shadow
Diocese de Dili > NOTÍCIAS > LETURA DIÁRIA > Quinta-Feira, XI Semana Tempo Comum (ANO A)

Quinta-Feira, XI Semana Tempo Comum (ANO A)

Missa Crismal

 

Primeira Leitura                            Is. 61. 1-3a, 8b-9

Lia  housi Livro Isaías nian:

Na’i Maromak nia Epírito iha ha’u leten, basá Na’i tau mina mai ha’u. Nia haruka ha’u ba haklaken Lia-foun-di’ak ba ema sira be terus, halo di’ak ba sira nebé laran susar, fó hatene katak sei husik tiha sira be ema káer, sira be ema dadur, hodi dehan sai tinan graça Na’i nian no loron justiça nian. Nia haruka ha’u atu fó ksolok ba ema sira nebé neon kraik. Lori ba ema sira be terus iha Sião la’os aho-kdesan maibé prémio, la’os hena metan maibé mina ksolok, la’os laran susar, maibé hahí. Ema sei hanaran imi, ‘ita nia Maromak Nia na’ilulik sira’ no temi imi naran, “ita nia Maromak Nia ministro sira”. Ha’u sei fó lolós sira nia kolen, Ha’u sei halo moruk ida rohan laek ho sira.

Sira nia bei oan sira naran sei boot iha povo nia leet, belar ba nação sira hotu. Ema sira hotu nebé haré sira, sei hatene katak sira povo nebé simu Na’i Nia bensa.

Maromak Futar Lia.

 

Salmo Responsorial                                                                                                                          Sal. 88(89). 21-22, 25-27, (R. 2ª)

Refrão : Ha’u sei hananu nafatin Na’i Nia laran luak!!! Repete-se

Ha’u hetan ha’u atan David,

Ha’u foti nia ho mina santo;

Ha’u hela nafatin iha nia sorin,

Hodi tahan nia ho Ha’u nia kbiit. Refrão

 

Ha’u sei hatudu Ha’u nia laran mós no laran luak ba nia;

Hodi Ha’u naran, nia ukun sei metin nafatin.

Nia sei bolu Ha’u: “Ita, ha’u Aman,

Ha’u Maromak, ha’u Maksoyn”. Refrão

 

Segunda Leitura                                                                                                                                                                           Apoc. 1. 5-8

Lia  housi Livro Apocalipse nian:

Jesus Cristo sasin nebé laran metin, Oan Mane boot housi ema mate sira leet, no Liurai liura sira rai ne’e nian. Ba Nia nebé hadomi ita no hasai tiha ita housi ita nia sala sira ho Nia ran, no halo ita sai reino na’ilulik nian atu serbi Maromak, Nia Aman; ba Nia glória no kbiit wa’in ba nafatin. Amen. Nia mak ida nebé sei mai iha kalohan laran; no matan hot-hotu sei haré Nia; sira hotu nebé sona borus Nia, no suku sira hotu iha rai sei tanis tanba Nia. Ne’e mak lialós. Amen. “Ha’u mak Alfa no Omega”, Na’i Maromak dehan, Nia nebé iha ohin, uluk no atu mai, Maromak kbiit wa’in.

Maromak Futar Lia.

 

Aclamação                                                                                                                                                                    Is. 61. 1 (cf. Lc. 4. 18)

Refrão : Ami hahí Ita, Liurai glória rohan laek nian!! Repete-se

Na’i nia Espírito iha ha’u leten;

Nia haruka ha’u ba haklaken lia-foun-di’ak ba kiak sira. Refrão

 

Evangelho                                                                                                                                                                                        Lc. 4. 16-21

Na’i Jesus Cristo nia Evangelho nu’udar São Lukas haktuir:

Iha tempo nebá, Jesus ba to’o nia rai Nazaré. Tuir nia lisan, iha sábado ida, Nia tama iha sinagoga, hamriik atu lê. Sira fó ba Nia Livro Profeta Isaías nian. Nia loke, haré kona ba fatin nebé hakerek, dehan:

“Na’i Nia Espírito hela ho Ha’u, tan Nia foti Ha’u, Nia haruka Ha’u, atu haklaken Lia-Foun-Di’ak ba kiak sira, liberdade ba ema sira be iha kloot laran. Nia haruka Ha’u, atu fó hatene sai tinan ida rahun di’ak mai housi Maromak”.

Taka hikas tiha Livro, Jesus fó fali ba ema hein sinagoga; hafoin Nia tur tiha. Nune’e, Jesus hahú hateten ba sira: “Liafuan Escritura nian nebé imi foin rona daudaun ohin, sai tuir lolós ona!”

Lia Maksoyn.

Leave a Reply

Your email address will not be published. Required fields are marked *