shadow
Diocese de Dili > NOTÍCIAS > LETURA DIÁRIA > Terça-Feira, XXVII Semana Tempo Comum (ANO A)

Terça-Feira, XXVII Semana Tempo Comum (ANO A)

Primeira Leitura                   Gal. 1. 13-24

Lia housi São Paulo nia Surat ba sarani sira iha Galatas:

Maun alin sira: Imi rona tiha ha’u nia moris uluk nian, wainhira ha’u hadomi judeu sira nia religião: oin sá ha’u, ho laran tos, fó susar ba Maromak nia Kreda hodi buka ho laran tomak atu halo áat sira. Ha’u maka’as liu maluk judeu sira barak iha judeu sira nia religião ne’e; ha’u nia devoção ba ita nia bei-ala sira nia lisan maka’as liu.

Maibé, tan Nia graça, Maromak haketak ha’u housi ha’u inan nia knotak hodi bolu ha’u atu fó hatene nia Oan Mane iha ha’u, atu ha’u bele haklaken Nia ba gentio sira, ha’u la hakbesik ema ruma atu simu conselho, ha’u la ba Jerusalém atu haré sira nebé sai Apóstolo uluk liu ha’u. Ha’u ba kedas Arábia; tuir mai ha’u fila fali ba Damasco. Liu tiha tinan tolu de’it mak ha’u ba Jerusalém, atu simu liafuan ruma housi Pedro, no ha’u hela ho nia semana rua de’it. Ha’u la haré tan apóstolo seluk; maibé ha’u haré Tiago, Na’i nia alin.

Buat nebé ha’u hakerek ba imi mak lós. Maromak hatene katak ha’u la bosok.

Tuir mai, ha’u ba rai oi-oin iha Síria no Cilícia. Iha tempo nebá, sarani sira iha Judeia la haré ha’u ho sira nia matan rasik; sira hatene de’it buat nebé ema dehan: “Ema nebé uluk fó susar mai ita, ohin nia haklaken fiar nebé uluk nia haka’as an atu halo áat.” Nune’e, sira wainhira Maromak tanba ha’u.

Maromak Futar Lia.

 

Salmo Responsorial                                                                                                 Sal. 138(139). 1-2,  3b, 13-14ab, 14c-15 (R. 24b)

Refrão : Na’i, lori ha’u tuir dalan rohan laek nian!!! Repete-se

Na’i, Ita hatene ha’u laran tomak;

Ita hatene wainhira ha’u tur no wainhira ha’u hamriik;

Housi dook, ita hatene ha’u hanoin,

Ita haré ha’u wainhira ha’u la’o no ha’u descansa;

Ita hamatan tuir ha’u hakat hotu. Refrão

 

Ita mak halo ha’u an tomak

Ita mak halo moris ha’u iha ha’u inan nia knotak.

Ha’u agradece itaboot, tan ita halo ha’u kmanek tebes

Ita hahalok sira kmanek tebes duni. Refrão

 

Ita hatene nanis ha’u klamar,

Ha’u isin baluk ida la subar ba ita,

Wainhira halo ha’u moris iha segredo,

Halo iha kle’an tebes rai nian. Refrão

 

Aclamação                                                                                                                                                                                           Lc. 11. 28

Refrão : Aleluia, Aleluia!! Repete-se

Rahun di’ak ba sira nebé rona

Maromak Nia futar lia hodi moris tuir. Refrão

 

Evangelho                                                                                                                                                                                     Lc. 10. 38-42

Na’i Jesus Cristo nia Evangelho nu’udar São Lucas haktuir:

Iha tempo nebá, tuir dalan, Jesus to’o knua ida. Feto ida naran Marta simu Nia iha nia uma. Marta iha feton ida naran Maria, nebé tur de’it iha Jesus nia ain hodi rona Nia Ko’alia. Marta fali, nebé la’o ba la’o mai hodi serbisu barak, hakbesik hodi dehan: “Na’i, Ita la haré katak ha’u nia alin husik ha’u serbisu mesa-mesak? Dehan to’ok ba nia atu tulun ha’u,” Na’i hatan ba nia: “Marta, Marta, ó la’o kole hodi hanoin resin kona ba buat barak; maibé buat ida de’it mak folin lós. Maria hili buat nebé di’ak liu hotu, nebé ema ida sei la hadau housi nia”.

Lia Maksoyn.

Leave a Reply

Your email address will not be published. Required fields are marked *