shadow
Diocese de Dili > NOTÍCIAS > LETURA DIÁRIA > Terça-Feira, XII Semana Tempo Comum (ANO A)

Terça-Feira, XII Semana Tempo Comum (ANO A)

Primeira Leitura     2 Rs. 19. 9b-11, 14-21, 31-35a, 36

Lia housi Segundo Livro Liurai sira nian:

Iha loron hirak nebá, Senaquerib, liurai Assiria nian haruka manu ain sira ba Ezequias, ho lia hirak ne’e: “imi sei dehan ba Ezequias, liurai Judá nian, nune’e: ‘ ó keta fiar ó nia Maromak, iha ida be ó tau neon, Nia dehan ba ó karik: Jerusalém sei la monu ba liurai Assíria nia liman!’ tebes, ó hatene buat nebé liurai sira Assíria nian halo ba nação hot-hotu, uainhira hamohu lakon sira. Ó hanoin katak ó mesak de’it bele hela?”.

Ezequias simu tiha surat housi manu ain sira liman hodi lê. Hafoin, nia sa’e ba Templo, loke surat ne’e iha Na’i nia oin, hodi harohan ho lia fuan hirak e’e: “Na’i, Israel nia Maromak, Ita be hatodan-An iha kadunan ida be áas liu Querubim sira nian, ita mesak de’it mak Maromak reino hot-hotu mundo rai-klaran nian, Ita mak halo lalehan no rai. Na’i, sée tilun mai hodi rona, loke matan mai hodi haré. Ita rona Senaquerib nia liafuan sira nebé haruka mai hodi dehan áat Maromak moris nian.

Tebes duni, Na’i, liurai sira Assíria nian hamohu lakon nação sira no sira rain. Soe sira nia Maromak ba ahi, tanba la’os Maromak lós, maibé ema nia liman fatin, hodi halo ho ai no fatuk; tan ne’e sira bele halo rahun. Maibé, Na’i oras ne’e, soi ami housi Senaquerib nia liman, nune’e povu hot-hotu raiklaran nian bele hatene katak Ita, Na’i, mesak de’it mak Maromak”.

Nune’e, profeta Isaías, Amós nia oan mane, haruka fó hatene ba Ezequias nune’e: “Na’i, Israel nia Maromak dehan nune’e: Ha’u rona tiha ona harohan nebé ó hasa’e mai kona ba Senaquerib, liurai Assíria nian. Ho liafuan hirak ne’e mak Na’i ko’alia hasouru nia: ‘Nia hakribi ó hodi hamoe ó, Sião nia oan feto sala laek; kaku ulun iha ó kotuk Jerusalé sei monu resto ida no housi foho Sião sei mosu sobrevivente sira. Kbi’ít Na’i lalehan no rai nia mak sei halo buat ne’e hotu’. Na’i ko’alia kona ba liurai Assíria nian nune’e: ‘Nia sei la tama iha cidade ida ne’e, rama isin ida mós sei la tuda hasouru nia; sei la hasouru ho escudo eh kalili ida, sei la hamriik hasouru nia atu funu. Nia sei fila housi dalan nebé nia mai, maibé, sei la tama iha cidade ida ne’e. Na’i nia futar lia! Ha’u sei souri cidade ida ne’e tan Ha’u-an rasik no tan Ha’u atan David”.

Iha kalan ida ne’e duni, Na’i nia Anjo mosu iha assirio sira nia batane hodi oho ema rihun atus ida ualu-nulu. Senaquerib, liurai Assíria nian, hamriik housi nia hela fatin hodi fila ho nia emar sira hodi ba hôrik iha Nínive.

Maromak Futar Lia.  

 

Salmo Responsorial                                                                                                                             Sal. 47 (48). 2-4, 10-11(R. 9d)    

Refrão : Na’i, hatau nafatin Ita nia hôrik fatin!!! Repete-se

Na’i boot tebes, so’i simu hahí

Iha ita Maromak nia cidade,

Iha Nia foho santo ba kmook liu foho oan sira,

Nu’udar ksolok rai hotu nian. Refrão

 

Foho Sião nu’udar rohan tasi-feto nian,

Mak cidade Liurai Boot nian.

Iha nebá Maromak hatudu-An,

Hanesan kota metin tebes ida. Refrão

 

Maromak, ami hanoin ita laran-luak,

Iha ita tempo laran.

Hanesan Ita naran, Maromak,

Nune’e, hahí Ita housi rai-ulun to’o rai-ikun. Refrão 

 

Aclamação                                                                                                                                                                                             Jo. 8. 12

Refrão : Aleluia, Aleluia!! Repete-se

Na’i dehan: Ha’u mundo nia roman; ema sé tuir Ha’u,

Sei hetan roman moris nian. Refrão

 

Evangelho                                                                                                                                                                                   Mt. 7. 6, 12-14

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus hateten ba nia escolante sira: “keta fó buat nebé santo ba asu sira. Keta soe imi nia fatuk murak ba fahi sira; lae karik, sira ne’e sei sama imi nia fatuk murak, hafoin fila hasouru imi hodi tata les imi.” “Ne’e duni, buat hotu nebé imi hakarakema halo ba imi, imi mós halo ba sira; basá ne’e mak ukunfuan no profeta sira.”

“Tama housi odamatan kloot ba; basá odamatan boot no dalan luan mak lori ema atu lakon an, no ema barak liu housi nia. Maibé odamatan kloot tebes no dalan kiik duni mak lori ema ba moris, no ema uitoan de’it mak hetan nia,”

Lia Maksoyn

Leave a Reply

Your email address will not be published. Required fields are marked *