shadow
Diocese de Dili > NOTÍCIAS > REFLEXÃO > IMI HARÉ FO HAN BA SIRA

IMI HARÉ FO HAN BA SIRA

DOMINGO COMUM XVIII/Ano A/2020

Is. 55,1-3  Rom 8,35.37-39  Mat 14,13-21

 

Maromak lia tun nune’e: “Imi hotu nebé hamrook, mai wé-matan; imi la iha karik osan, mai de’it nune’e……Ema la moris de’it ho Pão, Maibé, ho liafuan tomak Nebé mai housi Maromak. Tan ne’e, ha’u fiar metin katak mate ka moris, anjo sira ka Na’i-ulun sira, ohin ka aban, aas ka klean, naran criatura seluk ida, la bele haketak ita hosi Maromak nia Domin nebé hatudu ona iha Na’i Jesus Cristo.

Relato Evangelho Haktuir katak Jesus halo milagre ba pão fuan lima ho ikan pedaço rua hodi fo han ema rihun lima liu too pão ne’e sai naresin tan. Evangelista sira tanto Marcos, Lucas no João mos hakerek relato hanesan kona ba Jesus fo han ema wain ne’e. Evangelista sira halo relato ne’e depois de João Baptista Herodes oho tiha ona. Situação iha altura nebá halo de tal maneira que pvoo precisa tebes lider ida ou bibi atan ida hodi guia no horik ho sira. Tanba ne’e mak Jesus nia milagre nakfilak pão fuan lima ba ema rihun lima resin nu’udar sinal ida katak Nia mak figura lider nebé sira precisa no Jesus sei guia sira tuir dalan domin ni’an la’os dalan funu. Jesus nia ação milagrosa ne’e mós nu’udar sinal prefiguaração ida katak iha reino lalehan, ema hotu sei bosu la nahas.

Rona tiha katak Herodes oho tiha ona João Baptista, Jesus buka dalan atu hasees-An tiha lai ba fatin ruma. Nia sae tiha ba ro kiik ida:“Jesus sa’e mesak ba ró, hodi ba fatin fuik. Maibé ema lubun boot nebé hatene, housik tiha cidade hodi tuir Nia. Tun tiha housi ró, Jesus haré ema lubun boot ida. Hanoin teb-tebes sira, hodi fo isin di’ak ba sira nebé moras”. Jesus  nia compaixão ne’e nu’udar expressão divina ida katak Maromak deseja tebes atu tau matan ba Ninia emar sira isin no klamar tomak. Iha ne’e, Jesus habosu sira ho Lia Fuan (Evangelho/doutrina) no cura sira nia moras no hamlaha liu housi milagre multiplicação pão.

Rona, Lé no contempla tiha Jesus nia milagre iha Evangelho semana ne’e, certamente ita sira otas ne’e husu; tansa Jesus la halo tan milagre ba ema sira nebé ohin loron barak sei halerik ba hamlaha no buka hela lider diak ida atu ukun rai ne’e?

Afinal, wainhira enfrenta situação ema hirak nebé kuran hahan, Jesus la directamente halo kedas milagre hodi pamer Ninia kbiit divina dw maneira halo mosu kedas pão ho ikan hodi fo han ema maibé, Jesus husu uluk ba nia escolante sira; saida mak sira iha hodi fahe ba ema wa’in ne’e; escolante sira dehan ba Jesus: “Haruka ona ema sira ne’e fila ba sira nia knuan, atu ba sosa hahan. ”Maibé Jesus simu ba sira: “Lalikan; imi haré fo han ba sira”. Housi processo buka hodi halibur ai-han ne’e mak sira consegue recolha deit pão fuan lima no ikan rua. Housi buat nebé limitado ne’e, tan sira silu fahe hanesan mak ikus mai fohan ema wain hetan hotu sira nia parte hodi han too bosu.

Tempo ohin loron mos Maromak continua hamatan Ninia emar sira ho lalaok hanesan. Nu’udar Jesus husu escolante sira atu fohan ema wa’in, nune’e mos oras ne’e, Jesus continua husu ita (Cristão Católico-simu ona we-baptismo) fohan eh fahe saida mak ita iha ba ema sira nebé ohin loron sei hamlaha ou kuran tebes buat barak iha moris ne’e.

Nune’e mosu tan pergunta; ita sei bele fo culpa ba Maromak tan sa la fo han ema sira ohin loron kiak, hamlaha  quinto canto ne’e? Ita haré estilo de vida sociedade ohin loron; ema barak buka halibur osan hodi la bele kuran ai-han, politico sira buka assegura poder hodi hetan rendimento housi osan estado, fahe projecto, fahe poder ba partidário sira, religioso balu haluha ona sira nia espiritualidade pobreza hodi monu ba tendência moris luxo too haluha tiha katak sociedade precisa moris justo no hot-hotu hetan tratamento hanesan iha estado ida nia laran. Ita hare no rona iha notícia sira katak nação barak iha planeta ne’e (maior parte continente áfrica ho ásia balu) sei moris susar enquanto iha continente sira hanesan Europa no Ámerica sorin balu, ema começa ona aloca osan bilião ba bilião hodi halo pesquisa oinsa ema bele ba too planeta Mars. Será que too ponto ida ne’e, ita husu Maromak halo milalgre nafatin hodi fo han ema sira hamlaha iha rai ne’e, enquanto ema balu, grupo balu, companhia balu, partido balu hetan moris diak tan deit explora recurso rai ne’e ba interece rasik?

Sociedade ohin loron, ema começa trata animal sira hanesan ema, enquanto iha sikun balun, ema explora ema hodi hariku-an no grupo ou partido? Continente Africa ho Ásia sorin balu sai exemplo oinsa povo moris kiak iha nação nebé riku tebes ho recursos naturais sira. Timor maske rai kiik no riku mos ho mina maibé, tan sa ukun-an tinan 20 ona, governante sira riku matak wainhira mandato remata pois simu tan pensão vitalícia enquanto povo eleitor sei susar tebes atu aceeso be mos. Acesso estrada, acesso electricidade, iha netik osan oitoan hodi halo netik uma taka baluk ida eh sosa netik fos saka ida rua ba tempo naruk.

Resposta mak ne’e, ita sira nebé iha netik buat ruma, fahe netik ba hirak nebé precisa ita nia apoio. Oinsá ho sira nebé riku maibé, hateke ema kiak sira la hetan? Oinsa ho político sira nebé dehan povo mak fo confiança sai governante maibé, too mandato hotu sira riku maibé, povo nia nível prosperidade mukit nafatin? Oinsa ho religioso sira nebé oras ne’e moris diak liu fali povo sarani? Evangelho semana ne’e ita rona; ”Maibé Jesus simu ba sira: “Lalikan; imi haré fo han ba sira”.

Reflecte ba realidade ne’e, ita nu’udar Cristão Católico nebé baptizado, saida mak ita halo ona nu’udar milagre ba ita nia sociedade? Too ponto ida ne’e, político sira mos talves la brani fo resposta. Resposta nebé ita hotu acompanha mak pulsa electricidade 30 dólares ba fulan rua, subsídio 200 dólares ba fulan rua nebé nakobu ho lacuna (flahanço técnico) no conflito de interece, subsídio ba pessoa linha frente sira nebé hamosu polémica tan hirak nebé fora de linha frente simu subsídio boot liu hirak nebé luta iha linha frente, no ida nebé atraido liu housi situação ne’e mak político sira buka hatun malu, hadau malu poder hodi assegura poder, fahe poder ba malu até acto política balu contrário ho regulamento (Lei) em vigor.

Covid19 hanorin ona buat lubuk ida ba ita nu’udar Timor oan. Wainhira Estado emergência implementa empresário estrangeiro sira taka sira nia loja eh companhia abandona trabalhador Timor oan, sira repatria ba sira nia rain enquanto Timor oan ho Timor oan mak buka dalan hodi fo tulun malu. Lalaok ne’e ita bele provas housi existência grupo apoio humanitário lobuk ida, Paróquia sira iha Diocese tolu, partido politico balun, esposa do Presidente da República, nebé fahe ai-han ba ema lubuk nebe hetan impacto directa housi covid19 no implementação Estado de Emergência durante fulan rua resin. Apoio humanitário hirak ne’e, maske mai housi entidade oi-oin maibé, mesak Timor oan deit, enquanto companhia estrangeiro sira nebé mai buka moris iha Timor, taka tiha sira nia empresa hodi fila ba sira nia rai too remata mak sira mai continua sira nia empresa.

Simplesmente, lalaok hirak ne’e ita hanaran ação caridade tanba ita nia sentimento solidariedade nu’udar ema no nu’udar Timor oan. Ne’e significa ita iha disponibilidade hodi fahe maske ita mos menos hela. Buat nebé extraordinário housi grupo solidariedade sira durante tempo Estado Emergência ne’e mak sira arisca sira nia vida no tempo hodi buka halibur ai-han necessidade básica hafoin distribui hikas ba família sira nebé identificado mais vulnerável economicamente. Housi sorin seluk, covid19 mos sai hanesna oportunidade diak ba político sira hodi assegura no hamonu malu iha âmbito poder. Fahe poder ba partidário sira nebé serviço ba partido, balu halo cobrança ba ema hirak nebé hetan cargo tan recomenda housi partido, seluk aproveita situação hodi hetan lucro housi subsídio 200 dólares no subsídio ba pessoa linha frente sira. Too iha ponto ida ne’e, ita nu’udar Católico hatene ona distingue (Membedakan) ação solidariedade nebé mak iha valor moral no ida nebé mak lao iha valor moral. Los duni, ita atu halo diak ba ema ne’e la fácil maibé, obrigação sarani fanun nafatin ita hodi halo netik buat ruma ba ema sira nebé precisa tan Jesus dehan: “imi haré fo han ba sira”.

Iha âmbito global, ita haré, nação barak fo importância liu ba business fábrica kilat (neclear), balu sosa, balu hasubar nuclear/atom hodi antecipa funu, enquanto povo iha nação hirak ne’e lobukida sei moris kiak hela. Imagina se osan fábrica kilat no sosa kilat mak utiliza hodi halo uma eh fo netik hahan ba ema kiak sira, certamente, reduz ona número hamlaha no redus mos exploração excesso (belebihan) na natureza. Iha contexto Timor, se osan pensão vitalícia mak uza hodi canaliza be mos ba comunidade, certamente problema be mos sei la hetan tan lamentaçào housi povo. Périto ou seja economista balu nebé fo improtância liu ba economia Macro hodi ignora tiha economia Micro. Nação barak (liliu continente África no Ásia) nebé riku tebes ho recursos naturais maibé, povo continua moris iha pobreza tan deit ukun nain sira nebé kaan ten hakarak han mes-mesak no nação boot sira nebé iha kbiit economia manipula preço recursos naturais iha mercado global. Tanba ne’e mak Papa Emérito Bento XVI dehan; mundo ohin loron; ema hadau malu halibur riku-soin too haluha tiha Maromak. Ema hadau malu atu halibur riku soin too haluha tiha katak wainhira mate too mai, ita sei fila ba rai rahun ho isin lolon tanan deit no ema seluk mak sei fahe no hadau malu ita nia riku sira nebé durante ne’e ita halibur bulak rai.

Então, nu’udar Evangelista João relata katak labarik ida mak iha pão fuan lima no ikan rua, ne’e nu’udar nu’udar símbolo ida katak perante Maromak, ita nu’udar buat kiik oan ida nebé precisa fahe housi saida mak ita iha maske limitado. Sentimento solidariedade mak sai hanesan mensagem principal housi Jesus ba ita sarani sira. Tanba ne’e mak Jesus dehan: “imi haré fo han ba sira”. lalaok kiik hirka ne’e maske la muda mundo maibé, halo netik buat ruma ba mundo liu housi caridade hirak ne’e; sim ba ema barak acto ne’e folin laek maibé, ba Maromak, ne’e folin boot liu hotu.Maske kiik maibé Bíblia dehan; até fuuk lahan mos sei sura hotu. Ne’e mak caridade nia valor iha Maromak nia futar oin. Desgraça boo mak wainhira lider hanesan Xanana halo visita hodi fahe apoio necessidade básica maibé, representante povo balu dehan fali Xanana buka votos. Ate Bispo Maliana dehan deputado/a ne’e blaar hela.

Característica sarani ida mak ita nia sentimento solidariedade basá, Jesus rasik mos sente no hatudu lalalok ne’e;… Jesus haré ema lubun boot ida. Hanoin teb-tebes sira,(…).

Menon ikus liu housi Evangelho semana ne’e  mak: “… Kaer tiha pão fuan lima ho ikan rua ne’e, foti matan ba lalehan, hodi haraik bença. Hafoin, Nia silu fahe tiha fo ba Escolante sira atu fahe ba ema sira ne’e. Sira hotu han to’o bosu.” Lalaok housi Jesus nia expressão ne’e mak ohin loron, para além de ita pratica iha moris caridade nian, oraçãao ne’e mos repete bebeik iha celebração Eucaristia (Missa) wainhira tama iha rito de elevação no consgração. Iha missa ita simu comunhão housi hostia pedaço kiik ida maibé, ne’e too ona hodi habosu klamar no hakonu saudades hasoru Maromak ba loron ida nian. Nu’udar Cristo fo han ema rihun iha relato Evangelho, nune’e mos Cristo sei nafatin fo han ita iha loron ikus too naresin. Saida mak ita fahe iha rai ne’e, sei halibur hamutuk nu’udar ita nia tesouro (murak mean) ou cofre iha lalehan atu loron ida, fila hikas mai ita. Nu’udar música nebé ema hananu; Buat nebé o halo mai hau, ema seluk sei halo ba o. Se o halo diak, ema seluk mos sei halo diak; se o halo aat, ema seluk mos sei halo aat. Se o ukun diak, povo sei hahí, se o ukun nakonu ho aproveita, povo sei haluha o wainhira o mate. <Assim Seja e Bem Haja (ignas2020)>

Leave a Reply

Your email address will not be published. Required fields are marked *