shadow
Diocese de Dili > NOTÍCIAS > LETURA DIÁRIA > Quarta-Feira, XXVII Semana Tempo Comum (ANO A)

Quarta-Feira, XXVII Semana Tempo Comum (ANO A)

Primeira Leitura                Gal. 2. 1-2, 7-14

Lia housi São Paulo nia Surat ba sarani sira iha Galácia:

Maun alin sira: liu tiha tinan sanulu resin háat, ha’u fila fali ba jerusalém hamutuk ho Bernabé, hodi bolu mós Tito. Ha’u ba nebá basá Maromak haruka ha’u. Wainhira ha’u mesak ba hasouru katuas sira, ha’u fó hatene ba sira evangelho nebé ha’u haklaken ba gentio sira. Ha’u lakohi katak ha’u nia serbisu ohin ka aban bainrua nian sai leet de’it.

Maibé sira haré katak Maromak fó tiha mai ha’u knaar ida ne’e atu haklaken Evangelho ba gentio sira nu’udar Nia fó tiha knaar atu haklaken Evangelho ba judeu sira ba Pedro. Basá, Nia nebé serbisu housi pedro ba judeu sira, serbisu mós housi ha’u ba gentio sira. Tiago, Pedro no João, nebé ema haré nu’udar na’i ulun, haré katak Maromak fó knaar ida ne’e mai ha’u; tan ne’e sira káer liman ho Bernabé ho ha’u nu’udar sinal katak ami maluk, hodi lia tuir malu katak Bernabé ho ha’u sei serbisu iha gentio sira leet no sira iha judeu sira leet. Buat nebé sira husu de’it mak na’e: ami sei tau matan ba ema kiak sira housi sira leet. Buat ne’e ha’u hakarak halo nanis ona duni. Maibé wainhira Pedro to’o tiha Antioquia, ha’u si’ak nia iha ema nia oin, basá nia sala duni. Molok ema sira nebé Tiago haruka to’o nebá, Pedro han hamutuk ho ita nia maun alin sira nebé uluk moris nu’udar gentio. Maibé wainhira ema sira ne’e to’o nebá, nia muda no lakohi han hamutuk ho gentio uluk sira ne’e, basá nia ta’uk sira nebé hakarak fó circuncisão ba sira. Maun alin sira seluk hahu ta’uk hamutuk ho Pedro. Bernabé mós halo tuir sira nia hahalok nebé ema ta’ukten nian ne’e.

Wainhira ha’u haré katak nia la la’o tuir dalan lós tuir lialos Evangelho nian, ha’u dehan ba Pedro iha sira hotu nia oin: “O ema judeu, maibé ó moris hanesan gentio, la’os hanesan ema judeu. Ne’e duni, oin sá ó bele halo ema gentio sira moris nu’udar ema judeu sira?”

 Maromak Futar Lia.

 

Salmo Responsorial                                                                                                                           Sal. 116(117). 1-2, (R. Mc. 16. 15)

Refrão : Imi ba mundo tomak hodi haklaken Evangelho!!! Repete-se

Nação hot-hotu wainhira Na’i ba,

Povo sira hotu hauélok Na’i ba! Refrão

 

Nia domin mai ita metin lós tebes,

Tuir nafatin lia meno nebé Nia hakotu! Refrão

 

Aclamação                                                                                                                                                                                    Rom. 8. 15bc

Refrão : Aleluia, Aleluia!! Repete-se

Imi simu Espírito ida nebé halo imi sai oan fudin,

nebé lori ita bolu: “Abba! Aman”. Refrão

 

Evangelho                                                                                                                                                                                           Lc. 11. 1-4

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus harohan iha fatin ida. Hotu tiha, nia escolante ida hateten ba Nia: “Na’i, hanourin ami atu harohan hanesan João Babtista  hanourin nia escolante sira.” Nia dehan ba sira: “Wainhira imi harohan, hateten nune’e: ‘Aman, tulun ema atu wainhira Ita naran. Halo Ita nia reino to’o mai ami. Haraik aihan lorloron nian mai ami. Haraik perdua mai ami sala, nu’udar ami perdua ema nebé halo áat ami. Labele husik ami monu ba babeur’’’.

Lia Maksoyn.

Leave a Reply

Your email address will not be published. Required fields are marked *