shadow
Diocese de Dili > NOTÍCIAS > OPINIÃO > HA’U HAKSI’AK Ó, TANBA HA’U HADOMI Ó

HA’U HAKSI’AK Ó, TANBA HA’U HADOMI Ó

Housi : Pe. Francisco da Costa

 

Oinsá mak bele haksi’ak malu <fo-hanoin ba malu> (*saling menegur) nu’udar maun ho alin iha comunidade ida, wainhira ita haré maluk ruma halo sala? Na’i Jesus Cristo nia Evangelho tuir versão São Mateus nian apresenta etapa tolu (cfr. Mt 18,15-18).

Etapa dahuluk, Se ó nia maluk halo sala hasoru ó, ba haksiak nia mesak deit (cfr. Mt 18,15). Iha passagem ida husi profecia Ezequiel hateten:“ó fó hatene karik atu nia sai housi dalan at, maibé, nia lakohi rona hodi sai housi dalan at ne’e, nia sei mate tan nia salan; maibé, ó sei soy ó nia moris”. Wainhira ó la haksi’ak ó maluk no husik liu deit maluk ne’e moris no mate iha sala laran, Maromak sei husu tusan ba ó, se ó la hateten ba ó nia maluk atu hasai nia housi salan” ( cfr. Ez 33,9).

Etapa daruak, nia la rona karik ó, bolu tan maluk ida ka rua atu sai sasin, atu nune’e bele resolve problema liuhusi ema nain rua ka tolu nia hakotu-lia (cfr. Mt 18,16); Iha livro Deuteronómio mós hateten nune’e: sasin housi ema ida deit la forte atu hateten katak ema ida comete pecado (halo sala); maibé ho presença sasin housi ema ida ka rua mak iha força atu hatudu katak ema ne’e sala duni. (cfr. Dt 19,15).

Etapa datoluk, se nia la rona nafatin lori ba Kreda, nia la rona Kreda (*bele dehan fila kotuk ba Kreda) então, haré nia hanesan ema gentio ka ema publikano (sala-na’in); ou haré nia hanesan ema nebé la hola parte iha Kreda (cfr. Mt 18,17). Iha ne’e mak halo ita compreende diak liutan katak Cristo haraik confiança no responsabilidade máxima ba Kreda liuhusi Apóstolo Simão Pedro (actual Papa nu’udar Sucessor Simão Pedro nian) atu perdua no la fó perdão ba maluk ruma nebé la rona Kreda. Evangelho hateten:“buat hotu nebe imi futu iha rai sei futu metin iha lalehan; buat hotu nebe imi kore iha rai sei kore mos iha Lalehan”. (cfr. Mt 18,18)

Acontece iha moris, ita balun brani maibé ita balun mós tauk atu haksi’ak malu. Ha’u brani haksi’ak ba maluk ida nia salan, tanba ha’u hadomi nia, ne’e hola parte iha <vertude caridade nebé Kreda hala’o nu’udar dever ida>(Deus Caristas Est, no.20). Ita fo-hanoin konaba sala nebé maluk ida halo la’os tanba ita rai ódio hasoru nia, maibé tanba nia ha’e ita nia maluk la’os ema leet ida; atu nia bele hetan salvação, no soy mós ita an. Iha fatin nebé hanesan, ita balun mós sente tauk tanba lala’ok ne’e (haksi’ak malu ou fo-hanoin malu) bele hamosu laran moras no sentimento moe ka problema seluk tan, se maluk ida la simu fó-hanoin (teguran) nebé ita hatudu ba nia. Maski todan maibé ida ne’e knaar boot ida nebé Jesus tula hela ba ita sarani sira nu’udar <Kreda moris nian> atu anuncia ho denuncia ba ema seluk no ita rasik nia conversão no salvação.

Nunee, haré husi:

1). Dimensão Pessoa Humana – dignidade hanesan ema continua folin masque monu beibeik ba sala. Necessita tebes ita nia coragem, seja forte e corajoso (1Crôn 28,20) atu haksiak, fo-hanoin. Fo-hanoin (teguran) ne’e importante la’os atu julga (*menghakimi) no condena (*menghukum) maibé atu nia bele hadia ou halós nia an. Ita hirak nebé simu teguran ne’e mós precisa reconhece no simu ho liman rua, fuan nakloke inclui simu ho hakraik an ita nia limitação (imperfeição) ba diak ita nian, hanesan Bispo Hippona hateten: <aceita tua imperfeição. É o primeiro passo para alcançares tua perfeição – simu ó nia imperfeição (ketidaksempurnaan). Ne’e mak passo dahuluk atu bele hetan ó nia perfeição (kesempurnaan)>.

2). Dimensão Relação Social – <o homem é essencialmente um ser social; com maior razão, pode-se dizer que é um ser familiar>. (cfr. frases de S. João Paulo II, papa). Se etapa dahuluk, ita ladauk convence nia; ita precisa tan ema seluk atu sasin katak nia sala. Sasin seluk ne’e mak sociedade. Sociedade ida composta husi família wain. Família mak célula (base) husi sociedade ida (cfr. frases de S. João Paulo II, papa). Nunee, indivíduo ida nebé horik iha sociedade nia leet, preciso hetan mós atenção husi sociedade (comunidade, família boot). Comunidade tem que corrige indivíduo ida nia atitude bainhira monu ba salan; hafoin simu hikas, se nia hakarak fila fali ba dalan di’ak. Iha sorin seluk, ita precisa matan moris neon nain mós, tanba sociedade ohin loron, ita compara karik hanesan careta saneamento nian (truk sampah) nebé gosta tula (halibur) no soe (fakar) fo’er. Fo’er nebé sira halibur mak hakarak <<atu halo at (imoralidades), atu naok (roubos), atu oho (assassínios), halo sala foer (adultérios), atu sai karakten (ambições desmedidas), no halo buat at sira (maldades) seluk hanesan lohi ema (fraudes), hahalok foer (devassidão), laran moras (inveja), lia-bosok (calúnia), loko an (orgulho) no hahalok beik mosu mai (falta de juizo)>> (cfr. Mc 8,21-22). Bainhira capacidade nakonu naresin ona, sira necessita fatin atu fakar, no dala barak, ema seluk mak sai hanesan vítima lixeira (korban tempat sampah). Atu hasoru ema hirak ne’e, São Pedro nia segunda carta aconselha ita:<sede sóbrios e vigilantes. O vosso inimigo (adversário), o diabo, rodeia como um leão a rugir, procurando a quem devorar. Resisti-lhe, firmes na fé!> (cfr. 2Pd 5,8-9a).

3). Dimensão Eclesial – hanesan cristão (Católico), reconciliação integral (isin-klamar) ita hetan iha Kreda nebé Amo Papa, Amo Bispo sira, Na’ilulik sira mak hala’o liu housi sacramento confissão, iha nebé bele haraik perdão hodi Nai Jesus Cristo nia naran (in nomine christi) ba maluk ida nebé hakarak converte an no fila ba dalan diak.

Seidauk tarde ba ita sira nebé la’o sala dalan, se ita hakarak hakribit salan hodi husu perdão ba Maromak, ba maluk sira (comunidade), natureza no mós ba ita an rasik.*** Um grande abraço! Pftby

 

Referências:

Bíblia Sagrada; Carta Ensíclica DEUS CARISTAS EST , sobre o amor cristão – Papa Bento XVI;

http://www.mensagenscomamor.com/frases_de_santo_agostinho_de_hipona.htm#ixzz3nCdGbXUh

http://www.mensagenscomamor.com/frases_papa_joao_paulo_2.htm#ixzz3nCcek3yF

Leave a Reply

Your email address will not be published. Required fields are marked *