shadow
Diocese de Dili > NOTÍCIAS > LETURA DIÁRIA > XII DOMINGO TEMPO COMUM (ANO A)

XII DOMINGO TEMPO COMUM (ANO A)

Primeira Leitura                      Jer. 20, 10-13

Lia housi Livro Profeta Jeremias:

Jeremias dehan: “Ha’u rona lia aat barak housi povo sira: ‘Iha fatin tomak ema laran susar! Foti lia hasouru nia! Mai, ita foti lia hasouru nia! Ema hotu nebé la’o di’ak ho Ha’u, hein hela de’it atu hare uainhira Ha’u la’o sala dalan: ‘Keta nia husik ema bosok nia karik, atu ita bele hanehan nia; hanesan ne’e ita bele halo aat ba nia!’ Maibé, Na’i hamutuk ho ha’u nu’udar asuua’in maka’as tebes, ha’u nia funu balu sira sei lakon mohu. Sira sei moe teb-tebes, tan sira lakon; ema ida sei la haluhan katak sira lakon ba nafatin. Mundo tomak nia Na’in, Ita Boot be koko ema di’ak tama to’o ema neon, ema laran, ha’u sei hare castigo nebé Ita haraik ba ema sira ne’e, tan ha’u tau ha’u nia moris iha Ita futar liman. Hananu ba Na’i, hahi Na’i tan Nia tahan ema ki’ak nia moris hasouru ema aat sira liman.

Maromak Futar Lia.

 

Salmo Responsorial                                                                                                                               Sal. 68(69), 8-10. 14. 17. 33-35

Refrão : Tan Ita nia laran di’ak, Na’i, rona ha’u!!! Repete-se

Na’i, tan Ita, ha’u terus barak, ha’u nia laran susar tebes.

Ha’u, ema leet ba ha’u maun sira, ema rai seluk,

ba ha’u inan nia oan sira.

Ita kadunan naresin iha ha’u laran, ema foti lia leet hasouru ha’u. Refrão

 

Na’i, ha’u hasa’e orasaun ba Ita,

tan Ita domin mai tahan ha’u.

Na’i, rona ha’u, tan Ita laran di’ak no kmanek;

tan Ita nia laran luak, haraik matan mai ha’u. Refrão

 

Ema kiik, haksolok, rona mai,

buka Maromak, imi nia laran sei haksolok.

Na’i, rona ema ki’ak, la hewai ema nebé moris ho susar.

Rai no Lalehan hahi Maromak,

tasi no buat tomak moris iha tasi laran. Refrão

 

Segunda Leitura                                                                                                                                                                       Rom. 5, 12-15

Lia housi São Paulo nia surat ba sarani sira iha Roma:

Maun-alin sira: Housi ema ida de’it salan mosu iha mundo; housi salan mosu mate. Nune’e, ema tomak hetan mate, tan ema hotu-hotu halo salan. To’o iha Moisés nia ukun, sala iha ona mundo. Maibé, la iha karik ukun ida, la bele dehan katak sala, ema nebé halo salan. Nune’e, mate iha ona housi Adão to’o Moisés; iha mos sira nebé la halo salan hanesan sala nebé Adão halo. Adão, Jesus Cristo nebé sei mai, nia ílas. Maibé, kmanek nebé ita simu leet la hanesan salan. Hanesan, housi ema ida de’it nia salan ema hotu-hotu mate, nune’e liu tan, Maromak nia kmanek, Maromak nebé mai housi ema ida de’it, Jesus Cristo, sei haraik halo ua’in ba ema hotu-hotu.

Maromak Futar Lia.

 

Aclamação                                                                                                                                                                                         Mt. 10, 28

Refrão : Aleluia, Aleluia!! Repete-se

Keta ta’uk sira nebé oho isin,

maibé labele oho klamar. Refrão

 

Evangelho                                                                                                                                                                                   Mt.  10, 26-33

Na’i Jesus Cristo nia Evagelho nu’udar São Mateus haktuir:

Iha tempo nebá, Jesus dehanba Apóstolo sira: “Keta tauk ema sira, basa la iha buat ksumik ida nebé sei la hetan; La iha buat ida nebé ema sei la hatene. Lia hirak nebé Ha’u dehan subar ba imi, imi sei haklaken ba ema tomak; Lia nebé imi rona daudaun,  imi sei ba haklaken ba uma-kain tomak. Keta tauk sira nebé oho isin, maibé, la bele oho klamar. Tauk liu-liu Ida nebé bele halakon imi nia klamar, no isin iha Inferno. Ema la fa’an manu kiik rua ba osan doit ida? Manu ne’e ida sei la monu ba rai,  uainhira Maromak la hakarak. Imi nia fuuk lahan mos sura hotu. Ne’e duni, keta tauk: Imi folin liu manu fuik barak! Ema nebé hana’i Ha’u iha ema seluk nia leet, Ha’u mos sei hatene nia Iha Aman nebé iha Lalehan nia oin. Maibé, ida nebé heli Ha’u iha ema seluk nia leet, Ha’u mos sei la hatene nia iha Ha’u Aman iha Lalehan nia oin.

Lia Maksoyn.

Leave a Reply

Your email address will not be published. Required fields are marked *