shadow
Diocese de Dili > NOTÍCIAS > LETURA DIÁRIA > XI DOMINGO TEMPO COMUM (ANO A)

XI DOMINGO TEMPO COMUM (ANO A)

Primeira Leitura                      Ex. 19, 2-6a

Lia housi livro Êxodo:

Iha loron hirak nebá, Israel oan sira sai housi Refidim, ba to’o iha rai-fuik maran sinai nian, iha nebá sira hela tiha ba. Israel hela tiha iha foho oin. Moisés sa’e tiha ba Maromak nia oin. Na’i bolu nia housi foho tutun, hodi dehan ba nia: “ Ó sei dehan nune’e ba Jacob nia uma laran, ó sei haklaken nune’e ba Israel oan sira. Imi haré tiha ona sá mak Ha’u halo ba ema sira Egipto nian, no oin sá Ha’u lori tiha imi, iha manu makikit nia liras leten hodi lori imi mai to’o Ha’u. Ohin ba oin, karik imi rona tebes Ha’u lian, karik imi rai didi’ak Ha’u lia hakotu hodi halo tuir, imi sei sai Ha’u nia riku soin ida iha povo hotu-hotu nia le’et, tamba rai tomak Ha’u  nian. Imi sei hela mai Ha’u reino sacerdote sira nian ida, no nação santa ida”.

Na’i Nia Futar Lia.

 

Salmo Responsorial                                                                                                                                                    Sal. 99(100), 2. 3. 5

Refrão : Ita mak povo Maromak nian, no bibi sira nia luhan nian!!! Repete-se

Rai tomak hahí Na’i,

Serbi Na’i ho ksolok,

Ba to’o Nia ho hananu ksolok nian. Refrão

 

Imi hatene katan Na’i mak Maromak!

Nia haki’ak ita, no ita ninian.

Ita ninia povo no bibi sira nia luhan nian. Refrão

 

Na’i di’ak tebes!

Nia laran lu’ak rohan la’ek.

Nia lia menon sei da’et ba oan no bei-oan sira. Refrão

 

Segunda Leitura                                                                                                                                                                          Rom. 5, 6-11

Lia housi São Paulo nia surat ba sarani sira iha Roma:

Maun-alin sira: wainhira ita sei kbiit laek, ne’e mak, iha nia oras rasik, Cristo mate tamba ema sala nain sira. Susar tebes ema ruma mate netik ema laran moras ida; tan ema di’ak ida, karik ema ruma buka atu mate netik. Maibé, Maromak hatudu nia domin mai ita nune’e: Cristo mate tan ita, wainhira ita sei hela nu’udar sala nain. Oras ne’e, ita hatudu ita laran mos housi Nia Futar Ran, housi Nia rasik, ita sei soy ita-an housi hirus Maromak nian. Tebes, karik wainhira ita sei funu maluk, ita ba dame malu ho Maromak housi Nia Oan nia mate, di’ak liu fali ida ne’e, hadame malu tiha, ita sei soi ita an housi Nia moris. Maibé, sei iha tan. Ita hasa’e mós neon ksolok iha Maromak housi ita Na’in Jesus Cristo: housi Nia mak oras ne’e ita hetan dame ne’e.

Nai Nia Futar Lia.

 

Aclamação                                                                                                                                                                                            Mt. 9, 39

Refrão : Aleluia, Aleluia!! Repete-se

Husu ba to’os Na’in ba

Hodi haruka ema serviço ba Nia toos. Refrão

 

Evangelho                                                                                                                                                                                Mt.  9, 36-10, 8

Na’i Jesus Cristo nia Evagelho nu’udar São Mateus haktuir:

Iha tempo nebá, Jesus haré tiha ema lubun boot,  Nia hanoin netik de’it sira, tama sira la’o kole ona no laiha ona kbiit hanesan bibi-malae sira be laiha bibi-atan. Nune’e, Jesus dehan ba Nia escolante sira: “Toos bot teb-tebes, maibé ema atu serviço iha toos ne’e, oitoan de’it. Ne’e duni harohan ba toos na’in haruka ema serviço Na’in sira mai, atu serviço iha nia toos.” Hafoin, bolu tiha escolante sira ba besik Nia hodi haraik ba sira ukun, atu duni sai espírito aat, fo isin di’ak ba moras sira no moras oi-oin tomak. Naran sira apóstolo na’in sanulu resin rua nian mak ne’e: Uluk nana’in, Simão nebé hanaran Pedro, no Andre, nia alin; Tiago no Zebedeu nia oan, no João, nia alin, Filipe no Bartolomeu, Tomé no Mateus, be publicano; Tiago, Alfeu nia oan, no Tadeu; Simão be zeloso, no Judas Iscariotes, ida nebé ikus mai fan Nia. Jesus haruka sira na’in sanulu resin rua ne’e ba, wainhira fo tia ba sira lia-menon hirak ne’e:” Imi keta la’o tuir Gentio sira nia dalan, keta tama iha samaritano sira nia cidade.  Imi ba uluk liu bibi-malae sira be lakon housi uma-kain Israel nian. Iha dalan imi haklaken hodi fo sai katak Reino Lalehan nian besik to’o ona. Imi fo isin di’ak ba moras sira, halo mate sira moris hias, hamos sira be iha moras lepra, duni sai demónio sira ba. Imi simu degraça tiha de’it. Imi sei fo degraça de’it ba.

Lia Maksoyn.

Leave a Reply

Your email address will not be published. Required fields are marked *