shadow
Diocese de Dili > NOTÍCIAS > LETURA DIÁRIA > Quarta-Feira, XVI Semana iha Tempo Comum (ANO A)

Quarta-Feira, XVI Semana iha Tempo Comum (ANO A)

Primeira Leitura                     Jer. 1. 1, 4-10

Lia housi Livro Jeremias nian:

Liafuan housi Jeremias, Helcias nia oan, sacerdote sira ida nebé hôrik iha Anatot, iha Benjamin nia rain: “Na’i lia tun mai ha’u nune’e: ‘Uainhira Ha’u hahorisó iha ó inan nia knotak, Ha’u hatene nanis ona ó; uainhira ó moris, Ha’u haraik tiha ona bensa ba ó. Ha’u hili nanis tiha ona ó atu sai profeta ba nação sira”.

Nune’e, ha’u hatan: “Oh! Na’i Maromak, maibé ha’u la hatene ko’alia tanba ha’u labarik oan ida!”

Na’i dehan hikas mai ha’u: “Ó keta dehan ‘Ha’u labarik oan ida’, basá ó sei ba hasouru ema sira be Ha’u haruka ó ba no sei dehan ba sira buat hotu nebé Ha’u dehan ba ó. Iha sira oin ó keta laran ta’uk, basá, Ha’u sei hela nafatin ho ó atu tulun ó – Na’i dehan!”

Tuir mai, Na’i halolo liman, kona tiha ha’u ibun hodi dehan mai ha’u: “Ha’u tau Ha’u liafuan sira iha ó ibun! Ohin duni Ha’u tau ó iha povo hotu no reino tomak nia leten, atu ó fokit hodi soe ba rai, atu ó harahu no halakon, atu ó hari no kuda”.

Maromak Futar Lia.

 

Salmo Resposorial                                                               Sal. 70(71). 1-2, 3-4ª, 5-6ab, 15ab, 17 (R. cf. 15ab)

Refrão : Ha’u ibun haklaken Ita maksoyn!!! Repete-se

Na’i, iha Ita ha’u neon metin,

Keta husik ha’u moe ba nafatin.

Tan Ita justiça, hatau ha’u no soi ha’u,

Sée tilun mai ha’u no soi ha’u! Refrão

 

Ita mak ha’u nia fatin metin,

Kota ha’u maksoin nian;

Ita mak fatuk inan metin nebé tahan Ha’u.

Ha’u nia Maromak, soi ha’u housi sala na’in. Refrão

 

Na’i, Ita mak ha’u laran metin,

Ha’u tau neon iha Ita houri sei klosan.

Houri ha’u moris, Ita mak tahan ha’u,

Houri ha’u inan kô’us ha’u, Ita mak bali ha’u! Refrão

 

Ha’u ibun haklaken Ita Nia justiça,

Loron ba loron, Ita, maksoin rohan laek.

Houri ha’u sei klosan, Ita hanourin ha’u,

To’o ohin loron, ha’u haklaken nafatin Ita kmanek. Refrão

 

Aklamação                                                                                                          

Refrão : Aleluia, Aleluia!! Repete-se

Fini mak Maromak futar-liafuan, Cristo mak kari fini.

Sé mak buka hetan fini ne’e, sei hela tinan-ba-tinan. Refrão

 

Evangelho                                                                                                                                                          Mt. 13. 1-9

Na’i Jesus Cristo nia Evangelho nu’udar São Mateus haktuir:

Iha loron neba, Jesus sai housi uma hodi tur iha tasi ibun. Ema barak teb-tebes mai hale’u Nia; tan ne’e Nia tur iha ro ida nia laran, ema lubun boot tur iha tasi ibun. Nia hanourin buat barak ba sira ho aiknanoik dehan: “To’os na’in ida ba kari fini iha to’os laran. Nia kari fini daudaun, balun monu iha dalan ninin, manu sira mai han. Fini seluk monu iha fatuk laran iha nebé rai uituan de’it; sira ne’e moris kedas basá rai la dun kle’an; maibé loron sa’e, sunu tiha sira tan abut la iha, hafoin sira sai maran. Fini seluk monu iha aitarak laran; aitarak sira moris mai, hanehan sira to’o mate. Fini seluk monu iha rai di’ak hodi fó fuan: balun dala atus ida, seluk neen nulu; seluk fali tolu nulu. Ema nebé iha tilun, rona ba!”

Lia Maksoyn.

Leave a Reply

Your email address will not be published. Required fields are marked *