shadow
Diocese de Dili > NOTÍCIAS > LETURA DIÁRIA > Sábado, XXIV Semana do Tempo Comum (ANO A)

Sábado, XXIV Semana do Tempo Comum (ANO A)

Primeira Leitura      1 Cor. 15. 35-37, 42-49

Lia housi São Paulo nia primeira Surat ba sarani sira iha Corinto:

Maun alin sira: Ema ruma bele dehan, “Oin sá mate sira sei moris hi’as? Ho isin oin sá lós sira sei fila mai?” Imi beik! Buat nebé imi kari la mate karik, nia sei la moris. No buat nebé imi karik la’os isin nebé sei mai, hanesan trigo nia fini de’it karik.

Nune’e mós wainhira mate sira moris hi’as. Ita kari buat nebé bele dodok; nia moris hi’as la bele dodok. Ita kari buat nebé la soi atu hahí; nia moris hi’as kmanek liu; ita kari buat nebé kbiit laek; nia moris hi’as kbiit wa’in. Ita kari isin nebé mundu ne’e nian, nia moris hi’as isin espírito nian. Iha isin mundo ne’e nian karik, iha mós isin espirito nian.

Hakerek nanis ona, “Ema uluk, Adão, sai buat nebé moris;” Adão ikus sai fali espírito nebé fó moris. Maibé buat nebé espírito nian la’os uluk; maibé uluk mundo ne’e nian, tuir mai espírito nian. Ema uluk housi mundo, ema rai rahun nian; ema ikus housi lalehan. Nu’udar ida rai rahun nian, nune’e mós mak ema sira nebé rai rahun nian; no nu’udar ida nebé lalehan nian, nune’e mós mak ema sira nebé lalehan nian. Nu’udar ita lori tiha ilas ema rai rahun nian, ita mós sei lori iha ilas ema lalehan nian.

Maromak Futar Lia.

 

Salmo Responsorial                                                                                                     Sal. 55(56). 9ab e 10, 11-12, 13-14 (R. cf. 14c)

Refrão : Ha’u sei la’o iha Na’i futar oin!!! Repete-se

Na’i, Ita hatene ha’u moris áat,

Ha’u Maromak, simu ba ha’u mata-wen.

Ha’u funu baluk sira sei hakiduk

Wainhira ha’u bolu Ita naran.

Ha’u sei hatene katak Na’i ho ha’u. Refrão

 

Ha’u hahí Na’i Nia liafuan,

Ha’u hahí Na’i Ni alia hakotu,

Ha’u laran metin iha Na’i,

Sei la tauk buat ida;

Ema sira sei bele halo sá mai ha’u. Refrão

 

Ha’u hasa’e sacrifício ba Ita hodi agradece,

Basá Ita soi ha’u moris housi mate,

Souri ha’u housi ain sidik,

Atu la’o iha Ita futar oin,

Ba roman moris nian. Refrão

 

Aclamação                                                                                                                                                                                       cf. Lc. 8. 15

Refrão : Aleluia, Aleluia!! Repete-se

Ksolok ba sira nebé rona Maromak Nia liafuan

ho neon no laran hodi fó fuan, tan sira laran metin. Refrão

 

Evangelho                                                                                                                                                                                          Lc. 8. 4-15

Na’i Jesus Cristo nia Evangelho nu’udar São Lucas haktuir:

Iha tempo nebá, wainhira ema lubun boot halibur hamutuk, hodi hakbesik ba Jesus housi cidade tomak, Nia haktuir aiknanoik ida ne’e: “Ema ida ba kari fini. Nia sei kari dadaun, fini balun monu iha dalan ninin, hafoin ema sama no manu sira housi lalehan mai han sira. Fini balun monu iha fatuk leten; moris tiha, sira namlaik, basá be la iha. Fini balun fali monu iha aitarak laran. Aitarak sira moris hamutuk ho sira, hodi hanehan sira. Ikus mai, fini balun monu iha rai di’ak, hodi moris no fó fuan dala”. Hateten tiha ne’e, Nia dehan ho lia maka’as” “Sira nebé iha tilun atu rona, rona ba!”

Escolante sira husu ba Nia aiknanoik ida ne’e katak sá. Nia hata: “Ba imi fó hatene tiha ona mistério Maromak nia reino nian; maibé ba ema seluk hato’o de’it ho aiknanoik sira, atu hodi haré, sira la haré momós; no hodi rona, sira la hatene momós’.

Ne’e duni aiknanoik ida ne’e katak: fini mak Maromak nia liafuan. Fini nebé monu iha dalan ninin mak ema sira nebé, rona tiha, diabo mai hodi hasai liafuan housi sira nia laran atu sira la bele fiar hodi hetan maksoyn. Fini nebé monu iha fatuk leten mak ema sira nebé wainhira sira rona liafuan, sira simu nia ho ksolok; maibé, tan abut la iha, sira fiar ba tempo uitoan de’it, hafoin husik ona iha oras susar nian. Fini nebé monu iha aitarak laran, ne’e mak sira nebé rona, maibé hanoin oi-oin, riku soi no ksolok mundo ne’e nian hanehan sira, la biban atu sai boot no tasak. No fini nebé monu iha rai di’ak, ne’e mak sira nebé rona liafuan ho neon ho laran, rai didi’ak nia hodi fó fuan, tan sira laran metin”.

Lia Maksoyn.

Leave a Reply

Your email address will not be published. Required fields are marked *