shadow
Diocese de Dili > NOTÍCIAS > REFLEXÃO > REINO LALEHAN NE’E MURAK MEAN IDA

REINO LALEHAN NE’E MURAK MEAN IDA

Maun alin sarani doben sira nu’udar ema nebé moris iha rai ne’e ho realidade oioin be ita hasoru halo ita ema sira loron ba loron halao moris ne’e buka nafati-buka nafatin de’it buat murak sira iha ita ninia moris, la’os de’it buat murak sira be nu’udar sasan, maibé mos buat murak sira iha moris ne’e rasik be hatudu iha ita ninia relacionamento, ita ninia obras sira, ita ninia sentimento sira, ita ninia knar sira, buat seluk sira be haleu ita ho tan buat sira hotu nebé iha relação hoi ta ema ninia-an nu’udar ser vivo ida.

Nai Maromak ninia futar liafuan nebé ita foin mak rona dadaun fo hanoin mai ita hodi compara Reino Lalehan hanesan murak mean ida mos. Comparação be Na’i Jesus hatoo mai ita ne’e halo ita hatene katak Maromak ninia Reino ne’e folin boot tebes no significante tebes mai ita ema sira nebé fiar iha Na’i Maromak. Reino ne’e sai significante no importante tamba ita hatene ita an katak ita hotu hola parte ba reino ida ne’e tamba fiar nebé ita iha, tamba moris nebé ita halao nu’udar ema fiar na’in ba Maromak.

Buat comum mai ita mak ne’e rona de’it temi Maromak ninia reino ne’e ita hanoin katak Maromak ninia reino ne’e buat ida nebé sei mai ka sei mosu mai aban bainrua, ou ne’e moris ida nebé ita sei hetan wainhira ita nia moris hotu ona iha mundo ne’e no ba ona iha Lalehan mak ita foin hetan ka moris iha Reino ida ne’e. Hanoin hanesan ne’e karik, ne’e ita hanoin no compreende salah. Maromak ninia reino ne’e la’os reino ida nebé sei too mai aban bainrua maibé Reino ida nebé existe tiha ona ka iha tiha ona ita ninia le’et. Reino ne’e hodi compromete ita-an fiar ba Maromak no moris turi Maromak ninia hakarak sira ne’e halo ita moris ona iha Reino ida neé. Reino Maromak nian ne’e katak Maromak mak ukun iha nebá. Ita na’in Jesus Cristo mak halo ita compreende no fo afirmação kona ba Maromak ninia reino iha ita le’et ne’e iha wainhira Nia hatan ba ema judeu sira kona ba ho Kbiit saida mak nia duni sai Satanas Beelzebu. Na’i Dehan “Se ha’u duni sai satantanas ho kbiit satanas nian ne’e katak Satanas mak ukun imi maibé se ha’u duni sai satanas ho Maromak ninia kbiit ne’e sinal be hatudu katak Nai Maromak mak ukun imi. Ha’u fo isin di’ak ba ema moras sira, fo han sira be hamlaha no halo sira be mate ona moris hias fila fali, ne’e katak Maromak iha imi leet no Maromak mak ukun imi, imi Maromak ninia povo.” Nuneé ita Maromak ninia reino duni, Maromak mak ita ninia na’in duni. Ema hotu nebé moris iha reino ida ne’e hatudu iha sira ninia moris, moris ida be hadomi Maromak liu sasan hotu hotu no hadomi ema seluk hanesan-an rasik.

 

Nune’e mak ita rona mos iha Segunda Leitura housi São Paulo ninia surat ba sarani sira iha Roma haktuir katak ema hotu nebé hadomi Na’i Maromak ema sira ne’e moris tuir Nai Maromak ninia hakarak no Maromak mos hadomi ema sira ne’e. Na’i Maromak ninia hakarak mak ida ne’e MORIS TUIR NINIA OAN MANE MESAK JESUS CRISTO NINIA ILAS be katak MORIS SANTO hodi bele hetan di’ak, hetan maksoin. Ida ne’e mai ita katak iha ita ninia moris iha buat hotu nebé ita halo ita buka banati tuir Nai Jesus Cristo, significa iha moris ne’e ita buka halo tuir Aman Maromak ninia hakarak iha buat hotu hodi ita hetan Maksoin. Ida ne’e hatudu-an iha ita ninia tau matan liu tan ba ema sira nebé kbiit laek no percisa tebes ita ninia tulun (katuas ferik sira, ema uma laiha, ema lao rai), cuidado ema moras sira, sira be moras iha isin no iha psiquica (sira be moras iha ema, iha hospital no iha nebé nebé de’it), rona no respeita malu hodi la hasusar ka ha-triste ema, no liu tan sira ne’e hotu mak hadook an housi buat aat sira hotu iha ita ninia hahalok no hanoin sira hodi hakarak no buka di’ak de’it ba ema hotu. Atu bele toó iha ne’e ita percisa lao hamutuk nafatin ho Na’i Maromak no haboot nafatin ita ninia fiar no confiança iha Maromak nebé nunca husik hela ita maibé atua nafatin iha ita ninia moris ho ninia tulun sira ba ita ninia moris di’ak ka salvação hanesan nia hatete iha segunda leitura ne’e. Ida ne’e iha historia tomak ita ema ninia salvação nian Maromak hatudu nafatin fatin mai too iha momento ida ne’e.

Maun alin doben sira, Iha tempo uluk liu ba Salomão hatudu nafatin ninia fiar no ninia confiança ba Maromak iha realidade Maromak ninia reino nian be concreto iha lao hamutuk no atua nafatin ho Salomão iha ninia povo sira nia leet ho domin no hakarak di’ak ida ba sira rohan laek. Na’i Maromak tulun no haraik nafatin ba Salomão buat tomak nebé nia percisa hodi ukun Maromak ninia povo, hodi hatudu katak Maromak mak ukun povo Israel. Na’i Maromak haruka Salomão atu husu buat nebé nia hakarak no nia la husu moris naruk ka riku soin ou susar ba ninia funu baluk sira maibé nia husu de’it mak SABEDORIA; katak don atu hatene hili no halo entre buat nebé di’ak no buat nebé aat, liu liu iha hatene no halo di’ak nafatin ba Maromak ninia povo ninia moris di’ak hanesan Maromak hakarak nanis tiha ona.

Ha’u hanoin ita hotu iha ne’e nu’udar ema fiar na’in maibé mós sala na’in los, laiha buat seluk mak oras ne’e ita hakarak husu ba Maromak se la’os mak SABEDORIA nebé Salomão husu atu nune ita mos bele hatene distingue entre buat nebé di’ak no buat nebé at, buat nebé los no buat nebé sala, hodi nune’e ho Maromak ninia tulun ita mos bele iha kbiit hodi halo mak di’ak no los nafatin ba nafatin nu’udar siral ida ita nia domin ba Maromak no nu’udar sinal ida be hatudu katak Maromak hamutuk ho ita, no Maromak ninia Reino iha ita leet. Amen.                                                        

Bidau, DC-XVII, AA, 26.07.20, Pb.

Leave a Reply

Your email address will not be published. Required fields are marked *