shadow
Diocese de Dili > NOTÍCIAS > REFLEXÃO > “LIAFUAN NEBÉ SAI HOUSI HAU IBUN LA FILA HIKAS MOLOK SEDAUK HALO DI’AK, SEIDAUK TUIR HAU NIA HAKARAK, MOLOK SEIDAUK HALO TUIR NINIA KNAR.”

“LIAFUAN NEBÉ SAI HOUSI HAU IBUN LA FILA HIKAS MOLOK SEDAUK HALO DI’AK, SEIDAUK TUIR HAU NIA HAKARAK, MOLOK SEIDAUK HALO TUIR NINIA KNAR.”

Maun alin no feton sira, Maromak ninia futar liafuan iha domingo ba dala XV ne’e lori ita ba hatene realidade ita ema ninia moris iha aspeto rua nebé durante sei moris nu’udar ema ita la bele hases-an housi nebá. Hakarak ka lakohi ita sei koko duni; Moris iha susar laran tamba ita ema sira ninia limite no salan sira, no mos moris iha ksolok no di’ak nia laran tamba ita ninia hahalok di’ak no los sira nebé hetan tulun housi Maromak ninia futar liafuan be liafuan moris nian duni ne’e. Los duni iha moris ne’e ita ema sira barak mak moris terus, barak mak haterus an maibé mos barak mak fo terus ema tamba ita ema ninia hahalok at sira nebé la lao tuir Maromak ninia hakarak sira, lao tuir liu fali mak ita ninia hakarak sira nebé dala barak tebes hakarak di’ak ba ita ninia-an de’it no hakarak at ba ema seluk. Concretamente ho Maromak ninia futar liafuan iha segunda leitura halo ita bele descobre ita ninia hahalok at balun nebé dala wa’in lori terus mai ita no mos ba ema seluk. De modo geral ita bele descobre iha ita ninia hahalok sira be hatudu iha; laran moras, hakarak at, konta ema seluk, bobar lia, lia falço ka bosok ten, rai odio, laran moras, laran manas, discredita ema no seluk seluk tan. Hahalok sira ne’e mak iha moris loro-loron nian la fo hakmatek mai ita, la halo ita moris iha ksolok ninia laran maibé halo ita hela permanentemente de’it iha nakukun no susar nia laran. Dala wain tebes mak ita halo bebeik hela hahalok sira ne’e too hahalok at be fo terus tebtebes ne’e sai tiha toman tiha lae ona, toman tiha halo bebeik hela de’it ona, ita lakon consciencia no perde sentido buat at nian iha ita halo ita lao sala dalan no hela metin nafatin de’it iha susar laran. São Paulo husu ita iha segunda leitura atu ita “hakas-an sai housi fatin att ka hahalok att sira ne’e ninia kbiit hodi simu fali kbiit di’ak be mai housi Maromak hodi bele moris lolós nu’udar Maromak ninia oan doben sira’. Ita precisa hatene an katak ita Maromak oan no sei moris tuir de’it dalan Moris Maromak oan sira nian. Ita buka hatene buat nebé los no buat nebé salan hodi hili ida nebé los no ida nebé sala ho roman Espirito Maromak nian no ho tulun Maromak ninia futar liafuan be liafuan moris nian ne’e. Ita la hare buat hotu hanesan de’it, maibé hatene buat nebé los no buat nebé salan hodi hili de’it mak ida nebé salan. Moris tuir Maromak ninia Espirito no Maromak ninnia futar liafuan ne’e katak FIAR, HALO TUIR, PROMETE NO JURA atu hadomi de’it Maromak liu sasan hotu hotu no hadomi ema seluk liu ita ninia an rasik. Ita la fiar tan fali ba buat seluk ida, la halo tuir matmatak de’it ema ida, la promote mos ba ema boot ida no la jura ka la halo juramento ba buat lulik ka fatuk lulik ka ai lulik sira ida. Ita FIAR, HALO TUIR, PROMETE NO JURA OU HALO JURAMENTO ba de’it Maromak be moris ninia nain, be bele halo hotu hotu, bele halakon terus no susar ita nian no bele Manan terus no mate ne’e liu housi maksoin be mai housi Jesus Cristo ninia oan mane mesak de’it.

 

Doben maun alin sira. Atu bele halo ida ne’e, ohin Maromak koalia mai ita iha primeira leitura katak MAROMAK ninia futar liafuan mesak de’it  mak sai ita ninia força no kbiit, laos RAN RUMA, laos TASI BEEN, laos ai ben ruma, neim qualquer buat ida. So Maromak ninia futar liafuan mesak de’it, futar liafuan ida nebé wainhira nia koalia sai housi ninia ibun mai BUAT HOTU MOSU NO BUAT HOTU MORIS. Tamba neé nu’udar ema fiar nain nebé halao moris ida sempre tuir de’it mak Maromak ninia hakarak ita percisa rona ba Maromak ninia futar liafuan loro-lororn, no haklaken Maromak ninia futar liafuan los no moris nian ne’e ba ema no mundo tomak loro loron liu housi ita ninia liafuan no hahalok sira be sai tuir lolós Maromak ninia futar liafuan ne’e”, atu nune’e’e ita bele hetan moris, no moris ida dook housi susar no nakonu de’it ho domin, dame no ksolok lolós nian. Naí futar lia tun dehan “LIAFUAN NEBÉ SAI HOUSI HAU IBUN LA FILA HIKAS MOLOK SEDAUK HALO DI’AK, SEIDAUK TUIR HAU NIA HAKARAK, MOLOK SEIDAUK HALO TUIR NINIA KNAR.” Ne’e katak Maromak ninia futar liafuan, liafuan di’ak nian be halo di’ak, be constroe ka hari moris ne’e, fo moris ba ema, laos liafuan at, laos destroe neim hamate ema nia moris. Nune’e’e Maromak hakarak dehan mai ita katak hodi Maromak ninia futar liafuan ne’e, ita hotu nebé fiar ba iha Maromak mesak ida de’it, ita ninia futar liafuan sira tem que tulun moris, hamoris, hari, hametin, tem que lori moris mai ita ida idak ninia-an, ba ema seluk no ba mundo tomak. Ita ninia liafuan sira tem que hatudu Maromak ninia futar liafuan be nakonu iha: Laran luak no laran maus, la rai odio no hirus maibé hakarak di’ak de’it, la bosok no la bobar lia, maibé buka tulun no hakarak di’ak de’it.

 

Wainhira sei moris iha mundo ne’e maun alin sira ita percisa hanoin hanesan Evangelho dehan mai ita katak halao moris ne’e hanesan ema ida nebé kuda hela fini ba rai atu fo moris. Los duni iha terus no susar oioin nebé bele hamate fini ne’e maibé buat ida mak certeza katak fini di’ak be monu iha rai di’ak sei fo moris no fulin wa’in.  Nu’udar Maromak ninia oan be moris iha rai ne’e, mas que hasoru terus no susar oioin, mai ita buka atu halao nafatin ita ninia moris iha rai ne’e hodi kuda nafatin hahalok di’ak sira nebé hahalok Maromak ninian rasik iha ita ida idak ninia-an, iha ita ninia familia, iha sociedade, iha ita rain no iha mundo no ema tomak ho tulun Maromak ninia futar liafuan rasik hodi nune’e’e hahalok di’ak sira bele fo fuan liu tan no buras ba nafatin hodi hatudu moris ksolok lolós be ita bele hetan ona iha rai ne’e no sei sai nakonu naresin hamutuk ho Maromak iha ninia reino. Amen.

 

Becora, 12 de Julho 2020,

DC XV-Tinan A, Pb

Leave a Reply

Your email address will not be published. Required fields are marked *