shadow
Diocese de Dili > NOTÍCIAS > LETURA DIÁRIA > XIV DOMINGO TEMPO COMUM (ANO A)

XIV DOMINGO TEMPO COMUM (ANO A)

Primeira Leitura                         Zac. 9, 9-10

Lia housi Livro Profeta Zacarias:

Na’i ko’alia nune’e: “Sião nia oan feto, haksolok ba; Jerusalém nia oan feto, hananu haksolok ba. Ó nia Liurai mai hasouru ó:  Nia, ema Santo, ema kbiit na’in; ho haraik-an, mai hasouru, sa’e kuda ida, kuda ksalak ida, kuda burro nia oan. Nia sei halakon housi Efraim kareta sira funu nian; sei halakon housi Jerusalém kuda sira funu nian; sei halakon mós rama funu nian. Nia sei haklaken hakmatek ba povo tomak:  Nia sei ukun tasi feto to’o tasi mane, housi mota boot Eufrates to’o rai ikun rai ulun.”

Maromak Futar Lia.

 

Salmo Responsorial                                                                                   Sal. 144(145), 1-2. 8-9. 10-11. 13cd-14

Refrão : Na’i, ha’u nia Maromak, ha’u nia Liurai, ha’u sei hahí nafatin Ita naran!!! Repete-se

Na’i, ha’u nia Maromak, ha’u nia Liurai, ha’u hahí Ita;

ha’u hahí nafatin Ita naran. 

Kalan loron ha’u hana’i Ita,

hahí nafatin Ita naran. Refrão

 

Na’i laran kmaus no di’ak,

la rai hirus, perdua nafatin.

Na’i hatudu laran di’ak ba ema tomak,

hadomi nafatin Nia criatura sira. Refrão

 

Na’i, ema hotu-hotu hana’i Ita,

ema sarani tomak hahí Ita.

Sira haklaken Ita reino nia kbiit,

hodi halo ema hotu hatene Ita nia domin. Refrão

 

Na’i halo tuir nia lia-fuan,

laran di’ak iha nia hahalok tomak.

Na’i tahan sira nebé atu monu;

Na’i tulun sira nebé neon susar. Refrão

 

Segunda Leitura                                                                                                                                    Rom 8, 9. 11-13

Lia housi São Paulo nia surat ba sarani sira iha Roma:

Maun-alin sira: Maromak nia Espírito horik karik iha imi, laos sasan rai ne’e nian mak ukun imi, maibé, Espírito mak ukun imi. Maromak nebé halo Jesus moris hias housi mate, Nia Espírito ho imi karik, Maromak nebé halo Jesus moris hias housi mate, sei mós haraik moris ba imi nia isin maten hodi Nia Espírito nebé horik ho imi. Nune’e, maun-alin sira, ita iha karik tusan ruma, laos tan sasan isin nian, atu ita moris tuir isin nia hakaran. Basa, imi moris tuir karik isin nia hakaran, imi sei mate. Maibé, tuir Espírito, imi halo mate karik hahalok isin nian, imi sei moris.

Maromak Futar Lia.

 

Aclamação                                                                                                                                                           Mt 11, 28

Refrão : Aleluia, Aleluia!! Repete-se

Mai hamutuk ho Ha’u, imi tomak nebé moris susar no kole,

tan Ha’u sei hamahan imi nia kole. Refrão

 

Evangelho                                                                                                                                                      Mt 11, 25-30

Na’i Jesus Cristo nia Evagelho nu’udar São Mateus haktuir:

Iha tempo nebá, Jesus lia tun  nune’e: “Ha’u hahí Ita, Ha’u Aman, Lalehan no rai nia Na’in, tan Ita subar lialos hirak ne’e ba ema matenek no boot sira, maibé, Ita haklaken ba ema kiik sira. Nune’e duni, Ha’u Aman, tuir Ita nia hakaran. Buat hotu nebé Ha’u simu mai housi Ha’u Aman. Ema ida la hatene Oan Mane; Aman de’it mak hatene. Ema ida la hatene Aman; Oan de’it mak hatene no ida nebé Oan Mane hakarak fo hatene. Mai hamutuk ho Ha’u imi tomak nebé kole no moris susar, tan Ha’u sei hakman imi nia kole. Imi, tan Ha’u nia todan iha imi nia kabaas hodi halo tuir Ha’u, tan Ha’u laran maus, Ha’u haraik-An. Imi sei hetan ksolok ba imi nia klamar, tan Ha’u nia todan mamar, Ha’u nia naha kman.”

Lia Maksoyn.

Leave a Reply

Your email address will not be published. Required fields are marked *