Primeira Leitura Pro. 3. 27-35
Lia housi livro Provérbios nian:
Ha’u oan: Ó keta nega favor ba ida nebé merece, wainhira ó liman iha biit atu halo. Ó bele halo karik buat ruma, keta dehan ba ó maluk: ‘Ó ba ona, hafoin fila mai. Aban ha’u sei fó ba ó.’ Ó keta hanoin áat hasouru ó nia maluk nia hela karik ho ó hodi la hanoin áat. Ó keta haksesuk nar’naran de’it ho ema uma nebé la halo buat áat ruma ba ó. Ó keta laran moras ba ema be laran mós, haksolok ho nia laran midar. Na’i Nia malisan tun ba ema áat nia uma leten. Maibé, Nia haraik bensa ba ema laran mós sira nia hôrik fatin. Na’i hamoe sira nebé hakarak hamoe ema; ba sira be haraik an, Nia haraik Ninia graça. Ema matenek sira sei hetan glória, maibé, ema sira be laran áat sei simu naran áat.
Maromak Futar Lia.
Salmo Responsorial Sal. 14(15). 2-3ab. 3cd-4ab, 5 (R. 1b)
Refrão : Na’i, ema laran mós sei hôrik iha Ita kadunan!!! Repete-se
Ema nebé moris hodi la halo salan,
Moris tuir justiça no ko’alia lialós ho laran tomak;
Ema nebé la foti lia bosok hodi du’u matak. Refrão
Ema nebé la halo áat ba ema seluk,
La hakribi nia maluk.
Ema nebé heuuai ema áat,
Hahí ema nebé hamta’uk Maromak. Refrão
Ema nebé halo tuir nia juramento
Maski nia hetan susar,
La empresta nia osan hodi husu funan,
La kohi hatatan ema laran maus;
Ema hanesan ne’e sei la monu. Refrão
Aclamação Mt. 5. 16
Refrão : Aleluia, Aleluia!! Repete-se
Imi nia roman sei nabilan mós hanesan ne’e iha ema sira oin,
atu sira haré imi nia hahalok di’ak sira no hahí imi nia Aman iha Lalehan. Refrão
Evangelho Lc. 8. 16-18
† Na’i Jesus Cristo nia Evangelho nu’udar São Lucas haktuir:
Iha tempo nebá, Jesus lia tun ba ema lubun boot: “Ema ida la sunu ahi oan hodi taka nia ho luhu ida, ka tau nia iha tobafatin okos; maibé tau nia iha ahi oan fatin, atu sira nebé tama mai bele haré nia naroman. Basá la iha buat ida nebé subar hela, nebé ema sei la haré hetan; la iha buat ida nebé ema la hatene, nebé ema seluk sei la fó sai. Ne’e duni, haré didi’ak oin sá imi rona; basá ema nebé iha ona, sei simu tan, no housi ema nebé la iha, sei hasai tan buat nebé nia hanoin nia iha.”
Lia Maksoyn.
