shadow
Diocese de Dili > NOTÍCIAS > LETURA DIÁRIA > XXI DOMINGO TEMPO COMUM (ANO A)

XXI DOMINGO TEMPO COMUM (ANO A)

Primeira Leitura                     Is. 22, 19-23

Lia housi Livro Profeta Isaías:

Maromak lia tun ba Sobna, administrador palácio nian, dehan nune’e:  “Ha’u sei hasai tiha ó housi serbisu ne’e, sei hasai tiha ó housi ó nia fatin. Iha duni loron ne’e, Ha’u sei bolu Ha’u atan Eliaquim, Elquias nia oan. Ha’u hatais nia ho ó nia henan, sei tau ba nia knotak ó nia futu-kabun; Ha’u sei tau ba nia liman, ó nia kbiit atu ukun. Nia sei sai aman ida ba ema tomak iha Jerusalém no ba Judá nia uma laran. Ha’u sei tau David nia uma laran iha nia kbas. Nia loke tiha, la iha ema seluk bele taka tan; Nia taka tiha, la iha ema seluk bele taka-loke tenik. Ha’u sei hari nia hanesan kladelik iha fatin metin ida; nia ukun sei fo kbiit no laran di’ak ba nia aman nia uma laran”.

Maromak Futar Lia.

 

Salmo Responsorial                                                                                                                              Sal. 137(138), 12a. 2bc-3. 6. 8bc

Refrão  :  Na’i, tan Ita laran luak, keta haluhan ami!!! Repete-se

Sei agradece tan Ita laran luak no domin,

tan Ita lia menon di’ak liu hotu-hotu.

Ha’u harohan, Ita rona ha’u,

ha’u klamar metin nafatin. Refrão

 

Na’i, ha’u agradece Ita ho laran tomak,

tan Ita rona ha’u nia lia-fuan.

Ha’u sei hahi Ita iha Anjo sira oin,

sei hana’i Ita iha kadunan santo. Refrão

 

Na’i kmanek teb-tebes!

Haraik matan ba ema kiik, hewai ema foti an. 

Na’i,  Ita laran luak rohan laek.

Keta hewai criatura Ita halo. Refrão

 

Segunda Leitura                                                                                                                                                                     Rom. 11, 33-36

Lia housi São Paulo nia surat ba sarani sira iha Roma:

Maromak nia soin no matenek boot teb-tebes! Ita nia hanoin la to’o lia nebé Nia tesi; Ema ida la hatene Maromak nia dalan! Ema nebé mak hatene Maromak nia hanoin? Ema nebé mak bele hanourin Maromak?  Ema nebé mak fo uluk ba Nia, atu bele simu fali nia kolen? Buat hotu-hotu mai housi Nia, moris ho Nia, fila fali ba Nia. Gloria nafatin ba Nia Amen.

Maromak Futar Lia.

 

Aclamação                                                                                                                                                                                          Mt. 16, 18

Refrão : Aleluia, Aleluia!! Repete-se

Ó Pedro, iha fatuk ne’e Ha’u sei hari Ha’u nia Igreja;

Infreno la iha kbiit atu foti liman hasouru Nia. Na’i nia lia-fuan. Refrão

 

Evangelho                                                                                                                                                                                    Mt.  16, 13-20

Na’i Jesus Cristo nia Evagelho nu’udar São Mateus haktuir:

Iha tempo nebá, Jesus ba tiha iha Cesareia Filipe ninian, husu ba Nia escolante sira nune’e: “Ema hateten oinsa, kona ba Mane Maksoin?” Sira hatan: “Balun dehan katak João Baptista; seluk dehan katak Elias; seluk fali dehan katak Jeremias eh Profeta ruma karik.” Jesus husu ba sira: “Imi dehan Ha’u se los?”  Simão Pedro hatan hodi dehan:  “Ita Messias, Maromak nia Oan Mane!”  Jesus dehan ba nia:  “Rahun-di’ak ba ó, Simão, Jonas nia oan, tan lia nebé ó hateten la mai housi isin no ran, maibe, mai housi Ha’u Aman iha Lalehan. Ha’u dehan tenik ba ó: Ó Pedro, iha fatuk ne’e, Ha’u sei hari Ha’u nia Igreja; Inferno la iha kbiit atu foti liman hasouru Nia. Ha’u sei fo Reino Lalehan ba ó ukun:  Buat nebé ó futu iha rai, sei futu iha Lalehan;  Buat nebé ó kore iha rai, sei kore mos iha Lalehan.” Hafoin Jesus hameno ba Nia Escolante sira atu keta dehan ba ema seluk katak Nia Messias.

Lia Maksoyn.

Leave a Reply

Your email address will not be published. Required fields are marked *