shadow
Diocese de Dili > NOTÍCIAS > REFLEXÃO > “HAKBESIK MAI HAU IMI HOTU NEBÉ KOLE NO MORIS SUSAR, HAU SEI FO KMAN BA IMI”.

“HAKBESIK MAI HAU IMI HOTU NEBÉ KOLE NO MORIS SUSAR, HAU SEI FO KMAN BA IMI”.

SIMU HAU NIA UKUN BA HODI BA NATI TUIR HAU, TAN HAU LARAN KMAUS NO HARAIK-AN; NO IMI SEI HETAN HAKMATEK … BASA HAU NIA UKUN MAMAR, HAU NIA NAHA KMAN” MAT 11, 28-29.

 

Maun alin sarani doben sira, Na’i Maromak ninia futar lia fuan domingo ida ne’e nian convida Ita atu ba reflete hamutuk kona ba KSOLOK. Ksolok lolos ida nebé ita ema hotu hakarak no sei hela ho ema nafatin ba nafatin. Hahu kedas ho ksolok ne’e ninia hun ka we matan nebé mak housi leitura sira be ita foin rona dehan mai ita katak mak MAROMAK RASIK. Maromak ne’e duni mak lori ksolok mai ita ema sira liu housi ninia presença no ninia ukun ho kbiit wa’in lolos.

Iha primeira leitura Na’i Maromak halo ita laran metin lolos iha moris ida nakonu ho ksolok be sai possivel wainhira Maromak mai hôrik ho ita no ukun ita. Wainhira ita hala’o moris ida ne’e ho Maromak no housik Maromak ukun ita, moris ida nune’e’e sei mósu duni iha ita leet, maibé la ho Maromak, ho fali ita ninia esforço de’it moris ksolok ita nian sei la tahan no sei lakon fila fali. Na’i Maromak dehan “imi haksolok ba… hananu iha ksolok ba, … liurai sei mai hasoru ó, Nia ema Santo, ema kbiit na’in. Nia sei halakon funu no buat hotu be hamósu funu, nia sei ukun housi tasi feto toó tasi mane, housi rai ulun toó rai ikun.” Ne’e katak Na’i Maromak mak ukun mundo rai klaran ne’e no ema hotu-hotu. Ba ema hotu nebé mak tau fiar iha nia sei hetan ksolok no hakmatek lolos iha sira ninia moris. Ksolok no hakmatek ida nebé sei hela metin nafatin ba nafatin iha ema sira ne’e ninia leet tamba Maromak mak ksolok no dame ninia hun.

Segunda leitura hanorin ita katak ksolok ida ne’e sei halo ita sente lolos moris ne’e ninia folin basa ksolok lolos ida ne’e so bele mai de’it  housi Maromak nebé moris ninia hun ne’e. Nune’e se Maromak halo ema sira be fiar iha nia hetan ksolok, ne’e katak Maromak halo mós ema sira ne’e hetan moris lolos ida. Moris ida nakonu duni ho ksolok lolos nian. Ida neé Na’i Maromak halo mai ita ema sira liu housi ita Na’i Jesus Cristo nebé Na’i Maromak iha ninia Espírito halo moris hias fila fali housi mate hodi halakon sala no mate. Tan neé mak ita mós sei hetan moris, Maromak sei haraik moris ida ksolok lolos mai ita. Iha Carta ba sarani sira iha Roma São Paulo hateten “Maun alin sira, Maromak ninia Espírito hôrik karik iha imi, laos sasan rai ne’e nian mak ukun imi, maibé Espírito mak ukun imi. Maromak nebé halo Jesus moris hias housi mate nia Espírito hôrik ho imi karik Nia sei haraik mós moris ba imi ninia isin mate.” Los duni maun alin doben sira, ita ema moris tamba Maromak ninia Espírito nebé hu mai ita ninia Isin mate ne’e.

Ita ema laos moris tamba material ruma maibé ita moris tamba Maromak ninia Espírito nebé hôrik iha ita. Iha moris loro-loron nian moris ksolok ida aparentemente de’it ne’e hamósu exgigência material barak tebes mak ita percisa hodi tulun ita ninia moris, hahu kedas housi uma, hatais, kareta, telephone, etcetera. Maibé ne’e hotu iha realidade la garante moris ksolok lolos ida hanesan ita rona ohin Maromak hakarak mai ita. Ita percisa mós moris tuir Espírito Maromak ninia hakarak nian nebé ita bele hare concreta iha relação moris nian be hari iha hadomi malu, respeita malu, tulun malu, rona malu, cuidado malu, perdua malu, laran luak ba malu no hahalok espírito nian wain tebes nebé ita percisa haklean iha ita ema sarani sira ninia moris hodi ho tan tulun material sira nian ita bele hetan duni moris ida KSOLOK NO HAKMATEK lolos nu’udar Maromak promote no hakarak mai ita. Ita ema be Maromak halo mai iha ita ninia-an isin no klamar neé buka hala’o moris ne’e iha ninia totalidade, katak moris iha isin no klamar lolos tuir Maromak haraik mai ita. Ita la moris de’it iha isin, ne imi haklamar de’it. Ita buka moris di’ak lolos iha isin no mós iha klamar.

  • Doben maun alin sira, iha Evangelho Na’i Jesus expressa ninia laran ksolok hodi hasae agradece ba Aman Maromak tamba Maromak hatudu segredo moris ksolok nian ba ninia povo iha ninia oan mane mesak Jesus Cristo ninia-an. Iha Cristo nebé hori mundo ne’e hahu mai kedas ona Nia Liurai, liurai rai hotu nian.

Iha Cristo neé ninia misterio terus, mate no moris hias nian Maromak revela ka hatudu ba mundo katak Maromak mak ukun mundo basa laiha tan buat ida iha mundo, neim buat at ida mak bele ukun mundo no bele ukun fali ema sira nebé fiar iha Maromak;

  • Ema hotu nebé fiar iha Cristo hetan moris ksolok no dame lolos nian. Moris ksolok no dame ida nebé sei rohan laek, hahu kedas ona iha rai klaran ne’e rohan laek ba hamutuk iha Maromak.

Tan ne’e maun alin doben sira, mai ita hotu nebé fiar iha Maromak no iha moris ne’e hakarak hetan nafatin moris ksolok no dame lolos nian ida ne’e hakbesik an ba Jesus Cristo nafatin no hametin ita-an iha moris hamutuk ho Jesus nafatin atu nune’e’e moris ida nune’e’e ita sei hetan duni hahu oras ne’e no ba nafatin.

Jesus rasik dehan :

“HAKBESIK MAI HAU IMI HOTU NEBÉ KOLE NO MORIS SUSAR, HAU SEI FO KMAN BA IMI. SIMU HAU NIA UKUN BA HODI BANATI TUIR HAU, TAN HAU LARAN KMAUS NO HARAIK-AN; NO IMI SEI HETAN HAKMATEK … BASA HAU NIA UKUN MAMAR, HAU NIA NAHA KMAN” MAT 11, 28-29.

 

 

Domingo Comum XIV,  Motael, 05 de Julho 2020, Pb.

Leave a Reply

Your email address will not be published. Required fields are marked *