Primeira Leitura Pro. 30. 5-9
Lia housi livro Provérbios nian:
Maromak nia liafuan hotu tahan ba koko; Maromak mak kalili ida ba sira nebé laran metin iha Nia. Ó keta tutan tan liafuan ida ba Nia liafuan sira, atu Nia la bele haksi’ak ó, no ó la bele sai ema bosok-ten. Na’i, ha’u husu buat rua ba Ita: Keta heuuai ha’u wainhira ha’u sei moris: Hado’ok housi ha’u lia bobar no lia bosok; Keta halo ha’u sai kiak no sai riku, haraik mai ha’u aihan naton. Basá, aihan barak liu, bele halo ha’u hakribi Itaboot hodi dehan: “Sé mak Na’I ne’e? Eh iha kiak laran, ha’u bele na’uk, ha’u bele hafoer ha’u Maromak Nia futar naran!
Maromak Futar Lia.
Salmo Responsorial Sal. 118(119). 29, 72, 89, 101, 104, 163 (R. 1)
Refrão : Na’i, Ita nia liafuan mak roman iha ha’u dalan!!! Repete-se
Hado’ok ha’u housi dalan áat,
Haraik graça mai ha’u atu serbi Ita hakaran.
La iha osa mean no osa mutin iha mundo,
Nebé folin hanesan liafuan ida
Housi Ita futar ibun. Refrão
Na’i, Ita futar liafuan rohan laek,
Metin hanesan lalehan.
Ha’u hadook ha’u ain housi dalan áat,
Atu rai didi’ak Ita futar liafuan. Refrão
Na’i, ha’u hanoin ho laran Ita lei,
Ha’u laran nakali hasouru lia bosok,
Ha’u hakribi lia bosok,
Ha’u Maromak, ha’u hadomi Ita hakaran. Refrão
Aclamação Mc. 1. 15
Refrão : Aleluia, Aleluia!! Repete-se
Maromak Nia reino besik ona;
imi hakribi imi nia salan no fiar iha Evangelho. Refrão
Evangelho Lc. 9. 1-6
† Na’i Jesus Cristo nia Evangelho nu’udar São Lucas haktuir:
Iha tempo nebá, Jesus bolu apóstolo na’in sanulu resin rua besik Nia, hodi fó biit ba sira atu duni sai diabo sira no fó isin di’ak ba ema moras sira. Nia haruka sira atu haklaken Maromak nia reino, no mós atu fó isin di’ak ba ema moras sira. Nia dehan ba sira: “Keta lori tuir dalan ai tonka ka kohe, pão ka osan ka hatais tahan rua. Iha uma naran de’it nebé imi tama, hela iha nebá to’o tempo nebé imi atu sai. Kona ba sira nebé la simu imi, wainhira imi husik fatin nebá, liki rai rahun housi imi nia ain nu’udar sinal hasouru sira.” Nune’e sira sai hodi la’o housi knua ida ba knua sira seluk, hodi haklaken Evangelho no fó isin di’ak ba ema moras sira iha fatin hotu.
Lia Maksoyn.
