shadow
Diocese de Dili > NOTÍCIAS > HOMILIA DO BISPO > IGREJA NUMBEI NO GRUTA LEOLBATAN MAK SAI FATIN PEREGRINAÇÃO BA SARANI SIRA IHA OE-CUSSE ATU HETAN INDULGENCIA

IGREJA NUMBEI NO GRUTA LEOLBATAN MAK SAI FATIN PEREGRINAÇÃO BA SARANI SIRA IHA OE-CUSSE ATU HETAN INDULGENCIA

Sarani doben sira mak Na’i Jesus Cristo hadomi!

Ohin ne’e momento diak ida ba ita atu fo obrigado ba Maromak, iha razão oi-oin atu ita fo obrigado, razão oi-oin atu ita agradece. Ita hotu hatene katak iha mundo  ohin ne’e loron mundo hasoru hela moras boot ida ho naran corona. Corona ne’e laos deit hatauk Timor maibé corona ne’e hanesan ameaça ida iha mundo masque ho matenek ho meios, ho osan no buat barak maibé to’o agora daudaun hanesan ema dehan ema hotu buka hela dalan oinsa atu nune’e bele defende ninia an maibé ita Timor desde inicio nu’udar nação foun, ita nia meios atu bele combate hasoru moras ida ne’e mos furak teb-tebes, ita iha meios rua deit mak hanesan prevenção katak ita buka haka’as an hamutuk, uma creda no estado hamutuk fo hanoin ba sarani sira atu ita buka prevene atu moras ida ne’e labele daet no meios Segundo katak nu’udar ema fiar na’in ita mos laos fiar deit buat nebé ciençias ninia aimoruk maibé ita mos foti matan hateke ba lalehan nu’udar ema fiar na’in husu Maromak nia tulun tan ne’e wainhira moras ne’e começa daet iha rai Timor, daet iha mundo nu’udar bispo iha Dili husu kedas ba sarani sira iha Timor, ita nia mahein ba povo ba nação ida ne’e mak Na’in Feto ou Nossa Senhora Imaculada da Conceição sai nu’udar padroera mahein ba povo no rai Timor liu-liu ba arquidiocese Dili, husu ba sarani sira atu ita haraik an taka liman husu ba Na’in Feto atu protégé povo ida ne’e povo fiar na’in, povo oituan, povo nebé terus kleur ona iha funu atu moras ida ne’e labele oho tan povo ida ne’e.

Maluk sarani sira!

Ita hare katak buat rua ne’e hotu ajuda ita nia esforço nebé ita halo nune’e mos hodi husu nafatin Na’i Maromak nia tulun liu housi Na’in Feto ninia interseção mak ohin loron masque mundo ema barak atrapalha kona ba moras ida ne’e maibé ita Timor ne’e sei hakmatek maibé ita keta hamnasa demais, ita keta contente demais katak sei la to’o mai ita, importante buat rua ne’e ita kaer metin nafatin, rona no tuir nafatin orientação hotu housi ministério saúde no nu’udar fiar na’in ita reza nafatin atu Na’i Maromak loke nafatin ita nia fuan, ita nia laran atu Na’i Maromak bele protégé nafatin ita housi buat a’at perigo hirak ne’e hotu. Tinan ida ne’e mos Diocese Dili completa tinan 80, ne’e duni nu’udar missão igreja iha Timor ne’e tinan hirak liu ba ita celebra tiha ona tinan atus lima(500) maibé Diocese Dili desde uluk quando atu sai Diocese hahu iha loron 4 fulan Setembro tinan 1940 tan ne’e tinan ida ne’e (2020), ita celebra 80 anos nu’udar Diocese. Tan ida ne’e mak Diocese iha tinan ida ne’e convida sarani iha Timor tomak liu-liu sarani Arquidiocese Dili ninian atu ita agradece ba Maromak ba fiar católico, fiar sarani nebé laos monu deit maibé oinsa ita timoroan hatan hodi colabora fiar Maromak ninian ne’e monu laos monu deit iha fatuk leten, monu iha rai maran maibé fiar ida ne’e monu duni iha rai bokur mak tinan 500 liu tiha continua tinan 80 nu’udar Diocese, agora Diocese buras ba to’o Diocese tolu ona (Dili, Baucau no Maliana) karik ba oin sei burasliu tan, uluk ita nu’udar Diocese deit maibé iha tinan kotuk santo padre mos foti Dili ne’e sai nu’udar Arquidiocese e fulan kotuk amo papa entrega PALIO. Palio ne’e hena nebé tau ba iha kakorok ne’e ho sinal rua; sinal ida hodi hametin  nafatin sinal autoridade ninian hodi kaer metin ligação uma creda Timor ho Vaticano no ida seluk autoridade mos atu ukun iha uma creda Timor ninian iha provincia Eclesiastica nebé ho nia centro iha Dili nebé ita hanaran Metropolita. Tan ne’e mak Diocese Dili iha tinan ida ne’e ita mos sei halo preparação atu bele celebra loron boot 80 anos ninian ne’e tanba fulan Setembro liu tiha ona ita sei celebra iha dia 8 de Dezembro iha Dili sei halo festa ida ne’e maibé mos programa ne’e sei tun to’o paróquia, quase paróquia. Programa iha rua nebé precisa hatene katak durante tempo ida ne’e nia laran tinan 80 ne’e ita husu tiha ona ba Vaticano-Santo Padre fo graça ida especial naran Indulgencia plenario, graça ida nebé ita husu haraik mai ita durante fulan 3 (Setembro, Outubro no Dezembro) dia 8 remata ona e se deit mak hakarak hetan graça ida ne’e atu ita moris nafatin  iha Na’i Maromak nia graça, ita quando halo sala karik iha buat ruma mate derepente, ita la mate ho estado sala ninian maibé ita mate karik ita  bele hola parte iha Maromak ninia reino maibé atu bele hetan graça ida ne’e tem que visita igreja balun, tanba Oe-cusse dook housi Dili então ami hili fatin rua iha Oe-cusse ne’e duni ida mak igreja Numbei ninian hodi missa, confessa, comunga e reza tuir santo Padre nia intenção bele hetan graça ida ne’e, se laiha igreja Numbei hakarak passear liu  tan bele ba iha  Gruta ka Monumento Nossa Senhora ninian iha Leolbatan, tão fatin rua ne’e iha Oe-cusse ne’e duni peregrinação atu bele hetan indulgencia.

Maluk sarani doben sira!

Tema ba festa ida ne’e ninian mak HAMUTUK HO NA’IN FETO MARIA  ITA BA HADOMI LIU TAN NIA OAN JESUS, tanba Na’in Feto mak sai nu’udar mahein rai Timor ninian convida atu iha loron celebração tinan 80 ninian ne’e atu timoroan sira  bele hadomi liu tan Maromak ninia Inan, atu timoroan sira   bele banati tuir liu tan Na’in Feto nu’udar ezemplo ninia vertude haraik an ninian, laran moos ninian, obidiencia ninian iha ita nia moris nu’udar sarani.  Ita nia amo papa nia liafuan nebé ha’u gosta sita nebé dehan ba foinsa’e no sarani sira kona ba liafuan “gossip” ou lori lia nebé buka atu soran ema ho lia e santo padre dehan buat ida gossip ne’e hodi lori lia tun sa’e ne’e, ita nia nanal dala barak hanesan bomba oho ema barak hodi estraga ita nia relação. Quando ita lori lia ita estraga ita nia amizade, kolega, sobu, papa dehan gossip ne’e sobu unidade iha familia, sobu ita nia grupo, sobu ita nia sociedade laran tan ne’e mak papa dehan ita precisa teb-tebes, los duni katak ita hotu mesak ema sala na’in, ema kbiit laek dala barak ita monu iha buat ida ne’e maibé papa husu ita atu labele sai fali ema nebé protagonista, ema nebé atu promove buat hirak ne’e maibé ita tem que ser haka’as an hadia, ida ne’e missão foinsa’e sira nian, imi mak futuro uma creda, imi mak futuro nação, futuro RAEOA ninian ne’e precisa foinsa’e nebé iha identidade, laos deit matenek maibé ita precisa mos ema nebé iha carater katak ema nebé iha personalidade, ema nebé iha ninia  identidade rasik nu’udar sarani nebé los, cidadão nebé los ida ne’e mak ita hotu hakarak   tan ne’e ohin ita agradece ba Maromak ba graça Espírito santo nian bele sai momento diak ida ba ita hodi renova, uma creda iha tinan ida ne’e ita celebra tinan 80 liu-liu uma creda Pasabe ninian ita hare iha dezenvolvimento iha progreço, hatudu katak Espírito Maromak ninian iha Pasabe ne’e moris.

Sarani doben sira!

Quando iha problema nia laran ita hamutuk ho Maromak iha paz iha ita nia fuan paz iha ita nia neon, bele problema boot oinsa mos iha dalan atu resolve maibé quando problema kiik oan ita la buka Maromak, ita nia laran laiha paz, laiha dame, problema kiik oan ida mos ita hare katak buat boot ida então halo ita stres tan ne’e mak ita agradece ba Maromak tanba fiar,  fiar nebé ita nia avo sira husik hela ba ita, fiar nebé ita continua ita kaer nafatin tuir  tradição.

Leave a Reply

Your email address will not be published. Required fields are marked *