shadow
Diocese de Dili > NOTÍCIAS > LETURA DIÁRIA > Sábado, XXII Semana Tempo Comum (ANO A)

Sábado, XXII Semana Tempo Comum (ANO A)

Primeira Leitura                 1Cor.  4.  6b-15

Lia housi São Paulo nia primeira  Surat ba sarani sira iha Corinto:

Maun alin sira: “Ha’u dehan mós sira ne’e ba ha’u nia an no ba Apolo ba imi nia di’ak, atu imi bele hanourin an  housi ami atu la bele ba liu fali buat nebé hakerek nanis, atu la iha ema ida housi imi leet nebé sei nakonu ho laran loko an kona ba ema ida liu fali ema seluk. Se mak fó kmanek liu ba imi? Imi iha buat sáida nebé imi la simu uluk? Maibé imi simu tiha karik, tansá imi loko an hanesan imi la simu nia? Imi haksolok ona; imi sai riku ona; imi sai tiha liurai maski ami la iha! Tebes, ha’u hakarak katak imi sai liurai, atu ami mós bele ukun hamutuk ho imi.

Basá nu’udar ha’u haré, Maromak hatudu ami apóstolo sira nu’udar ikus liu ema  hot-hotu, hanesan ema nebé atu saran ona ba mate, basá ami sai tiha hanesan buat áat ida nebé mundo, anjo no ema sira hotu bele haré. Ami bulak tanba Cristo, maibé imi matenek iha Cristo; ami biit laek, maibé imi maka’as; ema haré di’ak imi, maibé ema haré áat ami. To’o oras ne’e kedas ami hamlaha no hamrook, hatais uitoan de’it no ema trata áat ami, ami la’o  ba la’o mai hanesan ema nebé uma la iha. No ami serbisu ho ami nia liman rasik. Uanhira ema hasara ami, ami hateten di’ak ba sira; uanhira ema fó terus, ami tahan de’it; uanhira ema konta ami nia vida, ami hatan ho laran maus. Ami sai tiha hanesan buat fo’er mundo ne’e nian, ema hotu nia fo’er to’o oras ne’e.

Ha’u hakerek ida ne’e ba imi la’os atu hamoe imi, maibé atu hanourin imi nu’udar ha’u nia oan doben sira. Basá maski imi iha matadalan barak ba Cristo, imi nia aman la barak, basá ha’u sai tiha imi nia aman iha Cristo Jesus housi Evangelho.

Maromak Futar Lia.

 

Salmo Responsorial                                                                                                                Sal. 144(145). 17-18, 19-20, 21 (R. 18ª)

Refrão : Na’i Maromak besik ba sira be harohan!!! Repete-se

Na’i Nia hanoin lós tebes,

Laran di’ak ba sasan tomak Nia halo;

Besik ba sira nebé harohan,

Ba sira nebé harohan tebes. Refrão

 

Ba sira be hamta’uk, Nia haraik  sira nia hakaran,

Rona sira lian susar no soi sira.

Na’i tau matan ba sira nebé hadomi Nia,

Maibé, halakon ema áat sira. Refrão

 

Ha’u ibun sei hananu hodi hahi Na’i.

Buat moris hotu haliban ba nafatin,

Nia naran santo. Refrão

 

Aclamação                                                                                                                                                                                             Jo. 14. 6

Reftrão : Aleluia, Aleluia!! Repete-se

Ha’u ne’e dalan, lialós no moris hun, Na’i lia tun dehan;

ema ida la liu karik housi Ha’u, nia la bele ba Aman Maromak. Refrão

 

Evangelho                                                                                                                                                                                             Lc. 6. 1-5

Na’i Jesus Cristo nia Evangelho nu’udar São Lucas haktuir:

Iha tempo nebá, iha Sábado ida, wanhira Jesus la’o housi to’os batar nian, nia escolante sira hahu silu no dulas batar iha sira nia liman hodi han. Fariseu sira dehan: “Tansa imi halo buat nebé bandu iha loron sábado?” Jesus hatan ba sira: “Imi la lê buat nebé David halo uanhira nia ho nia maluk sira hamlaha, katak nia tama iha Maromak nia Uma, hola pão sacrifício nian hodi han no fahe ba sira, pão nebé na’ilulik sira de’it mak bele han?” Nia dehan tan ba sira: “Oan Mane mak sábado nia Na’i.”

Lia Maksoyn.

Leave a Reply

Your email address will not be published. Required fields are marked *