shadow
Diocese de Dili > NOTÍCIAS > LETURA DIÁRIA > XXVII DOMINGO TEMPO COMUM (ANO A)

XXVII DOMINGO TEMPO COMUM (ANO A)

Primeira Leitura                             Is. 5, 1-7

Lia housi Livro Profeta Isaías:

Ha’u hananu ba ha’u belun knananuk domin nebé nia hananu ba nia to’os uvas nian. Ha’u belun iha to’os ida, halo iha rai lolon bokur ida. Lere tiha to’os ne’e, nia hamos tiha fatuk, hodi kuda uvas kain di’ak de’it. Nia hari loho ida iha to’os klaran, halo mos fatin ida atu sama uvas ba.  Nia hein uvas ne’e nafuan di’ak, maibé, fo de’it uvas sin.  “Oras ne’e, ema Jerusalém no ema Judá sira, imi rasik tesi lia kona mai Ha’u no ba Ha’u nia to’o sa ne’e:  Buat di’ak sa mak bele halo ba Ha’u nia to’os, maibé Ha’u la halo?  Uainhira Ha’u hein atu nafuan uvas di’ak, tan sa nia fo de’it uvas sin? Oras ne’e Ha’u hatudu ba imi buat nebé Ha’u sei halo ba to’os ne’e:  Ha’u sei sobu tiha lutu, balada sei han mohu tiha; Ha’u harahun tiha lutu, ema sei sama hodi halimar. Ha’u sei fila nia ba rai-fuik maran ida:  Ha’u sei la tesi hadi’a tan nia, sei la hamamar tan rai; du’ut fuik no ai-tarak mak sei nakonu iha nia laran. Ha’u sei luli kalohan atu keta monu udan ba nia.”  Tan, buat hotu nia Na’in nia to’os mak Israel nia uman; Nia abat doben mak ema Judá sira. Nia hein hahalok di’ak, maibé, ran de’it mak fakar; Nia hein justisa, maibé, ema tanis ho laran susar!

Maromak Futar Lia.

 

Salmo Responsorial                                                                                                                  Sal. 79(80), 9. 12. 13-14. 15-16. 19-20

Refrão : Na’i nia toos mak Israel nia uman!!! Repete-se

Na’i, halo ha’u hatene Ita nia ukun-fuan,

hanourin Ita dalan mai ha’u.

Hatudu Ita nia lialos mai. Ita, ha’u nia Maromak,

ha’u nia Maksoyn. Na’i, ha’u hein ita. Refrão

 

Na’i, hanoin Ita nia laran maus,

no Ita laran di’ak nebé la nahas.

Keta hanoin ha’u nia salan, hahalok aat molok sei klosan.

Hanoin ha’u ho laran luak, Na’i, tan di’ak tebes. Refrão

 

Na’i, di’ak laran maus,

lori ema maksalak ba dalan los;

halo ema kiik moris tuir justisa,

hanourin ba ema ki’ak atu tuir. Refrão

 

Segunda Leitura                                                                                                                                                                              Flp. 4, 6-9

Lia housi São Paulo nia surat ba sarani sira iha Filipo:

Maun alin sira: Keta laran susar ba buat ruma. Maibé, iha buat hotu, buka hamulak hodi husu; buka mos agradece, atu buat nebé imi husu bele sa’e to’o Maromak futar oin. Maromak nia paz nebé boot liu matenek hotu, sei rai imi laran no imi neon iha Jesus Cristo. Maun-alin sira: kona ba buat seluk, buat hotu nebé los no boot, buat nebé di’ak no mos, buat hotu nebé domin no naran di’ak buat hahalok di’ak no bele hahi, buat sira ne’e, imi sei tau iha imi neon. Buat nebé imi hatene, imi simu hodi rona housi Ha’u; hare iha Ha’u buat nebé imi sei halo tuir. Maromak nia paz sei hela ho imi.

Maromak Futar Lia.

 

Aclamação                                                                                                                                                                                          Mt. 21, 42

Refrão : Aleluia, Aleluia!! Repete-se

Fatuk ida nebé badaen sira hewai,

nakfilak ba fatuk inan. Refrão

 

Evangelho                                                                                                                                                                                    Mt. 21, 33-43

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus dehan ba boot sacerdote sira nian no ba ema katuas povo nian: “Imi rona tan aiknanoik ida ne’e: Toos na’in ida kuda toos ida mesak uvas de’it. Hale’u tiha ho lutu, nia halo fatin ida atu sama uvas, hodi hari loho ida iha toos ne’e. Hafoin, nia fo ba ema balun atu tau matan; nia la’o tiha ba dook. To’o ona loron atu ku’u, nia haruka atan sira ba ema nebé kaer toos atu simu ai-fuan nebé monu ba nia. Ema sira ne’e, kaer tiha atan sira, baku balun, oho seluk, tuda balun, oho balun. Nia haruka fali atan seluk, ua’in liu sira uluk. Ikus mai, nia haruka nia oan rasik, hodi hanoin ba nia an:  Sira sei hamta’uk ha’u oan. Maibé, hare tiha nia oan, ema sira ne’e dehan ba malu:  ‘Ida ne’e mak liman-rohan na’in. Oho tiha nia, ita sei hela ho buat hotu-hotu.’  Kaer tiha nia, sira lori ba to’os ninin, hodi oho tiha nia. Uainhira to’os na’in mai, nia sei halo los sa ba ema sira ne’e?”  Boot sacerdote sira no kbahen povo nian, hatan ba Nia:  “Tan sira aat nune’e, nia sei halo sira mate aat teb-tebes, nia sei fo to’os ne’e ba ema seluk kaer, ba ema nebé to’o loron sei lori ai-fuan mai hasa’e.”  Jesus dehan ba sira:  “Imi la dauk hare iha Escritura:  ‘Fatuk nebé bada’en sira hewai, sei nakfilak ba fatuk-inan. Buat sira ne’e Maromak halo, nebé kmanek tebes ba ita matan?’  Tan ne’e, Ha’u dehan ba imi: Maromak nia Reino sei hasai housi imi, hodi fo fali ba povo ida nebé bele nafuan di’ak”.

Lia Maksoyn.

Leave a Reply

Your email address will not be published. Required fields are marked *