sira wainhira ita la harohan ita labele hetan buat nebé ita hakarak, susar mosu wa’in liu tan, dificuldade sai todan liu tan no ita labele halao didiak ita ninia knar nu’udar sarani ka apostolo ida Cristo nian. Apostolo ba paz, ba perdão, ba laran luak no ba tulun na’in hodi tulun maluk sira sira seluk liu liu sira nebé moras atu bele hetan fali isin diak, no sira nebé lao iha nakukun laran atu bele hetan fali naroman iha moris ne’e.

 

Maun alin sira mai hamutuk nu’udar escolante Cristo nian ita fo nafatin testemunho moris sarani nian  nune’e hodi halo ema hotu bele hetan Maksoin ka hetan moris diak hanesan Maromak hakarak. Amen.

 

Becora, 14 de Junho 2020

Pb.

Leave a Reply

Your email address will not be published. Required fields are marked *