shadow
Diocese de Dili > NOTÍCIAS > LETURA DIÁRIA > XIX DOMINGO TEMPO COMUM (ANO A)

XIX DOMINGO TEMPO COMUM (ANO A)

Primeira Leitura                     1 Rs. 19, 11-13

Lia housi Livro Liurai sira nian:

Iha loron hirak nebá, Profeta Elias to’o ba Maromak nia foho, naran Horbe, hodi ba toba kalan iha fatuk ko’ak ida. Maromak lia tun nune’e ba nia: “Sai housi ne’e, hodi ba hein Maromak iha foho.”  Maromak liu tiha. Iha nia oin, anin boot ida huu maka’as iha foho hodi fera fatuk sira; maibé, Maromak la hela iha fatuk laran. Anin liu tiha, rai nakdoko, maibé, Maromak la hela iha rai nakdoko. Liu tiha rai nakdoko, ahi ida lakan, maibé, Maromak la hela iha ahi lakan. Ahi lakan liu tiha, anin mamar ida huu mai. Rona tiha anin ne’e, Elias taka oin ho nia tais, hodi sai ba tur iha fatuk ko’ak nia ibun.

Maromak Futar Lia.

 

Salmo Responsorial                                                                                                                                     Sal. 84, 9ab-10. 11-12, 13-14

Refrão  :  Na’i, hatudu Ita domin, haraik Maksoin mai ha’u!!! Repete-se

Ha’u rona lia nebé Na’i hateten: 

Maromak haklaken hakmatek.

Maksoin besik sira nebé hamta’uk Nia,

Maromak nia kbiit hela iha ita rain. Refrão

 

Lialos ho domin hasouru malu,

justisa no hakmatek hakloher malu.

Lialos sei mosu iha rai-klaran,

justisa sei tun housi Lalehan. Refrão

 

Maromak sei haraik di’ak,

ita rain sei nafuan.

Justisa sei la’o housi oin,

hakmatek la’o tuir nia ain fatin. Refrão

 

Segunda Leitura                                                                                                                                                                            Rom. 9, 1-5

Lia housi São Paulo nia surat ba sarani sira iha Roma:

Maun-alin sira: Ha’u hateten los ba imi hodi Cristo, hateten la bosok; ha’u neon los hateten hodi Espirito Santo: Ha’u laran susar teb-tebes, ha’u fuan moras nafatin. Ha’u rasik hakarak simu todan housi Cristo, hodi maun alin sira fatin hodi sira nebé ha’u ran rasik, ema Israel sira: tuir lolos, sira ne’e Maromak oan fudin; sira ne’e Maromak nia kbiit Maromak nia Moruk, Nia ukun-fuan, Nia buat karan no Nia menon tomak. Patriarca sira uluk  nian mai housi sira; Cristo mai housi sira nia ran; Cristo ne’e ukun sasan tomak, Nia, Maromak nia kmanek iha tinan ba tinan nafatin. Amen.

Maromak Futar Lia.

 

Aclamação                                                                                                                                                                                          Mt. 14, 31

Refrão : Aleluia, Aleluia!! Repete-se

Ema fiar kiik, tansa ó laran ta’uk?

Ba oin nafatin! Ha’u duni, keta ta’uk. Refrão

 

Evangelho                                                                                                                                                                                   Mt.  14, 22-33

Na’i Jesus Cristo nia Evagelho nu’udar São Mateus haktuir:

Iha tempo nebá, fo han hotu ema sira ne’e, Jesus haruka kedas Escolante sira sa’e ba ró atu hakur ba sorin, molok nia sei despede hela ema sira. Hakfahek tiha malu, Jesus sa’e mesak ba foho atu hamulak. To’o loron-kraik, Nia hela mesak de’it. Ró dook ona housi tasi ibun; laloran boot daudaun, tan anin huu hasouru. Molok loron matan foin sa’e, Jesus ba hasouru Escolante sira, hodi la’o iha tasi leten. Uainhira sira hare Nia la’o iha tasi leten, Escolante sira hakfodak, dehan ba malu:  “Mate-klamar ida.” Sira hakilar ho ta’uk. Maibé, Jesus hateten ba sira, hodi dehan:  “Aten-brani, Ha’u duni, keta ta’uk.” Pedro ko’alia hodi dehan: “Na’i, Ita duni karik, haruka ha’u la’o housi tasi leten ba hasouru Ita.”  Jesus hateten ba nia; “Mai.” Pedro tun housi ró, la’o housi wé leten atu ba Jesus. Maibé, anin hahu foti an boot, Pedro ta’uk, mout daudaun hodi hakilar nune’e: “Na’i, tulun ha’u!” Jesus lolo liman hodi kaer nia. Hafoin, dehan: “Ema fiar kiik, tan sa ó ta’uk?” Sa’e tiha ba ró, anin mos maus kedas. Sira nebé iha ró laran, hakneak iha Jesus nia oin, hodi dehan: “Los duni, Ita Maromak Oan!”.

Lia Maksoyn.

Leave a Reply

Your email address will not be published. Required fields are marked *