Primeira Leitura 1 Cor. 15. 12-20
Lia housi São Paulo nia primeira Surat ba sarani sira iha Corinto:
Maun alin sira: Ema haklaken haklaken Cristo nu’udar ida nebé moris hi’as ona housi mate, oin sá imi balun dehan katak ema mate sei la moris hi’as? Ema mate la moris hi’as karik, ne’e duni Cristo mós la moris hi’as. No Cristo la moris hi’as karik, ne’e duni lia nebé ami haklaken mós folin laek; imi nia fiar mós folin laek. Ne’e duni, ami sai sasin bosok ba Maromak, basá ami sasin kona ba Maromak katak Nia halo Cristo moris hi’as, nebé lolós Nia la moris hi’as, tebes duni karik katak mate sira la moris hi’as. Basá mate sira la moris hi’as karik, ne’e katak Cristo mós la moris hi’as. Cristo la moris hi’as karik, imi nia fiar leet de’it; imi sei hela iha imi nia sala. No sira nebé toba iha Cristo lakon tiha hotu. Ita fiar iha Cristo ba moris ida ne’e de’it karik, ita mak povo rahun áat liu ema hotu-hotu.
Maibé lolós, Cristo moris hi’as ona housi mate; Nia mak fuan uluk housi sira hotu nebé toba tiha ona.
Maromak Futar Lia.
Salmo Responsorial Sal. 16(17). 1, 6-7, 8b, 15 (R. 15b)
Refrão : Na’i, ha’u neon sei haksolok tebes, wainhira Ita glória mosu mai!!! Repete-se
Na’i, rona ha’u be justo,
Rona ha’u nia halerik ba;
Sée tilun ba ha’u hamulak,
Ha’u ibun la bosok. Refrão
Ha’u harohan ba Ita, Maromak, hatan mai ha’u,
Maromak, rona ha’u lian;
Hatudu Ita laran-luak kmanek mai ha’u,
Housi funu baluk sira, Ita soi sira
Bé subar-an iha Ita sorin kuana. Refrão
Bali ha’u hanesan Ita futar matan fuan,
Hatau ha’u iha Ita liras nia mahan;
Haraik mai ha’u atu fihir Ita futar oin.
Wainhira ha’u hader,
Habosu ha’u Ita futar ilas. Refrão
Aclamação cf. Mt. 11. 25
Refrão : Aleluia, Aleluia!! Repete-se
Rahun di’ak ba Ita, Aman, Na’i lalehan no rai nian, tan
Ita hatudu mistério reino lalehan nian ba kiik sira. Refrão
Evangelho Lc. 8. 1-3
† Na’i Jesus Cristo nia Evangelho nu’udar São Lucas haktuir:
Iha tempo nebá, Jesus la’o housi cidade ida ba cidade seluk no housi knua ida ba knua seluk, hodi hanourin no haklaken liafuan di’ak kona ba Maromak nia reino. Sira sanulu resin rua la’o hamutuk ho Nia, no mós feto balun nebé hetan di’ak housi moras oi-oin no housi espírito áat sira: Maria nebé ema hanaran Madalena, housi nia diabo hitu sai tiha ona; Joana, Herodes nia atan Cusa nia feen, Susana no feto seluk tan, nebé tulun sira ho sira nia riku soi.
Lia Maksoyn.
